1. Hachê uprant provochon korit ani Devachea Rajeachem Xubhvortoman porgôttit Jezu eka-eka nograntlean ani ganvantlean vetalo. Tachê sangatim te Bara Zann asle,
2. ani zanchê voile Tannem devchar kaddlole ani zankam piddê-rogantleô Tannem boreô kel'leô kãi bailô; jichê vele sat devchar bhair sorlole Magdalen mhonnttat ti Maria;
3. ani Herodichea karbharia Kusachi potinn Juana, ani Suzana, ani sobar dusreô bailô. Teô duddu-addko môddun Tachi sevachakri kortaleô.
4. Dor-eka nogrant thaun lôk Jezu sorxem ietalo; oxem êk urpônz ektthãi zali tednam, Tannem vopar ghalun mhollem:
5. "Konn-eklo vomp'pi aplem bim vompunk gelo. Vomptana thoddem bim vatter poddlem ani lokan tem maddoilem ani mollba velea suknneamnim ieun tem khelem.
6. Ani dusrem khoddpacher poddlem; tem kirlolem, punn xêll nasli dekhun suklem.
7. Her kantteam modem poddlem, ani kantte borabôr vaddle ani tãnnim tem damun dhôrlem.
8. Her borê zomnir poddlem; ani kirlon xembôrpott taka pik zalem." Ani vhoddlean arddun Tannem mhollem: "Aikunk kan asloleamnim hem aikunchem."
9. Tachea xisamnim hê voparicho ôrth Tachê kodde vicharlo;
10. ani Tannem mhollem: "Devachea Rajeache gutt vollkhunk tumkam dil'lem asa; punn herank te voparimninch sangpache, kiteak 'tim dolleamnim polletat, punn tankam disona, kanamnim aikotat, punn tankam somzona.'
11. Tôr voparichi somzonni hi: bim Devachem Utor.
12. Vatter asat tim, tem aikotat tim; punn magir, tãnnim bhavarth dhôrina zaunk ani soddvônn zôddina zaunk, devchar ieta ani tanchea kallzantlem Utor kaddun vhorta.
13. Khoddpacher asat tim, Utor aikun tem khuxalkaien manun ghetat tim; punn tankam pallam nant dekhun, tim thoddoch vêll bhavarth dhôrtat ani porikxecho vogôt pavtôch, tim fattim sortat.
14. Kantteam modem poddlam tem, Utor aikotat tim; punn vetam-vetam jivachea dhastink ani girestkaiank ani mouzank lagun tim damun urtat ani pik diunk pavonant.
15. Borê zomnir poddlam tem, borea ani udar kallzan Utor aikun tem samballtat ani aplê thiraiek lagun pik ditat tim.
16. Ponntti pettoun konnuch ti êkê pailê pondak lipoina, vô bajê tolla dovrina, punn bhitôr ietat titleamnim uzvadd polleunchê khatir ti eka peddar dovortat.
17. Kiteak xekim uktem zaunchem na toslem atam kãich na liplolem; nhoi mhonn kollchem na vô uzvadda ieunchem na toslem atam kãich na gupit.
18. Mhonnttôch tumi koxem aikotat tê vixim chotrai dhôrat; kiteak asa tankam Dev odik-ui ditolo, ani na tanchê lagchem, jem asa mhonn tim somzotat, tem-i Dev kaddun ghetolo."
19. Jezuk mellunk Tachi avoi ani Tachim bhavbhoinn pavun sorlim. Lokachi khêtt asli dekhun, Tachê sorxem tankam lagim ieunk zainaslem.
20. Konnem Taka oxem sanglem: "Tuji avoi ani Tujim bhavbhoinn bhair ravleant ani Tuka polleunk sôdtat."
21. Punn Tannem zap diun mhollem: "Devachem utor aikotat ani palltat tim Mhoji avoi ani Mhojim bhavbhoinn."
22. Êk dis Jezu ani Tache xis eka hoddear choddle ani Tannem tankam sanglem: "Poltoddi ia". Ani to vochunk laglo;
23. ani te tanddun vetana Jezuk nhid poddli. Tednam doriant ek vadoll-modd upraslem ani udok bhoron te sonkoxttant poddle.
24. Tea vellar Tachê sorxem ieun tãnnim Taka zago kelo ani mhollem: "Guruji, Guruji, ami mortanv!" Ani utthun, vareak ani uchamboll lharank Tannem bexttailim; ani tim thamblim ani thonnddai zali.
25. Ani Tannem tankam mhollem: "Khõi pavlo tumcho bhavarth?" Bhieun ani ojap zaun te eka-mekak mhonnttale: "Ho konn zait tôr?! Kiteak vareak ani doriak To hukum' ghalta ani te Tachem aikotat!"
26. Ani Galileia samkar astea Gerazenanchea mulkant te khaddik pavle.
27. Jezu dodder denvlo tednam, devchar boslolo tea nograntlo konn-êk monis Taka mellunk ailo; zaito kall to angak kãich ghalinaslo, ani ghorant nhoi, punn somadhim modem biradd korun astalo.
28. Jezuk pollena fuddem tannem killônch marli ani, Tachea pãiam poddun, mottea tallean mhollem: "Jezu, Bhov Vortea Devachea Puta, mhojê kodde Tuka koslem kam' asa? Mhaka dogdainaka mhonn Tujê lagim poratun magtam."
29. Kiteak tea mon'xa velo bhair sor mhonn Jezu tea mhellea atmeak hukum' ghaltalo. Tôr zaitê pavtti devchar taka zôpt kortalo; dekhun khoddea-sankllimnim taka bandun dovortale; punn devchar, bandpas toddun, taka eksurea zageancher dhanvddaun vhortalo.
30. Jezun taka vicharlem: "Tujem nanv kitem?" Tannem zap dili: "Loskor!", kiteak sobar devchar tachê bhitôr riglole.
31. Ani apnnank patallant vochunk lainaka mhonn te Tachê lagim magtale.
32. Tednam thõi dongrar khub dukrancho êk hindd chortalo. Apnnank tea dukramnim vochun rigum-di mhonn tãnnim Tachê kodde maglem ani Tannem tankam vochunk dilem.
33. Devchar mon'xantle bhair sorun dukramnim rigle; ani vhôdd nettan vochun kollsa velean doriant xevtton to hindd buddun melo.
34. Ghòddlolem polleun rakhnne pollun gele ani nogrant ani kheddea-ganvamnim tãnnim hi khobor kollit keli.
35. Ani lôk kitem zalam tem polleunk bhair sorun Jezu-xim ie zalear, zachê vele devchar bhair sorlole to monis angavlim nheslolo, toklen sarko zal'lo, Jezuchea pãiam-xim boslolo tankam mell'lo; ani tim ghaborlim.
36. Devchar bosloleak Tannem koso boro kelo tem khaxa dekhloleamnim herank sanglem.
37. Tednam thõicho bhair sorun voch mhonn Gerazenanchea mulkantlo sogllo lôk Jezuk poratunk laglo, kiteak tankam motti bhirant lagloli. Dekhun eka hoddear choddun To porot ailo.
38. Zachê vele devchar bhair sorlole, to monis apnnak Tachê borabôr ravum-di mhonn Jezu lagim magtalo; punn Jezun taka oxem sangun dhaddlo:
39. "Tujea ghora voch ani Devan tujê khatir kelam titlem-i herank sang." Mhonnttôch apnna khatir Jezun kel'lem titlem-i tannem vochun nogor-bhôr lokak kollit kelem.
40. Jezu porot ailo tednam, lokan Taka ievkar dilo kiteak sogllim Tachi vatt polleun aslim.
41. Ani ovchit Jairus nanvancho eka devsthanacho odhikari ailo ani Jezuchea pãiam poddun apnnager ie mhonn Taka poratunk laglo,
42. kiteak bara vorsanchi tachi eklich dhuv mornnachê tonnir asli. Ani veta astana lôk Taka chênchtalo.
43. Tednam bara vorsam rogt-pat zal'li êk bail asli; sogllo aplo duddu voizank ghalun-ui konnacheach vokhdan ti bori zainasli.
44. Tea vellar Jezu pattlean ieun Tachea avoronnachê degek tinnem hat lailo ani tichem rogot vetalem tem rokddench thamblem.
45. Ani Jezun vicharlem: "Mhaka konnem hat lailo?" Apnnem lavunk na mhonn soglleamnim mhonnlea uprant, Pedrun mhollem: "Guruji, Tujê bhonvtim kitli gordi, ani sogllo lôk Tuka chênchta!"
46. Ani Jezun mhollem: "Konnem-i tori Mhaka hat laila, kiteak Mhojê bhitorlo êk gunn bhair sorla mhonn Mhaka koll'lam."
47. Apunn atam sampoddlich mhonn polleun, ti bail kampun aili, ani Tachea pãiam poddun apnnem kitea pasot Taka hat lailo ani koxi teach vellar apunn bori zali tem sogllea loka hujir tinnem sanglem.
48. Ani Tannem tika mhollem: "Dhuvê, tujea bhavarthan tuka bori keli. Xantin voch atam."
49. To uloita thõich astana, konn eklean devsthanachea odhikariager thaun ieun haka sanglem: "Tuji dhuv bhair poddli; Gurujik anink tras dinaka."
50. Punn Jezun hem aikun cheddvachea bapaik mhollem: "Bhieum naka. Bhavarth mat dhôr ani tem borem zatolem."
51. Ghora pavtôch, Pedru, Juanv ani Jakob ani cheddvacho avoi-bapui, hanchê bhair konnakuch Apnna borabôr bhitôr vochunk Tannem dilem na.
52. Sogllo lôk cheddva khatir roddtalo ani vilap kortalo; punn Jezun mhollem: "Roddum nakat; cheddum morunk na; tem nhidlam."
53. Ani lôk tem melam mhonn zanno aslo dekhun, Tacheô moskoriô korunk laglo.
54. Punn cheddvachea hatak dhôrun, Tannem mottea tallean mhollem: "Cheddva, utth!"
55. Ani tacho jiv porot ailo ani tem rokddench utthlem. Tednam taka kitem-i khaunk diat mhonn Jezun sanglem.
56. Cheddvacho avoi-bapui thottaklo; punn ghòddlam tem konnank sanginakat mhonn Jezun tankam adnia keli.
