1. Punn Israel porza Sorvesporak bhettoil’lea vostum vixim ovisvaxi zali. Judachea kullantlea Zerachea puta Zabdichea natvan ani Karmichea putan, Akanan, Sorvesporak bhettoil’lea vostuntlem kitem tori kaddun dovorlem ani Sorvesporacho rag Israelitancher choddlo.
2. ‘Voir vochat ani desachi sôdpus korat’ oxem mhonnun Joshuan Jeriko thaun Bethelchê udentek ani Bethaven lagsar axil’lea Ai xarant mon’xank dhaddle. Te gele ani Ai-chi sôdpus keli.
3. Joshua-xim portun ieun tãnnim mhollem: ‘Sogllê porjen voir vechi goroz na; don vô tin hozarank vochum di ani Ai-cher akromonn korum di. Sogllea lokak tras diunche nhoi, kiteak te thoddech asat.’
4. Porjê modle sumar tin hozar voir gele punn Ai-chea loka mukhar pollun gele.
5. Ai-chea mon’xamnim tanchê modlea sot’tis zannank marun xarachea darvonttea thaun Shebarim’ porian vhele ani thoinsorlê denvter tanche kuddke kele. Porjechim kallzam virun gelim ani udka bhaxen zalim.
6. Joshuan aplim angavlim pinzlim ani rat zaisor Sorvesporachê arkpetti mukhar to sorpôtt poddlo. Israelachea zantteamnim toxench kelem ani soglleamnim aplê tokler dhul’l ghali.
7. Ani Joshuan mhollem: ‘Ah Sorvespora Deva, amkam Amoritanchea tabeant korun, marun uddounchem aslem zalear, Tunvem hea raxttrak Jordana poltoddi haddunk kiteak thôkos ghetloi? Amkam tunvem Jordanachê dusrê vatten dovorlolim zalear odik borem zatolem aslem!
8. Mhaka bhogos Dhonia! Punn atam Israelan dusmanak patt voll’li tedna hanv kitem mhonnum?
9. Kanaanitkaram ani desant raupi sogllim hi khobor aikotolim. Amchê add zhuzun tim amchem nanv prithumevelem pusun uddoitolim. Uprant Tum, Tujea vortea Nanvachem kitem kortoloi?’
10. Sorvesporan Joshuak mhollem: ‘Utth! Tum oso kiteak sorpottun asai?
11. Israelan patok kelam. Hanvem tanchê kodde kel’lo korar tannim môddla. Nisonttonachea xirapa tolla axil’lem tem kaddchê khatir tim pois geleant; tannim tem chorlam, tannim tem lipoilam, tannim tem aplê khattlê-pottlent ghalam.
12. Haka lagun Israelitkar dusmana add ube ravunk xokonant. Haka lagun tãnnim dusmanank patt vôll’li kiteak tanninch apnnank nisonttonachea xirapa tolla ghali, Nisonttonachea xirapa tolla-veleô vostu tumi bhair uddoinant zalear, Hanv tumchê sangata anink aschom na.’
13. ‘Utth, lokank Povitr kôr ani sang Faleam tumkanch povitr korun gheiat, kiteak Sorvespor Israelacho Dev mhonnta: Atam, Nisonttonacho xirap tujer poddla. Israela, Nisonttonachea xirapa tolla ghatil’lea vostuntlem tukach mekllem korisor tum dusmana add ubem ravonk xokchem na.
14. Tea khatir, faleam sokallim, kullankull, tumi fuddem ietoleat. Uprant Sorvespor sort ghalun vinchun kaddta tem kull, pongddan-pongôdd, fuddem sortolem; ani sort ghalun Sorvespor vinchun kaddta to pongôdd, kuttumban-kuttumb fuddem sortolo, ani sort ghalun Sorvespor vinchun kaddta tem kuttumb mon’xan-monis fuddem sortolo ani
15. nisonttonachea xirapa tolla ghatil’lê vostu vixim sort ghalun dak'kholl kel’lea mon’xak, ani sogllea tachea daizak, Sorvesporacho korar môddla ani Israelachem nanv ghannailam tea khatir, tujea suvadhin kortolo.
16. Joshua sokallim fuddem utthlo; Tannem Israelak kullan-kull fuddem ie-xem kelem ani sort Judasachea kullak poddli.
17. Tannem Judachea pongddank apoile ani sort Zerachea pongddak poddli. Tannem Zerachea pongddank, kuttumban-kuttumb apoilo ani sort Zabdik poddli.
18. Uprant Joshuan Zabdichea Kuttumbak, mon’xan-monis apoilem ani sort Judasachea kullantlea Zerachea puta, Zabdichea natvak ani Karmichea putak Akanak poddli.
19. Uprant Joshuan Akanak mhollem: ‘Mhojea Puta; Sorvespora Israelachea Devak mhoima di ani guneanv kelo mhonn mandun ghe. Tunvem kitem kelam tem mhaka sang ani mhaka kainch lipoum naka.’
20. Akanan Joshuak zap dili: ‘khoreannich Hanv, Sorvespora Israelachea Deva add, patok kelolo monis ani hanvem oxem oxem kelam.
21. Malant hanvem Shinarchem nazuk vostr, rupeache don'xim shekel ani pon’nas shekel vozon axil’lo bhangaracho vitto hanvem pollelo; mhoji axa vaddli ani hanvem tem kaddlem. Rupem mullak ghalun teô vostu mhojea tombunt hanvem purloleô asat.’
22. Joshuan mon’xank dhaddle, te tombunt gele ani mullak rupem ghalun tombunt lipoun dovorlolem vostr tankam mell’llem.
23. Tannim teô vostu ghetleô ani Joshua ani sogllea Israelitam-xim haddun, teô Sorvespora mukhar dovorleô.
24. Uprant Joshuan ani tachê borabor sogllea Israelan, Zerachea putak Akanak toxench tachem ak’khem rupem, vostr, bhangra fator, tachea put-dhuvank, tachea boilank-gaddvank, xelliank ani bokddeank ani soglli tachi aspôt ghetli ani tankam Akor falkeant vhelim.
25. Joshuan mhollem: ‘Tunvem amcher kiteak koxtt-upodre haddlei? Sorvespor aiz tujer-ui koxtt-upodre haddum.’ Ani sogllea Israelan taka fatraun marlo. Ani tankam fatraitôch, tãnnim tankam lhasun uddoile.
26. Tachê voir, tãnnim fatranchi êk vhôdd ras ubarli ani ti aiz porian asa. Uprant Sorvesporan aplo rag fattim ghetlo. Haka lagun tê suvatek aiz pasun Akorachem Falkem mhonn pachartat.
