1. Israelachi soglli sobha Shilont ektthaim zali ani thoim tãnnim Devachea Dorxonnacho tombu dovorlo. Ani ak'kho dês tanchê adhin aslo.
2. Ozunui, Israelkaram modem sat kullank tanchem daiz vanttunk naslem.
3. Ani Joshuan Israelkarank mhollem: ‘Sorvespora tumchea purvozanchea Devan tumkam dila to dês tumchea tabeant korunk kitlo mhonn vêll tumi ogddaitoleat?
4. Ak’khea desant vochun aplea daizachi sôdpus korunk dhaddchê pasot ani uprant mhojê-xim porot ieun mhaka soglli khobor diunchê khatir, dôr eka kullache teg monis venchun kaddat.
5. Uprant tãnnim zomnniche sat vantte korche; Dokin’nê vatten Juda zatoli tachi xim’ ani Ut’torê vatten Juzechem Ghor.
6. Sat bhagamnim tumi mhaka tachi bariksann diunchi ani sort ghalun, Sorvespora amchea Deva mukhar, hanv ti tumkam vanttun ditolom.
7. Punn Levichea kullak tumchê borabor vantto ascho na kiteak Sorvesporachem iadnikponn tachem daiz zatolem; toxench, Gad, Reuben ani Manassechea ordea kullak, Sorvesporachea sevoka Moizesan Jordanachê udenti vatten daiz dil’lem asa.’
8. Te monis utthle ani vattek lagle; Sôdpus korunk vetoleank Joshuan oxi adnia dili: ‘Vochat ani ak'khea desant bhonvun, tachi bariksann gheiat; magir, Sorvespora mukhar, tumchê khatir sorti ghalchê pasot, Shilont mhojê-xim porot ieiat.’
9. Te monis gele, ani ak'khea desant bhonvun, tachi bariksann ghetli ani sat bhagamnim, xaram pormannem, ti pustokar boroili ani uprant Shilont Joshua-xim te tombunt porot aile.
10. Uprant, Joshuan, Shilont, Sorvespora mukhar tanchê khatir sorti ghaleô ani Israelkarank, ap-aplea pongdda pormannem, dês vanttun dilo.
11. Poili sort, ghoranneam pormannem, Benjaminachea kullak poddli. Tanchi xim’; Judachea ani Juzechea putam mozgotim asli.
12. Ut’torê vatten tanchi xim’ Jordan thaun Jerikeachê ut’torê vatten pavtali, ostomtê vatten dongra vattarantlean vetali ani Bethaven oronneantlean bhair sortali.
13. Thoim thaun, xim’ Luza vatten, Luzachê dok’kini vatten, mhonngê, Bethelant vetali. Magir, ti Sokoilea Beth-Horonachê dok’kinik aslolea Atarothadar dongra velean denvtali.
14. Ostomtê vattechi xim’ dok’kini vatten ghunvun, Beth-Horona mukhar aslolea dongrar thaun Kiriathbaal, mhonngê, Kiriat-Jearim’, porian pavtali. Kiriathbaal Judachem xar aslem.
15. Dok’kinichi xim’, Kiriat-Jearimant suru zaun, ostomtê vatten Neftoahchê zhori-xim vetali.
16. Thoim thaun, xim’ Ben-Hinnom falkea mukhar, ut’torê vatten Pelvannachea falkeant aslolea dongrachê degevelean denvun, Jebusitanchê bazuk, dok’kini vatten Hinnom falkeant denvtali ani thoim thaun En-Rogel pavtali.
17. Ut’torê vatten ghunvun, ti Enshemesh geli ani thoim thaun Adummima mukhar aslolea Gelilotant pavli ani Reubenachea Puta, Bohanachê Fatraxim denvli;
18. ani Arabachê udenti vatten, Arabant pavli.
19. Thoim thaun xim’ ut’torê vatten Beth-Hoglant geli ani Mittachea Doriachea ut’torechê degek tenkun Jordanachê dok’kine degê meren tharli.
20. Udenti vatten Jordan tanchi xim’ zali. Hem Benjaminachea putanchem, tanchea ghorannea pormannem, daiz zalem.
21. Atam, ghorannea pormannem, him zaun aslim Benjaminachim xaram: Jeriko, Beth-Hogla, Keziz falkem,
22. Betharaba, Zemaraim’, Bethel,
23. Avim’, Para, Ofra,
24. Kefar-haammonai, Ofni, Gaba; sogllim mellun bara xaram ani tanche ganv.
25. Gibeon, Rama, Beerot,
26. Mizpe, Kepira, Moza,
27. Rekem’, Irpeel, Tarala,
28. Zela, Elef, Jebusi, mhonngê, Jerusalem, Gibeat ani Kiriat; Sogllim mellun chovda xaram ani tanche ganv. Hem zaun aslem, ghorannea pormannem, Benjaminachea putanchem daiz.
