1. Uprant Joshuan Reubenitank, Gaditank ani Manassechea ordea-kullak apoun haddle,
2. ani tankam mhollem: 'Sorvesporachea sevoka, Moizesan tumkam formail'lem titlem-i tumi pall'lem, ani hanvem-i dil'lê adniek tumi kan dilo.
3. Adim thaun atam porian, tumi tumchea bhavank sôddle nant, ani Sorvespora tumchea Devachê adniek tumi pallo dila.
4. Atam, Apnnem bhasailolem toxem, Sorvesporan tumchea bhavank xanti dilea; mhonnttôch, tumi, tumchea tombumnim ani Jordanchê peletoddi, Sorvesporachea sevoka, Moizesan tumkam dil'lea tumchea daizachea desant, porot vochat.
5. Punn, sogllea tumchea kallzan ani otmean Sorvespora tumchea Devacho mog korunk, Tachê vatten cholunk, Tacheô adnia pallunk ani Taka chikttun ravunk, Sorvesporachea sevoka, Moizesan dil'lea hukuma vixim chotrai dhôrat;'
6. Mhonnttôch, Joshuan tankam axrivad dilo ani tankam dhaddun dile; ani te aplea tombumnim gele.
7. Atam, Manassechea eka ordea kullak Moizesan Bashanant daiz dil'lem, punn dusrea ordea kullak Joshuan tanchea bhavam modekot Jordanachê ostomtê vatten daiz dil'lem; Joshuan hankam-i axirvad dilo ani tankam aplea tombunt patthoile.
8. Ani tanchê kodde uloun, tannem mhollem: 'Puskoll girestkai, subham gorvam, rupem, bhangar, tambem, lokhondd ani bhorpur kopdde gheun tumchea tombumnim porot vochat; tumchea dusmanam koddcho haddlolo lutticho mhal tumchea bhavam modem vanttat.'
9. Reubenachem, Gadachem ani Manassechem ordem kull porot gelem ani Kanaanachea Shilont thaun Israelkaram mukhavelem koddsorun, Sorvesporachê hukumê pormannem, Moizesan daiz koxem dil'lea ani aplea tabeant ghetlolea, Gileadachea desant gelem.
10. Jedna tim Kanaanant aslolê Jordanachê ximê-xim pavlim tedna Reubenitamnim, Gaditamnim ani Manassechea ordea-kullan, Jordana lagsar, dixtti poddo sarki, êk vhodd vedi ubarli.
11. Reubenitamnim, Gaditamnim ani Manassechea ordea-kullan, Kanaanak fuddo korun Jordanachê ximer, Israelitanchea vattara mukhar, êk vedi ubarlea' mhonn Israelitanchea kanar poddlem.
12. Israelan hem aikolem tedna, tanchê add zhuz manddunk, Israelkar Shilont zoma zalim.
13. Israelkaramnim, Gileadant Reubenitam-xim, Gaditam-xim ani Manassechea ordea-kulla-xim, Iadnik Eleazarachea puta Fineasak,
14. ani tachea dha odhikareank dhaddle; he odhikari, dôr eka kullantlo êk dhorun, vinchun kaddlole ani zonn-eklo aplea bapaichea ghoranneant Israelachea kullam modem fuddari aslo.
15. He soglle Reubenitam, Gaditam ani Manassechea ordea kulla-xim Gileadant aile ani tanchê kodde uloun tãnnim mhollem:
16. Sorvesporachi ak'khi sobha oxem mhonntta, Israelachea Deva add patok korun, tumi Sorvesporacho pattlav korpachem kiteak sôddlem? Êk vedi bandun tumi Sorvespora add kiteak kolpoleant?
17. Peorachea patkak lagun, Sorvesporachê porjecher ek sonkoxtt ailem; tantuntlim ami ozun nitoll zaunk nant!
18. Sorvespora sorxil'lim koddsorun vochun ani tacher kolpun tumi Israelachê ak'khê sobhecher Sorvesporacho rag choddum-so kortat?
19. Tumi tabeant ghetla to zago bhov povitr zalear, Sorvesporachi arkpett asa, tea Sorvesporachea desant vochun amchê borabor daiz vanttun gheiat. Punn, Sorvespora amchea Devachê vedi lagsar anink êk vedi bandun, Sorvespora add, nhoi mhonn amchê add kolpum nakat.
20. Zerachea puta Akanan, addvarlolem tem lipoun dovrun, patok kelem ani Sorvesporacho rag ak'khê Israel porjecher poddlo- hem tumi visorleat? Zorui tannem eklean vaitt kelem torui tachea guneanvak lagun dusreanchem-i nisontton zalem. '
21. Tedna Reubenitamnim, Gaditamnim ani Manassechea ordea kullan zap diun Israleachea ghoranneamchea fuddareank mhollem:
22. Sorvespor, devancho Dev! Sorvespor, devancho Dev! Taka sogllem thavem! Israelkarank to sot ugddapem korum. Ami Sorvesporacher kolpoleanv vô Tachê add geleanv zalear, aichea disa To amcho bhosm korum.
23. Sorvesporak patt vollunk, vô hulpail'lim vô xantichim bolidanam bhettounk, ami amchê khatir hi vedi ubarlea zalear, Sorvesporuch amchi nit korum.
24. Punn ami hi vedi eka kherit karonna khatir ubarlea. Fuddarak tumchim bhurgim amchea bhurgeank mhonnot Sorvespora, Israelachea Deva vixim tumkam koslo vantto asa?
25. Sorvesporan tumchê ani amchê modem Jordan nodi vorvim xim' ghalea. Tumkam, Reubenachea ani Gadachea bhurgeamnô, Sorvespora sovem kosloch vantto na. Oxem, tumchim bhurgim amchea bhurgeank Sorvesporachê bhirantin jieunk addvartolim.
26. Haka lagun ami chintlem Ami êk vedi bandum-ia; ulpail'lea bolidana khatir vô hom' bhettounchê khatir nhoi,
27. Punn amkam, Sorvespora mukhar ulpail'lim ani xantichim bolidanam bhettoun tachi seva korunk hok'k asa mhonn dak'khounk ti tumchê ani amchê modem Govaikechi khunna. Oxem fuddarak 'tumkam Sorvespora sovem kosloch vantto na mhonn tumchê pillgen amchê pillgek mhonnchem nhoi.
28. Haka lagun ami oxem mhollam. Tãnnim amkam vô fuddarak amchê pillgek kitem-i mhollear, ami tankam oso zobab ditoleanv 'Hulpail'lim bolidanam vô hom' bhettounk nhoi, punn tumchê ani amchê modem govaikechi khunna koxi, ho polleiat, amchea purvozamnim kel'lo, Sorvesporachê vedicho nomunno!
29. Sorvespora, amchea Devachê arkpetti mukhar aslolê vedi lagsar, ulpail'lim bolidanam, hom' vô xantichim bolidanam bhettounchê khatir anik êk vedi ubarun Sorvesporacher kolpunk ani Tachê sorxil'lim koddsorunk Dev nirmum naka.'
30. Jedna iadnik Fineasan, ani tachê borabor aslolea porjechea odhikareamnim ani Israelachea fuddareamnim, Reubenachea, Gadachea ani Manassechea putanchim utram aikolim, tedna tanchem somadhan zalem.
31. Tedna iadnik Fineasan, Reubenitank, Gaditank ani Manassechea ordea kullak oxem mhollem: 'Sorvespor amchê modem asa mhonn aiz amkam disun ailam kiteak tumi Sorvespora add gelim nant; tumi Israelitank Sorvesporachea krodantlim nivarlim.'
32. Ani Eleazaracho put iadnik Fineasani odhikari, Gileadachea desantle, Reubenitam ani Gaditam sorxil'le koddsorle ani Kanaanachea ganvant bhitôr sorun tãnnim Israelkarank hi khobor dili.
33. Hem aikun, Israelkaranchem somadhan zalem. Tãnnim Sorvesporak vakhann'lo. Toxench, Reubenit ani Gadit ravtale tea desant vochun tanchê add zhuz manddchem panvl tãnnim pattim ghetlem.
34. Ani Reubenitamnim ani Gaditamnim tê vedik Ed mhonn nanv dovorlem kiteak tãnnim mhollem 'Sorvespor Dev mhonn hi vedi amkam govai.'
