1. Zaito kall Sorvesporan Israelak sorvbhonvtim aslolea aplea dusmanam thaun xanti dilea uprant Joshua utar piraier pavun mhataro zalo.
2. Joshuan ak'khea Israelak, tachea zantteank, vhoddilank, fuddareank ani odhikareank apoun haddle ani mhollem: 'Hanv utar piraier pavlam ani mhataro zalam;
3. Tumchê pasot Sorvespora, tumchea Devan, hea sogllea raxttrank kitem kelam tem tumi dekhlam; Sorvespor tumcho Dev tumchê pasot zhuzla.
4. Hea urlolea raxttrantle, Jordana thaun Vhoddlea Doria meren hanvem nas kelo te des, sort ghalun tumchem daiz koxem hanvem tumchea kullank vanttun dileat.
5. Sorvespor tumcho Dev, tumchê mukhavelim tankam dhanvddaitolo; tumchê mukhar tancho dês kaddun ghetolo ani Sorvespora tumchea Devan tumkam bhasail'lem toxem tanchea desacho tabo tumkam ditolo.
6. Punn tumi mat Moizesachê Somurtint boroilolem asa tem pallunk thirponn samballat; Tichê sorxil'lim tumi khoinchech vatten koddsorun vechem nhoi.
7. Tumchê modem urlolea hea raxttram modem misoll zainakat; tanchea devanchem nanv tumchea onttancher aschem nhoi, tanchea nanvan soput gheum nakat, nhoi mhonn tanchi seva korum nakat, toxench tanchê mukhar sorpott poddum nakat.
8. Portench zalear, aiz porian tumi ravleant toxim, Sorvespora tumchea Devak visvaxi ravat;
9. Sorvesporan, tumchê mukhar, vhodd ani bollixt raxttrank bhair dhanvddaileant, ani hê ghoddiê meren tumchê add zhuzunk konnank boll zalem na.
10. Tumchê modlea eka mon'xachean hozar mon'xancho nas korunk zalo kiteak, Apnnem bhasailolem toxem, Sorvespor tumcho Dev tumchê borabor zhuztalo.
11. Sorvespora, tumchea Devacho mog korunk chotrai dhôrat.
12. Punn tumi khoinche-i bhaxen portoxat, hea urlolea raxttram thaim ixttagotiche sombond zoddxat, tanchê kodde logn zaxat ani tumi tanchê ani tim tumchê borabor misoll zatit zalear,
13. Sorvespor tumcho Dev hea raxttrank tumchê mukhavelim dhanvddaunchona; tim tumkam fas manddtolim ani fonddant ghaltolim; tumchê vatter ani tumchea dolleam mukhar khastichem chabuk ani kantteanchem zhomp zatolim; ani Sorvespora tumchea Devan tumkam dil'lea desantlim tumkam nanch kortolim.
14. Atam polleiat, hanv mornnank lagim pavlam; sogllea tumchea kallzan ani otmean Sorvespora tumchea Devan kel'leô soglleô bhasavnneô pallon aileat mhonn zanno zaiat; tantli êk porian pallon ienastana urli na.
15. Sorvespora tumchea Devan tumkam kel'leô bhasavnneô pall'leô toxench, tumchê vixim dil'leô xiddkavnneô-i To pallon iexeo kortolo; daiz koxem dilam tea desantlim tumkam bhair ghalunk To pattim sorchona.
16. Sorvespora tumchea Devan tumchê kodde kel'lo korar tumi moddxat zalear, vô Taka sôddun kud'dea devanchi seva korun tankam bhozxat zalear, Sorvesporacho rag tumcher choddtolo ani tumkam dil'lea hea desantlim To tumkam bhair ghalunk vêll ibaddcho na.'
