1. Hem sogllem Eleazar Iadnikan, Nunachea puta Joshuan ani Israelachea kullanchea kuttumbhachea vhoddilamnim, Kanaan desant Israelitank aplem daiz koxem dilem.
2. Sorvesporan Moizesa vorvim dil’lê adniê pormannem nnov kullank ani ordea kullak sort ghalun daiz vanttlem.
3. Tôr Moizesan Jordanchê poltoddi don kullank ani ordea kullak tanchem daiz vanttun dilolem, punn Levitank tannem kaim vanttun diunk na.
4. Juzechea putamnim, Manasseh ani Efraim him don kullam ghoddlolim dekhun Levitank desant kainch vantto mell’llo na. Tankam fokot raupak thodde nogor ani zonnavorank chorvak vhorpak, toxench tanchi aspôt dovorpak zomin dili.
5. Sorvesporan Moizesak dil’lê adniê pormannem Israelitamnim kelem ani ak'kho dês vanttun ghetlo.
6. Judache thodde put Gilgalant Joshua-xim aile ani Kenazz gotrantlea, Jefunneachea puta Kaleban Joshuak mhollem: ‘Devachea Mon’xa, tujê ani mhojê vixim Sorvesporan Kadesh-Barneant kitem mhonnlolem tem tum zannoi.
7. Sorvesporachea sevokan, Moizesan, mhaka Kadesh-Barnea thaun hea desachi sôdpus korunk dhaddlolo tedna hanv challis vorsancho aslom ani sogllea promannikponnan hanvem taka khobor dili.
8. Mhojê borabor ailolea bhavamnim lokak pattim ôddlo punn hanvem mat Sorvespora mhojea Devak soglleant pallo dilo.
9. Tea disa Moizesan oso soput dil’lo Khoreannich tunvem Sorvesporak tujea Devak soglleant pallo dilai tea khatir zo dês tum maddoitai to tujem ani tujea bhurgeanchem daiz zatolem.
10. Tedna thaun atam porian, Apnnem bhasailolem tea pormannem, Sorvesporan mhaka jivo dovorla. Israel porza oronneant asli tedna ponchê-challis (45) vorsam pattim Sorvesporan hem Moizesak sanglolem; ani atam hanv ponchaixim (85) vorsanchê piraiek pavlam.
11. Tedna Moizesan mhaka dhaddlolo toso aiz-ui hanv ghôtt asam, zhuzank vochunk ani ieunk tedna bhaxen hanv atam-i bollvont asam.
12. Tea disa jea vixim Sorvespor uloiloloto dongri vattar mhaka di. Thoim Anakim’ ani Vhodd kil’leanchim xaram asat- hachi khobor tunvem aikolea; punn Sorvesporan sanglem toxem Sorvespor mhojê sangata asazalear hanv tankam bhair ghaltolom.’
13. Joshuan Jefunnechea puta Kalebak axirvad dilo ani Hebron tachem daiz korun dilem.
14. Sorvespora Israelachea Devak soglleant pallo dil’lo dekhun Hebron aiz porian, Kenazz gotrantlea, Jefunneachea puta Kalebachem daiz koxem urlam.
15. Adlea kallar Hebronak Kiriath- Arba mhonnttale. Arba mhollear vhoddlo Anakim’. Ani zhuz na zaun desak xanti mell’li.
