1. Amchê modem zaleat tea ghòddnnianchi kotha boroun dovrunk zaite zann vavurleat;
2. survatek thaun teô ghòddnniô dekhlolea sakxidaramnim ani Sobdachea sevokamnim amkam sondêx dila tea pormannem tanchi kotha tãnnim boroun dovorlea.
3. Hem zanna zaun, mhojê-i pallien, tea sogllea ghòddnnianchi mhenotin chovkoxi kelea uprant, tich kotha tuka, xrêxtt Teofila, kroman boroun dovrunk hanvem ievjilem.
4. Jea ghòddnnianchi tuka xikovnn mell'llea, ti kitli khatrechi ti tuka tthavem zaunchê khatir, oxem korchem mhonn mhaka dislem.
5. Judeiacho raza Herod raj choloitalo tednam, Abiasachea vangddacho, Zakarias nanvacho, êk iadnik aslo; Elizabet nanvachi tachi potinn Aaronachê sonstechi asli.
6. Chukoinastana Sorvesporacheô soglleô adnia ani formavnniô pallun, dogam-i Devachê nodrê mukhar dhormvont aslim.
7. Tankam bhurgemball naslem, kiteak Elizabet vanztti asli ani dogam-i utar piraiek pavlolim.
8. Ani oxem ghòddlem: aplea vangddachê pallien Deva mukhar iadnikachi seva korta astana,
9. iadniki sevechê chali pormannem tacher sort poddloli dekhun, dhump zollounk to Sorvesporachea Povitr-Sthanant bhitôr gelo.
10. Dhump zollounchea vellar sogllo lôk bhair ravun magnnem kortalo.
11. Dhumpavedichê uzvê kuxik ubo aslolo Sorvesporacho êk dut taka dixtti poddlo.
12. Taka polleun, Zakarias ghaborlo ani tacher kampero denvlo.
13. Punn devdutan mhollem: "Zakarias, tum kampum naka; tujem magnnem Devan manun ghetlem. Elizabet tujê potinni thaun tuka êk bhurgo zolmotolo, ani Juanv mhonn tum taka nanv ditoloi.
14. Tum khuxal zaun murgott'toloi ani tachea zolman zaitim zannam khuxal zatolim;
15. tôr to Sorvespora mukhar vhôdd zatolo; soro ani lagrem kitench to pieuncho na; ani aplê avoichea kusveant thaun to Povitr Atmean bhòrtolo.
16. Israelachea zaitea putam-dhuvank Sorvespora tanchea Deva-xim to portun haddtolo.
17. Avoi-bapaichim ani tanchea bhurgeanchim kallzam ekameka thãi to vôllun haddtolo, fiturank to dhormvont mon'xanchi zannvai xikoitolo, ani oxem Sorvesporak purti êk porza toiar korchê khatir, to Tachê fuddem Elijachem mon ani boll gheun choltolo."
18. Zakariasan devdutak mhollem: "Hem khorem mhonn mhaka koxem gomtolem? Tôr hanv mhataro zalam ani mhoji potinn utar piraiek pavlea."
19. Devdutan zap diun mhollem: "Hanv Gabriel, Devachea fuddeant ubo asta to. Tujê kodde ulounk ani hi bori khobor tuka diunk mhaka Devan tujêxim dhaddla.
20. Polle, mhojea utrancher tunvem bhavarth dovrunk nãi mhonnun, heô vostu ghoddo porian tum mono urtoloi, tujean ulounk zaunchem na! Mhojim utram mat tanchea vellar pallon ietolim!"
21. Itlea mhonnosôr lôk Zakariasak ravtalo ani Povitr-Sthanant taka iedo uxir zalo mhonn polleun ojap zatalo.
22. To bhair ietôch, tanchê lagim ulounk tachean nozo zalem dekhun, Povitr-Sthanant ek dorxon taka mell'llam mhonn tim somzolim. To tankam fokot kurvô kortalo, ani monoch urlo.
23. Tache sevadhormache dis bhòrtôch, to porot aplea ghora gelo.
24. Thoddea disamnim Elizabet tachi potinn gorbhest zali, ani panch mhoine ti bhitôruch ravli.
25. Tinnem mhollem: "Sorvesporanuch hem kelem. Mhojer Apli doiall dixtt ghalun, mon'xam modem hanvem bhôglolo beman Tannem pois kelo."
26. Elizabetichea gorbhestponnachea sovea mhoineant Nazaret nanvachea Galileiantlea eka nogrant Devan Gabriel dutak
27. êkê soirik-zal'lê ankvari sorxim dhaddlo. Davidachea Ghoranneantlea eka dadlea lagim tichi soirik zal'li. Tea dadleachem nanv Juze aslem, ani ankvarichem nanv Maria.
28. Ti asli thõi vochun, devdutan mhollem:" Noman tuka, Devachê chôdd opurbaiechê! Sorvespor tujê sovem asa."
29. Hem tachem utor aikun, ti ekdom' ghaborli ani hem noman koslem zait tem chintunk poddli.
30. Punn devdutan tika mhollem: “Bhieum naka, Mariê! Tum Devachê opurbaiechi.
31. Aik! Tum gorbhest zatolii ani eka putak zolm ditolii, ani Jezu hem nanv Taka ditolii.
32. To vhôdd zatolo ani Bhov Vorto Dev Taka Aplo Put mhonnttolo, ani Tachea bapai Davidachem xinvason Sorvespor Dev Taka ditolo.
33. ani To Jakobachea Ghoranneacher sasnnachea sasnnak raj choloitolo, ani Tachem raj kednanch sompchem na."
34. Marien devdutak mhollem: "Mhaka dadlea lagim sombond na mhonnttôch, hem koxem ghòddtolem?"
35. Ani devdutan zap diun mhollem: "Povitr Atmo tujer ietolo ani Bhov Vortea Devachi xokti tujer savlli ghaltoli. Heach khatir tum zolm diunchi asai tea povitr bhurgeak Devacho Put mhonn Sorvespor nanv ditolo.
36. Ani polle, tujê soirê Elizabetin utar piraier eka putacho gorbh samball'la ani vanztti mhonnttalim ti atam sovea mhoineachi asa.
37. Kiteak Devachean zaina mhonnlolem kãich na."
38. Tednam Marien mhollem: "Hi asam hanv Sorvesporachi chakorn: zaum mhojê sovem tujea utra pormannem." Ani devdut tichê sorxilo koddsorlo.
39. Tea disamnim Maria utthli ani dongri vattarant, Judachea eka nogrant, doddvoddan geli;
40. ani Zakariasachea ghorant bhitôr sorun, tinnem Elizabetik noman kelem.
41. Elizabetin Mariechem noman aikona fuddem, tichea kusveant aslolea ballkan uddi marli ani Elizabet Povitr Atmean bhòrli.
42. Ani vhoddlea tallean udgarun tinnem mhollem: "Ostoriam modem subhagi tum, ani subhagi tujê kuxichem foll!
43. Ani mhojea Somiachi avoi mhojê-xim ieunchi mhonn mhaka khõichean favo zalem?
44. Tôr polle, tujea nomanacho sad mhojea kanar poddona fuddem, mhojea kusveant asa tea ballkan khuxalkaien uddi marli.
45. Ani Devan tuka sanglam tem purnntaien pallon ietolem mhonn tunvem bhavarth dhôrloi dekhun tum subhagi!"
46. Marien mhollem: "Mhozo otmo Sorvesporak vakhannta,
47. Deva mhojea Taroka khatir mhozo jiv murgott'ta!
48. Aplê chakornichê lhan'vikaiecher Tannem dixtt ghali: hôi, atanchean soglleô pinddka mhaka mhonnttolêo subhagi!
49. Mhojê khatir vhodd-vhodd vostu keleô Tannem: Sorvbollixtt To, Povitr Nanv Tachem!
50. Tachi bhokti kortoleank pavta pinddkechê pinddkent Tachi doia.
51. Aplea bavlleachi To xokti dakhoita, kallzant gorv dhôrtoleank duspottaita.
52. Podvedarank To sodram voile xevttita, hinn-holkeank unch ubarta.
53. Bhukel'leank To borea-borea denneamnim bhôrta, girestank rikamea hatamnim porot dhaddta.
54. Aplê kakluticho, Tannem ugddas kelo ani Israelak, Aplea chakrak, xeronna ghetlo."
55. Abrahama ani tachê sonsti khatir sorvkallak amchea purvozank dil'lea utracho,
56. Maria sumar tin mhoine Elizabetichea sangata ravli ani magir aplea ghora portoli.
57. Itlea mhonnosôr Elizabet porsutt zaunche dis pavle ani tika êk bhurgo zalo.
58. Devan tichê thãi vhôdd doia dakhoili mhonn aikun, tichim xeza-samarim ani soirim-dhairim tika porbim diunk laglim.
59. Atthvea disa ballkachi sunôt korunk ailim ani tachea bapaichea nanva pormanem Zakarias mhonn taka nanv diunk sôdtalim,
60. punn tachê avoin utor ghalun mhollem: "Na, taka Juanv mhonn nanv diunk zai."
61. Ani tãnnim tika sanglem: "Tujea gotrant tea nanvacho konnuch na."
62. Tednam taka kitem nanv diunchem kai mhonn tachea bapaichi khuxi sôdun kaddunk, tãnnim bapai kodde kurvô korun vicharlem.
63. Ani tannem folli magun gheun ticher boroilem: "Tachem nanv Juanv". Ani sogllim ojap zalim.
64. Teach vellar tachem tondd ugòddlem, tachi jib suttli ani Devachi tust korun to ulounk laglo.
65. Sogllim xezarim thottaklim ani Judeiachea ak'khea dongri mulkant heô ghòddnniô gaztaleô
66. ani aikotoleamnim teô aplea monant rigoun mhollem: "Ho bhurgo koslo utortolo-so tumkam dista?" Kiteak Sorvesporacho hat tachê sovem aslo.
67. Tacho bapui Zakarias, Povitr Atmean bhoron, oxem bhakit korun uloilo:
68. "Vakhann'nni Sorvesporak, Israelachea Devak! Kiteak Aplê porjek Tannem bhett dili, Tika sôddounk To ailo.
69. Aplea sevoka Davidachea Ghoranneantlo Tannem amchê khatir eka bollvont Tarokak upzoilo.
70. Amchea dusmanachea tabeantlim, ani amcho dvês dhôrtolea soglleanchea hatantlim Apunn amkam soddoitolo mhonn Aplea bhoktivont provadianchê tonddim magam thaun Tannem bhasail'lem.
72. Amchea purvozank apunn doia dakhoitolo ani aplea povitr koraracho ugddas kortolo mhonn Tannem sangun dovorlolem.
73. Amchea dusmananchea hattantlim sutton, bhiranti vinnem Tachi bhokti korunk Apunn amkam favo kortolo mhonn soput gheun Tannem amchea bapa Abrahamak utor dil'lem.
75. Oxem ami sogllea amchea jivitant Tachea fuddeant povitr ani promannik zaunk pavtoleanv mhonn bhas dil'li ti Tannem atam pall'li.
76. Ani tuka, ballka mhojea, Bhov Vortea Devacho. Provadi mhonn lôk pachartolo, kiteak tum Sorvesporacheô vattô toiar korunk Tachê fuddem vetoloi.
77. Patkanchem bhogsonnem dita tea taronnachi vollokh Tachê porjek tum ditoloi:
78. amchea doiall-maiall Devachea Kallzachem dennem hem. Amchê voir sorga velo êk Suria To ude-so kortolo ani amkam bhett diunk dhaddtolo.
79. Kallokhant ani mornnachê savllent jietoleank to Suria uzvadd ditolo ani amchim panvlam xantichea margar ghaltolo."
80. Ani bhurgo vaddtam-vaddtam bud'dhin ghôtt zait gelo. Israelak sobhêmazar dixtti poddosôr to oronneant ravtalo.
