1. Shittim’ thaun Nunachea Puta Joshuan, desachi sôdpus korchê khatir guptim dogam mon’xank dhaddle. Tannem mhollem: ‘Vochat ani desachi, kherit bhaxen Jerikechi bariksannin topasnni korat.’ Te gele; ani rat sarchê khatir te Rahab mhonnlolê naikinichea ghorant bhitôr sorle.
2. ‘Israelache kaim monis desachi sôdpus korunk aichê rati hanga aileat’ hi khobor Jerikechea razak gomoili.
3. Jerikechea razan Rahabak oso sondêx dhaddlo: ‘Tujea ghorant ieun biradd korun asat tea mon’xank bhair ghal kiteak te ak’khea desachi sôdpus korunk aileat.’
4. Punn tê ostoren dogam-i mon’xank lipoile. Tinnem mhollem: ‘Khorench mhojê-xim dog monis ailole, punn te khoim thaun aileat tem mhaka khobor na.
5. Dis darer poddtana, xaracho darvontto dampchea vellar, te monis bhair sorle ani te khoim geleat tem hanv sangunk xokona. Sottasott tanchê pattlean vochat ani tumi tanchi patt dhôrtoleat.’
6. Tinnem tankam ghorachea pattosar velole ani thoim axil’le sonnmianchea boddiam khala tankam lipoilole.
7. Tanchi sôdpus korunk ailole monis taktiken Jordan nôd paiamnim utrunk zata thoim meren Jordana vatten gele ani tanchê fattlean darvontto bond zalo.
8. Te dog monis ratcho visôv gheunk vechê adim, Rahab tanchê-xim pattosar aili.
9. Tinnem tankam mhollem: ‘Sorvesporan tumkam ho dês dila, tumchi bhirant amcher poddlea ani tumchea iennea vorvim hea desant ravpeancher akant aila hachi mhaka khobor asa.
10. Tumi Ejiptantlim bhair sortana tumchea fuddean Sorvesporan koso Tambddo Doria sukoilo ani Jordanachê poltoddi aslolea Sihon ani Og, hea Amoritanchea razanchem koxem nisontton zalem-hem ami aikolam.
11. Hem aikolem tedna amchim kallzam virun gelim ani konnank tumcher virodh korpak kalliz zalem na kiteak Sorvespor tumcho Dev Sorgar tosoch sonvsarant Dev.
12. Hanvem tumchê sovem doia dak'khoili tea khatir, tumi tumchê votin mhojea bapaichea kuttumbak doia dak'khoitole mhonn, Sorvesporachean mhaka soput diat;
13. Mhojea avoi-bapaichem, bhavam-bhoinnanchem ani tankam lagu zatolea somestanchem jivit tumi rakhtoleat ani amkam mornnantlim soddoitoleat mhonn mhaka khatrechi khunna diat.’
14. Tea mon’xamnim zobab dilo, ‘Amchea karia vixim tum konnank kainch sangchinaim zalear ami tuka amchea jivachean soput ditanv. Sorvespor amkam dês diit tedna ami tujê thaim doiallaien ani visvaxiponnan vagtoleanv.’
15. Uprant tinnem tankam doriechea adaran zonelantlean sokla denvoile kiteak tichem ghor xarachê vontticher aslem ani ti thoim ravtali.
16. Tinnem tankam mhollem: ‘Tumchi sôd gheupeanchea chopkeant tumi poddche nhoi tea khatir dongra vatten vochat. Te porot ie porian tin dis thoim lipun ravat ani uprant tumchê vatten vochat.’
17. Tea mon’xamnim mhollem: ‘Tunvem amkam diunk lailolea soputak ami oso pallo ditoleanv.
18. Ami dês bollan ghetoleanv tedna amkam sokla denvoile tea zonelak tunvem hi tambddi dori bandchi; tujea bapaik, avoik, bhavank ani sogllea kuttumbak ghorant bhitôr zomounchim.
19. Tujea ghorantlo konnui rostear bhair sorot zalear tachem rogot tachê tokler poddtolem ani ami hache guneanvkar zaunche nanv; punn tujê borabor ghorant ravtoleancher konnem-i hat ghalo zalear tache ki ami guneanvkar zatoleanv.
20. Punn amchea kariacho gutt tunvem fôddlo zalear tunvem amkam gheunk lailolea soputantle ami meklle zatoleanv.’
21. Tinnem zap dili: ‘Tumi mhollam toxench zaum-di.’ Tinnem tankam vochunk dilem ani te gele. Uprant tinnem zonelak tambddi dori bandhli.
22. Te gele ani dongra vatten cholunk lagle. Ani tancho sôd gheupi, ghora porto porian, tin dis te thoim ravle. Porot ietana porian tãnnim tankam vatter sôdle punn te mell’le nant.
23. Tedna te dog monis dongra vele denvle, nôd utorli ani Nunachea puta Joshua-xim vochun tankam ghoddlolea titlea vixim taka khobor dili.
24. Tannim Joshuak mhollem: ‘Sorvesporan ak’kho dês amchea hatant ghal’lo asa ani amchea iennea vorvim tantunt vosti korpi bhirantin akantleat.’
