1. Atam Israelitank lagun Jerikon aple darvontte dhampil’le; konn bhair sorlona, nhoi mhonn bhitôr gelo na.
2. Uprant Sorvesporan Joshuak mhollem: ‘Polle, Hanv Jerikek, tantuntlea bollvont mon’xank ani tachea razak tujê adhin kortam.
3. Sogllea zhuzareamnô, tumi xarak veddho ghalcho. Disak êk pautt xara bhonvtonnim vechem ani sov dis porian-hem chalu dovorchem.
4. Arkpetti mukhar sat iadnikamnim menddreachea xingacheô tutureô vhorcheô. Satvea disa tumi sat pautti xara bhonvtonim vechem ani iadnikamnim tutureô vazouncheô.
5. Jedna Menddreachea xingachi tuturi vazta tedna sogllê porjen êk vhodd zhuza-arodd marchi ani tedna thoinch xarachi vonnot konsllun poddtoli: uprant zonn eklean fuddem cholun vechem.’
6. Nunachea Puta Joshuan iadnikank apoun haddle ani mhollem: ‘Korarachi arkpett gheiat ani Sorvesporachê ark-petti mukhar sat iadnikank menddreachea xingacheô sat tutureô vhorum-di.’
7. Uprant tannem porjek mhollem: ‘Fuddem sorat! Xara bhonvtonnim bhonvdde marat ani Sorvesporachê arkpetti mukhar hatiaram gheun asloleank vochum-di.’
8. (Joshuan porjek dil’lea hukuma pormannem sogllem ghoddun ailem. Sorvespora mukhar, bokddeanchea xingacheô sat tutureô vhortole sat iadnik, tutureô vazoit fuddem sorle. Tanchê pattlean Sorvesporachea korarachi arkpett geli.
9. Choll-vollicho fuddari tuturi vazoitoleam mukhar gelo, pattlo rak'khonddar arkpetti pattlean ravlo. Lôk cholunk laglo; tutureô vazleô.
10. Joshuan porjek oso hukum’ dilo: ‘Zhuzachi arôdd marat oxem hanv sangi porian konnench zhuzachi arôdd marchi nhoi, tumchea onttantlean ekui utor bhair sorchem nhoi. To dis ietôch tumi zhuza arôdd marchi.’
11. Tannem arkpett xara bhonvtim êk pautt vocho-xi keli, Uprant tim tombunt gelim ani thoim tannim rat sarli.
12. Joshua sokallim fuddem utthlo ani iadnikamnim Sorvesporachi arkpett ghetli.
13. Sat menddreachea xingancheô tutureô vazoit sat iadnik Sorvesporachê arkpetti mukhar gele:chollvollicho fuddari tanchê mukhar ani pattlo rakhonddar Sorvesporachê arkpetti patllean cholot ravle, ani tuturechea avazar tim cholot ravlim.
14. Dusrea disa tannim xara bhonvtonnim êk bhonvaddo marlo ani aplea tombunt gelim, ani oxench sôv dis chol’lem.
15. Satvea disa tim fantear uttlim ani adlê bhaxen sat pautti xara bhonvtonnim tannim bhonvadde marle (Sat pautti bhonvadde maril’lo ho ekuch dis aslo)
16. Satvê pautt jedna iadnikamnim tutureô vazoileô, tedna Joshuan porjek mhollem: ‘Zhuzachi arôdd marat kiteak Sorvesporan tumkam xar dilam.
17. ‘Nisonttonachea xirapa tolla, xar ani tantunt asat tankam Sorvesporak vompun diunchem. Rahab naikininin, dhaddlolea sondexkarank lipoil’le tea khatir tichem ani tichea ghorant jietoleanchem jivit vattaunchem.
18. Axek lagun, xirapa tolla axil’lem kainch tumi kaddchem nhoi tea khatir tumi Nisonttonachea xirapachi chotrai dhôrat! Tem Israelacho tombu teach xirapa tolla ghaltolem ani tacher nisontton haddtolem.
19. Sogllem bhangar ani sogllem rupem, kanxeachem ani loknnachem kelam tem sogllem Sorvesporak bhettounchem ani tachê tizorint ghalchem.’
20. Tutureô vazleô tedna porjen zhuza arôdd marli. Tuturechea avazar tãnnim vhôdd zhuza arôdd marli tedna, thoinche-thoinch vonnot kosllun poddli. Sottasott zonn eklo fuddem gelo. Oso lôk xarant bhitôr sorlo ani tannim xar aplea tabeant kelem.
21. Xarant axil’lea dadleank ani bailank, tornatteank ani zantteank, boilank, menddreank ani gaddvank porian torsadin marun, tãnnim tancho sarkoch bhosm kelo.
22. Joshuan desachi sôdpus korunk dhaddlolea dogam mon’xank mhollem: ‘Naikinichea ghorant vochat ani tumi tika soput dilolea pormannem tika ani tichea vangdda axil’leank bhair haddat.’
23. Sôdpus korunk dhaddlole te torunn monis gele ani Rahabak, tichea pai, maim, bhanvddank ani tichea vangdda axil’leam borabor tika bhair haddli. Tãnnim tichea ghorannea-kui bhair haddlem ani tankam soglleank Israelachea tombu bhair surokxit zagear dovorlim.
24. Rupem, bhangar, kãxeacheô ani lokhonnacheô vostu bhairaun tannim xarak ani tachê bhitôr axil’lea soglleak uzo ghalo. Hem tannim Sorvesporachea ghorachê tizorent ghalem.
25. Punn Rahab naikinik, tichea Bapaichea ghoranneak, ani tichea vangdda jietoleank, Joshuan vattailim. Joshuan Jerikecho sôdpus korunk dhaddloleank lipoil’le tea khatir, aiz porian ti Israelant jieta.
26. Tea vellar Joshuan Sorvespora mukhar tankam oso soput gheunk lailo: Zo monis Sorvespora mukhar ubo ravta ani Jeriko xar novean bandta tacher xirap poddum. Tachea, malgoddea bhurgeacher to tachi buniad ghaltolo ni tachea dhakttea putacher to tache darvontte bandtolo.
27. Sorvespor Joshua borabor aslo ani tachem nanv ak’khea desant gazlem.
