Index

Lukas - Chapter 9

1. Jezun Bara Zannank ektthãi apoun haddle ani soglle devchar kaddunk, toxench piddarôg boro korunk, tankam podvi ani odhikar dilo.
2. Devachem Raj porgôtt korchê khatir ani vaittakarank borim korchê khatir,
3. Tannem tankam oxem sangun dhaddle: "Vattek danddo, poti, khann-jevonn, duddu, kãich vhoronakat; ani don angavlim tumchê kodde aschim nhoi.
4. Khõichea-i eka ghorant bhitôr sorxat, tê svatê vele bhair soro porian, thõich ravat.
5. Konn tumkam ghena zatit zalear, tea nograntle bhair sortana, tancher add govaiki diunchê khatir tumchea pãianchi dhul'l porian zhaddun uddoiat."
6. Mhonnttôch te bhair sorle ani veta thõi Xubhvortoman porgôttit ani piddevontank borim korit ganvanganv bhonvle.
7. Herod upraza ghòddtalem titlem-i aikun ghuspolo; kiteak kãi zannam Juanv mel'leantlo jivont zala, oxem mhonnot;
8. dusrim konn Elija novean dixtti poddla mhonnot; tori her konnkonn adleantlo konn-êk provadi jivo zala, oxem mhonnot.
9. Punn Herod mhonnunk laglo: "Juanv? Tachem xins hanvem tôr kaplem! Zachê vixim heô khobrô hanv aikotam, to konn tôr?" Ani Taka khaxa polleunk to axetalo.
10. Dhormdutamnim porot ieun, apnnem kel'lem titlem-i Jezuk sanglem; magir, ekvodde aschê khatir, Bethsaida mhonnlolea eka zagear To tankam gheun gelo.
11. Tem aikun lôk Tachê pattlean gelo ani Tannem tankam ievkar dilo. Devachea Rajea vixim To tanchê lagim uloilo ani jea konnank borim zaunchi goroz asli, tankam Tannem borim kelim.
12. Dis poddcho vêll zal'lo ani Bara Zannamnim lagim ieun Taka sanglem: "Lokak dhaddun di Ami hanga eksurê svater asanv. Mhonntôch tankam bhonvtonnchea nogramnim ani gramamnim vochun biradd sôdum-di ani apnnanchea jevnnakhannachem polleum-di."
13. Ani Tannem portipall kelo: "Tankam khaunk-jevunk tuminch diat." Punn tãnnim oxem mhollem: "Panch undde ani don maslliô kaddun, amchê lagim anink kãich na; ami vochun hea sogllea lokak puroxem jevonn viktem ghetlear bi zait!"
14. Kiteak sumar panch hozar dadle asle. Punn Tannem Aplea xisank sanglem: "Sumar pon'nas pon'nasanchea zomeam-zomeamnim tankam jevnnak bosoiat."
15. Tãnnim toxem kelem ani soglleank bosoilim.
16. Tednam Tannem, panch undde ani don maslliô hatant gheun ani sorgar dolle ubarun, tancher dhin'vasnnechem magnnem kelem; magir tanche kuddke kele ani lokak vanttunk To te xisam kodde diit aslo.
17. Sogllim jevlim ani dhadoxi zalim ani urlole kuddke-tukdde ektthãi korun tãnnim bara panttliô bhorleô.
18. Aplea xisam mukhar êk dis Jezu ekloch magnnem korun aslo. Tednam Tannem tankam vicharlem: "Lôk Mhaka konn-so dhôrta?"
19. Ani tãnnim oxi zap dili: "Kãi zannam Juanv Batist, dusrim konn Elija ani her konn-konn jivont zal'lo konn-êk adleantlo provadi."
20. Tannem vicharlem: "Punn tumi Mhaka konn mhonn dhôrtat?" Zobab diun Pedrun mhollem: Devacho Krist!"
21. Punn hem konnankuch sanginakat mhonn Jezun khoraien tankam adnia keli.
22. Tannem mhollem: "Mon'xachea Putan zaitem sõsunk zai: zannte, mukhel iadnik ani dhormxastri Taka bhairaitole ani jivexim martole, ani Dev Taka tisrea disa punorjivont kortolo. Hem sogott Tachê vixim Devachi khuxi."
23. Magir Tannem soglleam lagim uloun mhollem: "Konnank Mhozo pattlav korchi khuxi asa zait, tãnnim apnnanchêch khuxechi vatt sôddchi, dôr-disa aplo khuris ukôlcho ani Mhojê pattlean ieunchem.
24. Kiteak aplo jiv samballun dhôrunk sôdtat tim aplo jiv hogddaitolim, punn Mhojê khatir aplo jiv hogddaitat tim aplo jiv samballun dhôrtolim.
25. Mhonnttôch ak'kho sonvsar zôddit ani apnnachoch ibadd vô apnnachench ghorttann korit zalear, mon'xak koslo adav?
26. Tôr Mhoji ani Mhojea utranchi konnank loz disot zalear, Mon'xachea Putak-ui, Aplê ani Bapachê ani bhagevont dutanchê mhoimen ietolo tednam, tanchi loz distoli.
27. Hanv tumkam khorench sangtam, Devachem Raj dekhlea bogor morchim nant toslim kãi zannam hanga asat."
28. Hem uloun sumar atth dis zatôch, Pedruk, Juanvak ani Jakobak gheun Jezu magnnem korunk eka dongrar choddun gelo.
29. Magnnem korta astana, Tachea mukhamollachem rup bodòl'lem ani Tachi nhesônn loklokit, dhoviful zali.
30. Ovchituch dog dadle thõi hajir zale: te Tachê lagim uloitale. Te mhollear Moizes ani Elija.
31. Te mhoimen bhòrlole dixtti poddle ani koxê bhaxen Jezu Jeruzalea Aplem jivit sompadun vecho aslo tê vixim te gozal kortale.
32. Pedru ani tache sangati jemen zodd zal'le, punn te zagech ravle ani Tachi mhoima tãnnim polleli ani Tachê borabôr ube aslole tea dogank-ui dekhle.
33. He Jezu sorxile koddsorun vetale tednam, Pedrun Taka mhollem: "Guruji, ami hangasoruch ravlear borem! Mhonnttôch tin tombu tãnnum-ia: êk Tuka, êk Moizesak ani êk Elija." Apunn kitem mhonntta tem toch nokllo aslo.
34. Oxem to uloita thõich astana, ek kup ailem ani kupan tancher savlli ghali, ani tea kupant rigtôch xis bhiele.
35. Ani kupantlo oso ho tallo aikunk ailo: "Ho Mhozo Put, Hanvem vinchun kaddlolo; Tachem aikat!"
36. Ani ho tallo gaztôch, Jezu ekvoddo tankam dixtti poddlo. Apnnem dekhlolem tê vixim tea disamnim xis ogech ravle ani tãnnim konnakuch kãi sanglem na.
37. Dusrea disa te dongra vele denvtastana khub lôk tankam mellunk ailo.
38. Ovchit lokachea zomeantlea eka mon'xan vhoddlean uloun mhollem: "Guruji, doia korun mhojea putak polle mhonn magtam: to mhozo ekloch put.
39. Ani, polle, devchar taka ghôtt dhôrta, okosmat killônch marta ani tonddantlean fenno kaddi-sôr taka foddfoddaita; ani bhurgeak boroch koxttainastana to sompeponnim bhair sorona.
40. Taka kaddun uddoiat mhonn hanvem Tujea xisam kodde maglem, punn tanchean nozo zalem."
41. Jezun portipallun mhollem: "Kosli mhonn bhavarth-nasloli ani khotti pinddka hi! Anink kitlo mhonn vêll tumchê sorxem Hanvem aschem ani tumkam Hanvem sôschim? Tujea putak hangasôr hadd."
42. Ani bhurgo lagim ieta thõich astana, devcharan taka foddfoddaun dhornnir apttilo. Punn Jezun mhellea atmeak bobatt korun bhurgeak boro kelo ani tachea bapaichê adhin dilo.
43. Devachi thorai polleun sogllim thottaklim.
44. Jezu kortalo titlea-i vixim soglleank ojap distalem tednam, Tannem Aplea xisank mhollem: "Tumche tumi him utram ghôtt monant dhôrat: Mon'xacho Put mon'xanchea hatant poddcho asa."
45. Punn Tannem sanglem tem te somzole nant, tôr tacho ôrth tankam mellcho nhoi mhonn tanchea gineanak tem lipon urlem; ani tea utra vixim Tachê lagim vicharunk-ui tankam bhem distalem.
46. Apnnam modem konn vhôdd zaittê vixim tanchê bhitôr êk vad upraslo.
47. Punn tanchea monant gholltalim tim chintna polleun, Jezun eka bhurgeak ghetlo ani, taka Aplê kuxik dovrun,
48. tankam mhollem: "Jim konn hea bhurgeak Mhojea nanvan ghetat, tim Mhaka ghetat; ani Mhaka ghetat tim Mhaka dhaddla Taka ghetat. Kiteak tumam-somestam modem zo konn odik lhan toch soglleam poros vhôdd."
49. Juanvan tondd ghalun mhollem: "Guruji, amchê sangatim Tuzo pattlav korinaslolea konn-ekleak Tujea nanvan devchar kaddta astana ami dekhlo ani taka ami mona kelo."
50. Ani Jezun taka mhollem: "Taka mona korinakat; kiteak tumcher add nant tim tumchea bhaga asat."
51. Jezuk sorgar ubarun vhorche dis bhoron ietale tednam, Tannem Jeruzaleak vechem mhonn Aplem mon thir kelem;
52. ani Apnna fuddem Tannem niropi dhaddle. Tachê pasot toiari korchê khatir te vochun Samariekaranchea eka ganvant bhitôr sorle.
53. Punn Jerusaleak vochunk Tannem tharail'lem dekhun, hãnnim Taka ievkar dilo na.
54. Tem polleun Tachea xisamnim, Jakoban ani Juanvan, vicharlem: "Tankam lasun uddounk hukum' ghalun sorga velo uzo ami denvoil'lo Tuka zai?"
55. Ani vollon Tannem tankam bobatt keli
56. ani te dusrea eka ganvant gele.
57. Tê vatten cholta astana konn-eklean Taka mhollem: "Tum vexi thõisor Tujê pattlean hanv-ui ietolom."
58. Jezun zap dili: "Koleank dholi ani varea velea suknneank nhidunk zage asat, punn Mon'xachea Putak Apli tokli tenkounk khõisoruch zago na."
59. Dusrea konn-ekleak Tannem mhollem: "Mhojê pattlean ie." Punn tea mon'xan oxem mhollem: "Poilo vochun hanvem mhojea bapaik matiek lavunk mhaka rojia di."
60. Punn Jezun taka zap dili: "Meleant tankam aplea mel'leank matiek lavum-di; punn tum voch ani Devachem Raj porgôtt kôr."
61. Anink eklean mhollem: "Saiba, hanv Tujê pattlean ietam, punn poilim mhaka mhojea ghorcheancho nirôp gheun ieum-di."
62. Taka Jezun sanglem: "Konn-ui nangrak hat ghalea uprant pattlean vollon polletit, tim Devachea Rajeak purtim nhoi."