1. Poltôdd marisor Israelitam mukhar Sorvesporan Jordanachim udkam sukoilim hi khobor Jordanachê ostomtê vatten ravtolea Amoritanchea ani doria degechea vattarant ravtolea Kanaanitkaranchea razamnim aikoli, tedna tanchim kallzam virun gelim ani Israelitam add zhuzunk tankam boll zalem na.
2. Tea vellar Sorvesporan Joshuak mhollem: ‘Kupadtoracheô suriô korun Israelitanchi novean sunôt kôr.’
3. Joshuan kupadtoracheô suriô keleô ani Haralot dongrar Israelitanchi sunôt keli.
4. Joshuan tanchi kiteak sunôt keli, tachem karonn hem: Porjê modle xastram gheunk Ejiptantle bhair soril’le soglle dadlea-lingache monis Ejiptantle bhair sortôch, vatter, oronneant mele.
5. Atam bhair soril’le sogllê porjechi sunôt kel’li. Punn Ejiptantlim bhair sortôch vatter, oronneant, zolmank ailoleanchi sunôt korunk nasli.
6. Kiteak sogllem raxttr, mhonngê, loddai korunk Ejiptantle ailole dadle moro porian Israel porza challis vorsam oronneant bhonvli. Tannim Sorvesporacho tallo aikunk naslo ani dud ani mhonv vhanvta ti suvat amkam ditolo mhonn amchea purvozank soput dilolo ti suvat tim kednanch polleunk paunchim nant mhonn Sorvesporan soput ghetlo.
7. Punn tanchê suvater Tannem tanchea putank ubarle ani Joshuan hanchi sunôt keli: te sunôt korunk naslole kiteak vatt choltana tanchi sunôt korunk nasli.
8. Sogllea raxttrachi sunôt kelea uprant, porot bore za porian tannim tombunt visôv ghetlo.
9. Uprant Sorvesporan Joshuak mhollem: ‘Aichea disa Hanvem Ejiptachi loz tumchê voili kaddun uddoili.’ Haka lagun, aiz porian tê suatek Gilgal oxem mhonnttat.
10. Israelitamnim Gilgalant pennem kelem, ani thoim Jerikechea mollar mhoineachea chovdavea disa, sanjê-vellar tannim Paskanchi Porob somarombhli.
11. Paskanchea dusrea disa, teach desachem utpon mhonngê khomir naslolo unddo ani bhazlolo orôv tannim khelo.
12. Jea disa tannim tea desachem utpon kelem, tea disa thaun man’na anink poddunk na. Ani man’na mellonaslo dekhun, Israelit lok tea vorsa thaun Kanaan desant utpon zatalem tench khaunk laglo.
13. Jedna Joshua Jeriko lagim pavlo, tannem voir nodor marli ani apnna fuddlean suri gheun axil’lo êk monis tannem pollelo. Joshua tachê-xim gelo ani tannem mhollem: ‘Tum amchê vatten vô amchea dusmana vatten asai?’
14. Tannem zobab dilo: ‘Hanv konnachêch vatten na. Hanv Sorvesporachê foujecho mukheli koso ailam.’ Joshua zomnir sorpott poddlo ani taka nomoskar korun, mhollem: ‘Mhojea Devan tachea chakrak kitem sangchem asa?’
15. Sorvesporachê foujechea mukhelean Joshuak zap dili: ‘Tujea paiancheô vhannô kadd, kiteak tum asai ti suvat Povitr.’ Ani Joshuan toxem kelem.
