1. Soglli porza Jordan nôd utorli tedna, Sorvespor Joshua kodde uloilo ani mhollem:
2. ‘lokam môdlea, dôr-eka kullantlo êk monis dhôrun, bara zannank venchun kadd ani tankam hi adnia di:
3. Iadnik ube asle tea Jordan nodintle bara fator gheiat. Tumchê borabor te vhorat ani tumi rat sartoleat tea mollar te dovrat. ’
4. Joshuan Israelachea bara kullantle venchun kaddlolea bara mon’xank apoile ani
5. tankam mhollem: ‘Sorvespora tumchea Devachea arkpettê mukhar Jordana modim vochat ani Israelachea kullanchea ankddeam pormannem, zonn-eklo ap-aplea buzar êk fator gheiat.
6. Fuddarak hea fatrancho orth kitem? oxem tumchim bhurgim tumkam vicharit zalear, tumi tankam oxem sangchem: Sorvesporachea korarachi arkpett Jordan nôd utorli tedna, Jordanachim udkam doxim zalolim. He fator Israelkarank hacho sodankal urtolo ugddas. ’
8. Joshuachea hukuma pormannem Israelkaramnim kelem. Sorvesporan Joshuak sanglolê pormannem tannim Jordana modle, Israelachea kullanchea ankam pormannem bara fator ghetle. Tannim te pennem kortolea zagear vhele ani thoim dovorle.
9. Uprant Joshuan korarachi arkpett vhelole Iadnik ube aslolea zagear, Jordana modem, te bara fator ube kele ani aiz porian te thoim asat.
10. Sorvesporan sanglolem tem sogllem Joshuan porjek kollit korisor Moizesan Joshuak hukum’ ghal’lo tea pormannem arkpett vhortole Iadnik Jordana-modem ube ravle ani porza taktiken poltoddi geli.
11. Sogllê porjen poltôdd martôch, Sorvesporachê arkpettin poltôdd marli ani iadnik porjê fuddem ravle.
12. Moizesan tankam sanglolem toxem Reubenacheô ani Gadacheô put-dhuvô ani Manasechem ordem-kull Israelkaram mukhar hatiaram gheun nôd utorlim.
13. Zhuzak toiar aslole sumar challis hozar mon’xamnim, Sorvespora mukhar Jerikochea molla vatten nôd utorli.
14. Tea disa, Sorvesporan, Moizesak tachea ak’khea jivitant man dilolo tosoch Joshuak man diunchê khatir, Israelkaranchea dolleam mukhar taka vhodd kelo.
15. Sorvesporan Joshuak mhollem:
16. ‘Govaikechi arkpett vhortolea iadnikank Jordanantle bhair sorunk hukum’ ghal.’
17. Ani Joshuan iadnikank hukum’ dilo: ‘Jordanantle bhair sorat!’
18. Atam, Sorvesporachea korarachi arkpett vhortole iadnik Jordanantle voir iena fuddem ani tanchim panvlam sukhê zomnik tenkona borabor, Jordanachim udkam tanchê suater porot gelim ani adlê bhaxen lottan vhanvunk laglim.
19. Poilea mhoineachea dhavea disa, porza Jordanantli voir aili ani Jerikechê udentik, Gilgalachea mollar ravli.
20. Jordanantlean haddlole bara fator, Joshuan Gilgalant manddle.
21. Uprant tannem Israelitank mhollem: ‘He fator kosle? Fuddarak tumchim bhurgim aplea bapaink vichartit tedna tumi tankam oxi somzonni ditoleat:
22. Israelan paim-bhizoinastana Jordan nôd utorli. Kiteak Sorvespora
23. tumchea Devan ami poltôdd marisor Loveanchea Doriak kel’lem toxench tumi poltôdd marisor Sorvespora tumchea Devan Jordanachim udkam sukoilim.
24. Sogllê porjen Sorvesporacho hat kitlo bollixtt tem zanno zaunchê khatir ani sodanch Sorvespora tumchea Deva mukhar bhirantin aschê pasot, tannem toxem kelem.'
