1. Hi soglli Apli xikounn aikotolea lokak dilea uprant, Jezu Kapernauma gelo.
2. Konneklea xotpoticho chakôr, tachê kherit opurbaiecho, piddent poddun mornnachê tonnir pavlolo.
3. Jezuchi khobor aikotôch, tannem Judevanchea vhoddilank Tachê-xim dhaddle ani ieun aplea chakrak vattai mhonn maglem.
4. Ani Jezu-xim ieun, te Tachê lagim prarthun oxem magtale: "Tunvem tachê khatir hem korunk favo;
5. tôr to amchea lokacho môg korta ani tannench amkam devsthan bandun dilam."
6. Ani Jezu tanchê borabôr vochunk laglo. Ani To tachea ghora-xim pavunk zobôr pois naslo tednam, xotpotin aplea ixttank Jezuk oxem sangunk Tachê-xim dhaddle: "Saiba, tras ghenaka; tunvem mhojea ghora ieunk mhaka favona;
7. teach pasot hanv-ui khaxa Tujê-xim ieunk purto nhoi mhonn mhaka dislem. Ek utor mat sang ani mhozo chakôr boro zaum.
8. Tôr hanv-ui dusreachea hata khal aslolo monis ani mhojê khal soinik asat; ani tantlea ekak hanv 'voch' mhonnon zalear, to veta; ani dusreak 'ie' mhonnon zalear, to ieta; ani mhojea chakrak 'omkem kôr' mhonnon zalear to korta."
9. Hem aikun Jezuk tachem ojap dislem ani porton Apnna pattlean ietolea lokak Tannem mhollem: "Hanv tumkam sangtam: iedo vhoddlo bhavarth Hanvem Israelant porian polleunk na."
10. Ani dhaddlole monis ghora porot ie zalear, to chakôr boro za'llo tankam mell'llo.
11. Tachê magir oxem zalem: Jezu Nain mhonnlolea eka nogrant gelo ani Tachê borabôr vetale Tache xis ani khub lôk.
12. Nograchea darvonttea lagim pavtana, ovchit eka mel'leak purunk vhortalim; to aplê avoicho ekloch put aslo ani ti êk vidva; tichê sangatim nograntlo zaito lôk aslo.
13. Tika polletôch, tiche churchure korun Jezun tika mhollem: "Roddum naka."
14. Ani fuddem vochun Tannem tirddek hat lailo. Tirddi vhorpi thamble, ani Tannem mhollem: "Tornnattea, Hanv tuka sangtam, utth!"
15. Ani mel'lo to boslo ani ulounk laglo. Ani Jezun taka tachê avoichê adhin kelo.
16. Sogllim thottaklim ani Devachi tust korun mhonntalim: "Êk vhôdd provadi amchê modem upzola ani Dev Aplê porjek bhett diunk aila."
17. Ani hi Tachi khobor ak'khê Judeia sobhonvtim ganv-bhôr gazli.
18. Juanvanchea xisamnim hem sogllem taka sanglem ani Juanvan aplea xisantlea dogank apoun haddle
19. ani oxem vicharunk Somia-xim dhaddle: "Ieuncho asa to tunch, vô ami dusrea konnachi vatt polleunchi?"
20. Tea mon'xamnim ieun mhollem: " 'Ieuncho asa to tunch, vô ami dusrea konnachi vatt polleunchi?' oxem vicharunk Juanv Batistan amkam tujê-xim dhaddleat."
21. Teach vellar Tannem sobar zannank piddê-rogantlim, upodreantlim ani vaitt atmeanchea hatantlim soddoilim ani zaitea kudd'ddeank-ui nodor dili.
22. Ani zap diun Tannem mhollem: "Tumi pollelam ani aikolam tem vochun Juanvak sangat: kudd'ddim novean polleunk lagtat, thonttim cholunk lagtat, koddkaram nitoll zatat, bherim novean aikotat, mel'lim mon'xam jivont zatat, goribank Xubhvortoman porgôtt zata.
23. Ani Mhojê vixim zancho bhavarth halona tim mon'xam bhagi."
24. Ani Juanvache niropi gelea uprant, Jezu lokak Juanva vixim mhonnunk laglo: "Tumi kitem mhonn oronneant polleunk gel'leat? Varean halta-dolta tosli êk bet?
25. Na tôr, kitem mhonn tumi polleunk gel'leat? Nazukmov vostram nheslolo monis? Na. Vhodd molachim vostram nhestat ani dobajean jietat tim razvaddeamnim astat mhonn tumi zannont.
26. Mhonnttôch tumi kitem mhonn polleunk gel'leat? Eka provadiak? Hôi, ani to provadia poros vorto mhonn Hanv tumkam sangtam.
27. Ho polle, tujê mukhar Hanv Mhojea dutak dhaddtam ani to tuji vatt tujê fuddem toiar kortolo', zachê vixim Povitr Pustokar oxem boroil'lem asa to hoch.
28. Tumkam anink ek sangtam: bailank zal'lea sogllea bhurgeam bhitôr Juanv Batista poros vhôdd konn na. Toripunn Devachea Rajeant jim konn soglleam poros lhan, tim tachê-vôn vhodd.
29. Tachem aikol'lea sogllea lokan, toxench dônddvosuldaramnim ,Juanvachem snan gheun, Devachi manddavôll manun ghetli;
30. punn Farizevamnim ani dhormxastriamnim snan ghetlem na dekhun, apnnam vixim Devachi ievzônn tãnnim nirfôll keli.
31. "Konnank mhonn hê pinddkechea mon'xank Hanvem sôr korchi? Tim konnam sarkim?
32. Moidanar bosun ravlolea bhurgeam sarkim tim. Ap-aplea khella-pongoddachea vangddiank tim oxim ulo kortat: 'Ami tumkam nachpachim songitam vennuncher vazoilim, punn tumi nachlim nant'; 'Ami tumkam vilapachim gitam gailim, punn tumi roddlim nant.'
33. Tôr Juanv Batist jevonn-khann chakinastana ani soro pienastana ailo, ani tumi mhonnttat: 'Tacher devchar bosla.'
34. Mon'xacho Put jevun ani pieun ailo, ani tumi mhonnttat: 'Ho asa pottio ani bebdo, dônddvosuldarancho ani patkiancho ixtt.'
35. Tori Devachi zannvai vollkhun, tichim bhurgim tika sakxi ditat."
36. Farizevantlea konn-eklean apnnager jevnnak ie mhonn Jezu lagim maglem; ani tea Farizevager vochun To jevnnak boslo.
37. Ani tea nogrant vaitt nanvachi êk bail asli; To Farizevager jevnnak bosla mhonn aikun, ovchit ti chondrokanti aidonant pormollit tel gheun aili.
38. Tachea pãiam-xim ti fattlean ravli ani roddun-roddun aplea dukamnim Tache pãi bhizounk lagli; magir tinnem aplea kensamnim te pusun kaddle; ani tanche ume gheun-gheun, tankam ti tel lait asli.
39. Taka jevnnak apoil'lo to Farizêv hem polleun aplea monant oxem mhonnunk laglo: "Ho monis provadi zal'lo zalear, apnnak afuddta ti konn ani kosli bail ti to zanno zatolo aslo; kiteak ti êk patkinn."
40. Portipall korun Jezun taka mhollem: "Simanv, Hanvem tuka kitem ek sangchem asa." Ani tannem mhollem: "Sang, Guruji."
41. "Eka savkarak dog rinnkari asle; eklo pãixim dinar devo aslo ani dusro pon'nas.
42. Farik korunk tankam tank nasli dekhun, tannem dogãik-ui rinn bhôgxilem. Mhonnttôch dogantlea konnak tacho odik upkar astolo?"
43. Simanvan zap diun mhollem: "Odik bhôgxilam taka, oxem mhaka dista." Ani Tannem mhollem: "Sarkem sangleim tunvem."
44. Ani bailê vatten vollon Tannem Simanvak mhollem: "Tunvem hê bailek polleleai mum? Hanv tumger ailom, ani Mhoje pãi dhuunk tunvem udok dilem nãi; punn hinnem aplea dukamnim Mhoje pãi bhizoile ani te aplea kensamnim pusle.
45. Tunvem Mhozo umo ghetlo nãi; punn hi, ailea tê meren, Mhojea pãianche ume gheunuch asa.
46. Tunvem Mhojea matheak tel ghalem nãi; hinnem domdomit telan Mhoje pãi makhle.
47. Dekhun Hanv tuka sangtam: hinnem kel'lea zaitea patkanchem bhogsonnem tika mell'lem, oxem mhonn hicho kallzacho vhôdd dhin'vas dakhoun dita. Zankam thoddem bhôgxilam tim thoddo dhin'vas dakhoitat."
48. Ani Tannem tika mhollem: "Tujim patkam tuka bhògsolim."
49. Ani borabôr jevnnak boslole te apnnam bhitôr oxem mhonnunk lagle: "Patkam legit bhôgxita to konn ho?"
50. Punn Tannem bailek mhollem: "Tujea bhavarthan tuka taronn dilem. Xantin voch atam."
