1. Atam Joshua piraien vaddun mhataro zal’lo. Sorvesporan taka mhollem: '‘tum atam piraien vaddlai ani mhataro zalai; toripunn anink zaite vattar tunvem tabeant gheunche asat.
2. He vattar urlole asat: ‘Filistevkaranche soglle jil’le ani Geshuritkarancho ak’kho dês;
3. Ejiptak fuddo korun axil’lem Shihor tem Ut’torek aslolem Ekronho Kanaanitkarancho prant. Filistevkaranchea panch razanchim asonam Gaza, Ashdod, Ashkelon, Gath ani Ekron- hanga asat. Avitkar dok’kinik asat.
4. Kanaanitkarancho ak’kho prant ani Sidonikaranchea tabeant aslolem Mezrah. Amoritanchê ximer axil’lem Afekah.
5. Ani Gibleancho dês ani Hermon porvota ttolla aslolea Bal Gadd thaun Hamathachea kindda porian ak’khem Lebanon.
6. ‘Lebanona thaun Ostomtê vatten Misrefoth porian dongri vattarant vosti kortolea sogllea Sidonkarank hanchea dongrall pordesantlea Israelachea dolleam mukhar desa bhair uddoitolom. Hanvem tuka hukum’ ghala toso tunvem fokt ho dês daiz koxem vanttcho.
7. Nnov kullank ani Manassehchea ordea kullak ho dês daiz koxem vantt. Jordana thaun vorixtt Doria meren tunvem to tankam diuncho. Vorixtt Doria tanchi xim’ zatoli.’
8. Manassechea urlolea ordea kullak, Reubenitkarank ani Gaditkarank Jordana udenti vatten aslole prant, daiz koxem Sorvesporachea sevoka Moizesa koddlean mell’llam:
9. Arnon nodichê ximevelem Aroer, falkeam modem aslolo nogor ani Medeba tem Dibon porian moll.
10. Amonitanchê ximê porian Hesbonant raj choloitole Amoritanchea raza, Sihonachim sogllim xaram.
11. Ani Gilead, toxench Geshuritkarancho ani Maakatitkarancheô ximô, ak'kho Hermon porvot ani Saleka thaun ak'kho Bashancho prant.
12. Ani Bashanant pelvanantlo nimanno urlolea ani Ashtarath ani Edrei hancher raj choloitolea Ogachi soglli razvôttki Moizesan hancher akromonn korun tankam bhair uddoilole.
13. Tori Israelitkaramnim Geshuritkarank ani Maakathitkarank desa bhair kaddle nant. Geshur ani Maakah aiz porian Israelant vosti korun asat.
14. Fokt Levichea kullak daiz diunk na; taka sanglolem toxem Sorvespor, Israelacho Devuch, tachem daiz aslo.
15. Moizesan Reubenitanchea kullak, tanchea kullam pormannem vantto dilo.
16. Tancho pranth mhollear Arnon nodichem ximêvoilem Aroer ani Medeba porian falkeant aslolo nogôr, sopott vattarantlea sogllea nogram soit
17. Hesbon, Dibon. Bamoth-Baal, Beth-Baal-Meon,
18. Jahaz, Kedimoth, Mefaath,
19. Kiriathaim, Sibmah; Arabah ani Zerevh-Sahar hancheô dongurleô.
20. Beth-Peor, Pisgah Porvotachi Utornni, Beth-ha Jeshimoth,
21. sopott vattarantle soglle nogor ani Heshbonant raj choloitolea Amoritanchea raza Sihonachi ak'khi rajvôttki. Hea razak ani tachê borabor Midianachea kunvrak Evi, Rekem’, Zur, Hur, ani Reba, adim desant ravpi Sihonachea chakrank Moizesan marun uddoil’le.
22. Israelitkaramnim tolvarin marlolea lokam borabor Beorachea puta Balaam-ak marlolo. To parki aslo.
23. Jordan ani tache prant, Reubenitkaranchi xim’ thorli. Tanchea ghorannea pormannem, xaram ani ganvam soit- hem aslem Reubenachea putachem daiz.
24. Moizesan, Gadachea, kullak, Gadachea putank tanchea gothram pormannem vantto dil’lo.
25. Tancho prant mhollear Jazer, Gileadache soglle nogor, Rabbak fuddo korun aslolea Aroer thaun Amonitkarancho ordo dês.
26. Ani Hexbon tem Ramath-Mizzpeh ani Betonim’, Maharain thaun Lo-Debar prant porian.
27. Ani falkeant: Beth-Haram, Beth Nimrah, Sukoth ani Zafon, Heshbonachea Raza Sihonachi urloli razvôttki, Jordan, ani Jordanachê udenti vatten vhanvtolea Chinneroth Doriacho vattar.
28. Tanchea ghorannea pormannem nogram ani ganvam soit hem aslem Gadachea putanchem daiz.
29. Manassehchea ordea kullak Moizesan gothram pormannem vantto dil’lo.
30. Mahanaim’ thaun suru zaun tancho vattar mhollear, ak'khem Bashan, Bashanchea raza Ogachi ak'khi rajvôttki, Bashanant aslolea Jairache pennem korpache satt nogor.
31. Gileadachem ord, Ashtaroth ani Edrei, Bashanantlim Ogachim rajki xaram, Manassehchea Puta Makirachea putank mhonngê, Makirachea ordea ghoranneak gotram pormannem vanttun dile.
32. Oxem Moizesan, Moabachea mollar Jerikechea fuddlean aslolea udent Jordanant, daiz vanttun dilem.
33. Levichea kullak Moizesan daiz dilem na. Taka sanglolem toxem Sorvespor, Israelacho Dev tachem daiz aslem.
