1. Magir oxem zalem: eka Son'vara disa Farizevanchea konn-eklea mukheliager Jezu jevnnak gel'lo tednam, te Taka tellun polletale.
2. Udok angant bhoron suzlolo êk monis Tachea mureant aslo.
3. Dhormxastriam ani Farizevam lagim uloun Jezun mhollem: "Son'vara disa piddevontank borim korum-ieta ki na?"
4. Punn te ogech ravle. Tednam Tannem taka dhôrun boro kelo ani dhaddlo.
5. Ani tanchê lagim uloun Jezun mhollem: "Tumchea konnaicho put vô paddo bãit poddlo zalear, Son'var mhonnun rokddoch taka kaddinastana to ravot mum?"
6. Hea utrak zobab diunk tanchean nozo zalem.
7. Poile-voile zage koxê bhaxen vinchun kaddtale tem polleun, jevnnak apoil'leank Jezun oxi êk vopar sangli:
8. "Tuka lognachea jevnnak konn apoit tednam, vochun manachê svater bosum naka; kiteak tujê-vôn odik manadik dusrea konnak tannem ghoddiek apoila zait,
9. ani tumkam dogãik-ui apoileat to thõi ieun tuka mhonnot: 'Tuji svat haka di. Ani tednam, loz zaun, tunvem nimanni svat gheunchi poddot.
10. Dekhun konn tuka jevnnak apoit tednam, vochun nimannê svater bos; hê porim tuka apoila to iet tednam, taka oxem mhonnunk melltolem: 'Ixtta, voilê svater vochun bos.' Tednam borabôr jevnnak bosloleam hujir tuka manzatolo.
11. Kiteak apnnankuch unch kaddtat tankam Dev khala uddoitolo ani apunnuch khaltim zatat tankam Dev unch kaddtolo."
12. Ani Apnnak apoil'lo taka-i Jezun sanglem: "Tum donparchem vô ratchem jevonn ditai tednam, tujea ixttam-ixttinnink, vô bhavam-bhonnink, vô soireank, vô girest xezariank apoinaka, kiteak ghoddiek tim-i tuka porot apnnanger apoitit ani tujem apovnnem bad kortit.
13. Punn jevonn ditai tednam, dublleank, khoddiank, thontteank ani kudd'ddeank apoi.
14. Tanchean tujem apovnnem bad korunk zaina mhonnttôch, tum bhagi zatoloi; punn promannik mon'xam punorjivont zatolim tednam, tuji tuka mozuri melltoli."
15. Hem aikun, borabôr jevnnak bosloleantlea konn-eklean Jezuk mhollem: "Devachea Rajeant jevnnak bostit tim subhagi!"
16. Punn Jezun taka sanglem: "Konn-eklea mon'xan ek vhoddlem ratjevonn kelem ani zaitea lokak apoilo.
17. Ieiat, sogllem toiar zalam!', oxem apoil'leank vochun sangunk, jevnnacho vogôt zatôch, tannem aplea chakrak dhaddlo.
18. Punn sogllech eksarke nibam diunk lagle. Poilean chakrak mhollem: 'Hanvem bhatt viktem ghetlam, tem mhaka vochun polleunk zai; dekhun mhaka mafi kôr mhonn upkar magtam.'
19. Dusrean mhollem: 'Hanvem paddeanchim panch zotam viktim ghetleant, tim topasunk vetam; dekhun mafi kôr mhonn upkar magtam.'
20. Tisrean mhollem: 'Hanv halinch logn zalam, mhonnttôch mhaka ieunk zaina.'
21. Hem sogllem chakran porot ieun aplea dhoniak kollit kelem. Tednam pinddollun ghorkaran aplea chakrak sanglem: 'Nograchea rosteancher ani bidimnim vegim voch ani goribank, panglleank, kudd'ddeank ani thontteank hanga gheun ie.'
22. Magir chakran mhollem: 'Dhonia, tujea hukuma pormannem kelem; tori astana anink-ui svat asa.'
23. Ani dhonian chakrak sanglem: 'Nogra-bhailea rosteancher ani oddpam modem voch ani mhojem ghor bhòrta toxem lokak bhitôr ieunk boll kôr.
24. Hanv tumkam sangtam: apoil'leam bhitorlo eklo legun mhojem jevonn chakunk pavcho na.' "
25. Khub lokache zome Jezu borabôr choltale ani Tannem vollon tankam mhollem:
26. "Zôr konn-ui Mhojê-xim ietit ani aplea bapaicho, avoicho, bailecho, bhurgeancho, bhavancho ani bhoinnincho, ani aplea jivacho porian dvês korina zatit, tankam Mhojea xisam modem zago na.
27. Ani jim konn aplo khuris gheun Mhojê pattlean ienant, tankam Mhojea xisam modem zago na.
28. Tumchê bhitorlo konn-ui êk gopur bandunk sôdit zalear, to sompounk goroz titlo khôrch korunk apnna lagim zait ki na, hacho adim-poilo bosun odmas korcho na gai?
29. Na tôr, buniad marlea uprant, tem xarti pavounk taka tank na zait zalear, polletat titlim-i tacheô moskoriô korun mhonnttolim:
30. Hea mon'xan bandunk addailem, punn tachean sompounk nozo zalem.'
31. Vô konn raza dusrea eka razacher zhuz korunk vetolo zalear, dha hozar soinik gheun vis hozaranchi fouz haddta taka apnnachean fuddo korunk zata ki na, tem adim-poilem bosun chintina zait?
32. Zaina tôr, to poisuch astana, niropi dhaddun 'somadhanachi boli korum-ia' mhonn magtolo.
33. Têch bhaxen tumchê modlim konnui apnnam lagim asot titlem-i sôddun dina zatit zalear, tankam Mhojea xisam modem zago na.
34. "Mitt borem; punn mittachi kharsann bigòddli zalear, taka anink kitean portun kharsann diunchi?
35. Tem zomnik vô gairikui upkarona. Tem kaddun bhair uddoitat. Aikunk kan asloleamnim aikunchem."
