1. Joshua sokallim fuddem utthlo ani sogllea Israelkaram borim Shittim’ thaun bhair sorlo. Tim Jordan meren gelim ani nôd utorchê adim tãnnim thoim pennem kelem.
2. Tin disam uprant odhikareamnim mollar vochun lokak oso hukum’ dilo:
3. ‘Hê vatten tumi adim kednanch vochunk nant mhonnttôch, khoinchi vatt dhôrchi tem tumkam kollchê khatir, Levichea kullache iadnik Sorvespora tumchea Devachea korarachi arkpett gheun vetat tem tumi polletôch, tumi tumcho zago sôddcho ani tichê pattlean vechem.
4. Punn tumchê ani arkpetti modem, don hozar hat ontor dovrat. Tika chodd lagim vochum nakat.’
5. Joshuan porjek mhollem: ‘Tumi povitr zaiat kiteak faleam Sorvespor tumchê sovem ojapam kortolo.’
6. Uprant Joshuan iadnikank mhollem: ‘Korarachi arkpett gheiat ani porjê mukhar nôd utrat.’ Tannim Korarachi arkpett ghetli ani porjê mukhar cholunk lagle.
7. Sorvesporan Joshuak sanglem: ‘Aizuch sogllea Israelachea dolleam mukhar Hanv tuka vhôdd korunk suru kortam, oxem Moizesa sovem Hanv aslom toso tujê sovem Hanv astolo mhonn tankam kollon ietolem.
8. Korarachi arkpett vhortolea iadnikank oso hukum’ ghal: Jordanachê dhodder pavtôch tumi Jordanantuch ravat.’
9. Tedna Joshuan Israelachê porjek mhollem: ‘Lagim sorat ani Sorvespora tumchea Devachim utram aikat.’
10. Joshuan mhollem: ‘Jivo Dev tumchê modem asa ani tumchea dolleam mukhar To Kanaanitkarank, Hittitank, Hivitank, Perizzitank, Girghazitank, Amoritank ani Jebusitank pois kortolo mhonn kollun ietolem.
11. Polleiat, ak’khê prithumechea Sorvesporachea Korarachi arkpett tumchê fuddem Jordan nodint vechi asa.
12. Atam, Israelachea kullantle bara monis venchun kaddat, dôr-eka kullantlo êk monis.
13. Sorvesporachi, ak’khê prithumechea Dhoniachi arkpett gheun Iadnik Jordanachea udkamnim paim ghaltole tedna, Jordanachim voir thaun sokla vhanvtat tim udkam, doxim zatolim ani êk ras koxim zaun ubim ravtolim.’
14. Sanglolê pormannem Jordan nôd utrunk sogllo lôk aplea tombuntlo bhair sorlo tedna, porjê mukhar iadnikamnim korarachi arkpett vheli.
15. Arkpett vhortale te Jordana-xim pavtôch ani arkpett vhortale tea iadnikanche paim udkak lagtôch (lunvnnê pikachea somoiar Jordan bhoron ot’ta),
16. Voir thaun vhanvtalim tim udkam tharlim ani borim pois êk ras korun ubim ravlim, Zarethana lagim aslolea Adama xara lagim teach borabor Arabachea Doriak mhonngê Mittachea Doriant denvtolim udkam samkim doxim zalim.
17. Ani oxem Jeriko xarachea samkar porza utorli. Soglli Israel porza sukê zomnivelean utrot astana ani somest poltoddi pavo porian, Sorvesporachi arkpett vhortale te iadnik Jordana modench sukê zomnir ube ravle.
