1. Manassechea kullakui daiz aslem kiteak to Juzecho malgoddo ani Makir, Gileadacho bapui Manassecho malgoddo. To zhuzari aslo dekhun taka Gilead ani Bashan mell’lim.
2. Manassechea urlolea putank tanchea gotram pormannem vantto mell’lo: Abiezerachea putank, Helekachea putank, Asrielachea putank, Shekemachea putank, Heferanchea putank, Shemidachea putank; he asle Juzechea puta Manasseche dadlea lingache bhurge.
3. Manassecho put Makir, Makiracho put Gilead, Gileadacho put, Hefer, Heferacho put Zelofehad; Zelofehadak put nasle punn dhuvôch. Tanchim nanvam oxim: Mahlah, Noah, Hoglah, Milkah ani Tirzah.
4. Eleazar iadnika, Nunachea puta Joshua ani fuddaream-xim ieun tannim mhollem: ‘Amchea bhavam borabor amkam daiz diunk Sorvesporan Moizesak hukum’ ghatlolo.’ Sorvesporachê adniê pormannem, tankam tanchea bapaichea bhavam modekot daiz mell’llem.
5. Jordanachê pelê vatten asloleam Gilead ani Bashana bhair, Manassek anik dha vantte poddle.
6. Manassechea dhuvank tachea putam borabor daiz mell’lem. Manassechea dusrea putank Gilead mell’llem.
7. Manassechi xim’ Asher thaun Shekemak fuddo korun axil’lea Mikmethahant pavtali ani thoim thaun Tappuachê zhori lagsar axil’lea Jashibachea uzveak porian vetali.
8. Tappuacho prant Manassecho aslo, punn Manassechê ximer axil’lea Tappuacho odhikar Efraimachea put-dhuvank aslo.
9. Hachi xim’ Kanachê nôdi meren asli; Manassechea xara modem aslolim Efraimachim xaram, nodichê dokin’ni vatten aslim. Oxi, Manassechi xim’ nôdichê Ut’torê vatten vetali ani Doriant somptali.
10. Dok’kini vatten ticho odhikar Efraimak aslo ani Ut’torê vatten Manassek; Doria dogaimchi-i xim’ koxi dhôrun, ut’tor vatten Asher ani udenti vatten Issakar porian teô pavtaleô.
11. Issakar ani Asher hangasor Manassechem daiz aslem tem hem: Bethsean ani tache nogor; Ibleam’ ani tache nogor; Dor, tache nogor ani thoim vosti korpi; Endor tache nogor ani thoim vosti korpi; Taanak, tache nogor ani thoim vosti korpi; Megiddo, tache nogor ani thoim vosti korpi. Toxench Nafatacho tisro bhag.
12. Hea xaramnim vosti kortoleank Manasseche put dhanvddaunk xokle nant; oxem Kanaanitkaramnim thoim aplem pennem kel’lem.
13. Uprant Israelkar bollvont zale tedna, tannim Kanaanitkarank zhodd vaurak laile ani tankam desantle bhair dhanvddaile nant.
14. Tedna, Juzechea putamnim Joshuakodde uloun oxem mhollem: ‘Sorvesporan axirvad ghalun amchi sonkia itli vaddoilea astana-i, tunvem amkam daiz koxem, ekuch vantto kiteak dilai?’
15. Joshuan zap dili: ‘Tumchi sonkia vhodd asa zalear, ranachea vattarant vochat ani Perizitanchea ani Pelvannachea vattarant, tumkam zomin meklli korun gheiat; kiteak Efraimacho dongri vattar tumkam khub lhan!’
16. Juzechea putamnim Joshuak zap dili: ‘Dongri vattar amkam pavona; Tea bhair desachea mollar ravtolea Kanaanitkaram kodde toxench Betxean ani tache nogramnim ani Jezreelachea mollar ravtoleam kodde lokhonddache goddesvar asat.’
17. Juzechea, Efraimachea ani Manassechea ghorannea kodde uloun Joshuan mhollem: ‘Tumchi sonkia vhodd, toxench tumchem boll! Tumkam ekuch vantto ascho na.
18. Punn ak'kho dongor tumcho zatolo; to ran’vott zalear porian tumi to mekllo korcho ani tache pranth tumche zatole. Zorui Kanaanitkaram kodde lokhonddache goddesvar ani boll asat torui tumi tankam bhair ghaltoleat.’
