1. Joshuan Israelachea sogllea kullank Shekem' ganvant ektthaim kelim; uprant tannem zannteank, fuddariank, nitidarank, ani Israelachea dhormxastriank apoile, ani te Deva mukhar aile.
2. Tedna Joshuan sogllea lokak mhollem: 'Sorvespor, Israelacho Dev, oxem sangta: Magam tumche purvoz Nodichê poltoddi jietale ani dusrea devanchi seva kortale.
3. Tantlo eklo Abrahamacho ani Nahoracho bapui, Tera. Tedna Abrahamak, tumchea purvozak, Nodichê poltoddi thaun Hanvem kaddlo ani Kanaan'karanchea sogllea desantlean vhelo. Tachi sonsôt Hanvem vaddoili ani taka Izak zolmo-so kelo;
4. Izakak Hanvem dog put, Jakob ani Esau, dile: Esauk daiz koxem Seircho dongri ganv Hanvem dilo. Jakob ani tache put Ejiptak gele.
5. Tedna Moizesak ani Aaronak Hanvem dhaddle ani thoim zaitim ojapam korun Hanvem Ejiptak piddapidd dili. Uprant thoinchim Hanvem tumkam bhair kaddlim.
6. Tumchea purvozank Hanvem Ejiptantlim kaddlim ani tumi Doria-xim pavlim; roth ani ghoddesvar gheun Tambddea Doria porian Ejiptkar tumchea purvozanchê pattik lagle.
7. Tedna tãnnim Sorvesporak ulo marlo ani Tannem tanchê ani Ejiptkaram modem ek dhatt mhurem poddo-xem kelem ani tankam girasunk doria tancher portilo. Ejiptant Hanvem kitem kelem tem tumcheanch dolleamnim tumi dekhlem. Uprant tumi lamb kall oronneant jielim.
8. Magir Jordanachê poltoddi ravtolea Amoritanchea desant Hanvem tumkam haddlim; tãnnim tumcher zhuz manddlem ani Hanvem tankam tumchê adhin kelim, ani tumchea dolleam mukhar tancho dês tumchea tabeant poddlo.
9. Tea uprant Balak, Ziforcho put, Moabacho raza, Israelacher zhuz korunk utthlo ani Balaamak, Beorachea putak, tumcher xirap ghalunk tannem apounk dhaddlo.
10. Punn Hanvem Balaamachem aikunk na; portench zalear, tannem tumcher axirvad ghalcho poddlo ani tachea hatantlim Hanvem tumkam vattailim.
11. Ani tumi Jordan nôd utrun Jerikek pavlim tedna, Amoritamnim, Perizitamnim, Kanaan'karamnim, Hititamnim, Gisgashitamnim, Hivitamnim ani Jebusitamnim kel'lem toxem, Jerikechea lokan tumcher zhuz manddlem, punn tumkam soglleank Hanvem tumchê adhin kelim.
12. Tumchê mukhar Hanvem ganjilank dhaddle ani tumi paunchê adim Amoritanchea dogam-i razank tãnnim dhanvddaile; hem kam' tumchê tolvarin vô tumchea bannan korunk na.
13. Hanvem tumkam êk dês dilo, punn tumi to kamais korunk na; ani tumi ravtat tim xaram tumi bandunk nant; tumi lavunk nant tea dakhanchea ani zoitunanchea molleantlim follam tumi khatat.
14. Atam tumi Devachem bhem dhôrat ani sopurnnaien ani visvaxiponnan Tachi seva korat; Nodichê poltoddi ani Ejiptant astana tumchea purvozamnim seva keli tea devank sôddun diat ani Sorvesporachi seva korat.
15. Punn Sorvesporachi seva korunk tumi toiar nant zalear, konnachi kortoleat tem aizuch venchun kaddat: Nodichê poltoddi tumchea purvozamnim seva keli tea devanchi, vô tumi atam jietat tea desantlea Amoritanchea devanchi. Punn hanv ani mhojem kuttumb Sorvesporachi seva kortoleanv.'
16. Porjen zobab dilo: 'Sorvesporak sôddun dusrea devanchi seva korunk amchea monant nanch!
17. Kiteak Sorvespora amchea Devanuch amkam ani amchea purvozank Ejiptachea desantlim, gulam'ponnachea ghorantlim, bhair kaddlim ani amchea dolleam mukhar vhoddlim ojapam kelim, ani ami choltaleanv tê vatter ani ami veg-vegllea lokam modlean vetana amkam samball'lim.
18. Tea bhair Sorvesporan amchea dolleam mukhar tea sogllea lokank ani hea desant jietalo tea Amorit lokak pois dhanvddaile; dekhun ami-i Sorvesporachi seva kortoleanv,kiteak to amcho Dev.'
19. Tedna Joshuan porjek mhollem: 'Tumchean Sorvesporachi seva korunk zaunchem na, kiteak To povitr Dev', tumche oprad ani patkam bhogxicho na toslo premaxecho Dev To.
20. Porkea devanchi seva korunk tumi Sorvesporak sôddxat zalear, tumkam itlem bholeponn dak'khoilea uprant To tumcher noxtt dhaddtolo ani tumcho nas kortolo.'
21. Porjen Joshuak zap dili: 'Na; ami Sorvesporachich seva kortoleanv.'
22. Tedna Joshuan porjek mhollem: 'Sorvesporachi seva korunk tumi Taka venchun kaddla mhonn tumich govai.' Tãnnim zobab dilo: 'Hôi, ami govai!'
23. Toxem zalear, tumchê modem asatt tea porkea devank patt korat ani tumchim kallzam Sorvesporak,I Israelachea Devak, diat!'
24. Porjen Joshuak zobab dilo: 'Sorvespora amchea Devachi seva korunk ami venchun kaddlam; ani Tacheach utrak ami pallo ditoleanv.'
25. Tea disa Joshuan porjê khatir êk korar kelo ani Shekem' ganvant tankam kaide ani nem' dile.
26. Joshuan him utram Devachê Somurtichea Pustokar boroilim. Tedna tannem êk vhôdd fatôr ghetli ani Sorvesporachea povitr zagear xindur rukha khal ti dovorli.
27. Ani Joshuan sogllê porjek mhollem: 'Polleiat, hi fatôr amcher add govai ditoli, kiteak Sorvesporan uloileant tim sogllim utram tinnem aikoleant; tumchea Devak tumi patt korxat zalear, hi fatôr tumcher add govai ditoli.'
28. Uprant Joshuan porjek dhaddun dili, ani zonn-eklo ap-aplea ganv-ghora portolo.
29. Hem sogott zalea uprant Joshua, Nunacho put, Sorvesporacho sevôk, melo; tedna taka ekxem-dha vorsam aslim.
30. Ani taka, Gaash dongrachê ut'torek aslolea, Efraimachea dongri mulkantlea, Timnath-Serant purlo; hem xar Joshuak daiz koxem dil'lem.
31. Joshuachea sogllea jivitant ani Joshua uprant porian jive uril'lea zantteanchem jivit bhôr, Israelan Sorvesporachi seva keli ani Sorvesporan Israela khatir kel'lim sogllim kortutvam tim kednach visorlim nant.
32. Ejipt thaun Israelan haddlolim Juzechim haddam Shekemant purlim; Ho zago Jakoban, Shekemachea bapai Hamorachea putam koddlo rupeachea xembor nanneank vikto ghetlolo ani to Juzechea putank daiz koxem mell'lem.
33. Uprant Eleazar, Aaronacho put melo ani taka Gibeant purlo; ho nogôr tachea puta Fineasacho; ani Efraimachea dongri mulkant, daiz koxem, taka dil'lo.
