1. Thoddea Galileikarank marun, Pilatan tanchem ani te bhettoitale tea bolianchem rogot ek kelem, tê vixim thõi aslolea kãi zannamnim teach vellar Jezuk khobor dili.
2. Ani portipall diun Tannem mhollem: "Oxem tãnnim bhôgchem poddlem dekhun, sogllea heram Galileikaram poros he Galileiache monis odik patki asle mhonn tumkam dista kitem?
3. Hanv tumkam sangtam: toxem nhoi! Punn tumi jivit bôdlina zaxat zalear, tumi-i toxench mortoleat.
4. Siloamacho gopur poddlo tednam jim otthra zannam morun gelim, tim Jeruzaleant ravtolea heram soglleam mon'xam poros odik guneanvkar aslim, oxem tumkam dista?
5. Hanv tumkam sangtam: toxem nhoi! Punn tumi jivit bôdlina zaxat zalear, tumi-i toxinch mortoleat."
6. Ani Tannem hi vopar sangli: "Konn-eklean aplea dakanchea molleant ek anjirachem zhadd lail'lem, ani to tachem foll sôdunk ailo tednam, taka kãi-ek mell'lem na.
7. Tednam tannem mollo vosoitoleak mhollem:' Polle, aiz tin vorsam zalim hanv hea anjirachem foll sôdunk ietam ani mhaka ek-ui mellona. Mhonnttôch tem katrun uddoi; bexttich kiteak svat addaita?'
8. Punn tannem oxi zap dili: 'Dhonia, hem-i ani ek voros tem asum-di; tachea mundak allem kaddun, taka hanv sarem ghaltam;
9. ghoddiek taka foll zait; na tôr, magir katôr.' "
10. Jezu, eka Son'vara disa, eka devsthanant xikovnn ditalo.
11. Ovchit Tachê mukhar dixtti poddli otthra vorsam devcharan opangull kel'li êk bail; ti samkich pongi zal'li ani tichean tokli uklun nitt ubi ravunk zainaslem.
12. Jezun tika polleli ani Apnna-xim tika apoun haddun mhollem: "Agê,tujea vaittantli tum suttlii."
13. Ani Tannem Aple hat ticher dovrina fuddem, ti sarki ubi zali ani Devak dhin'vasunk lagli.
14. Punn Jezun Son'vara disa pidda-rôg boro kelo dekhun, devsthanacho odhikari pinddollun oso lokak ulounk laglo: "Vavr korunk sô dis dil'le asat; tea disamnim ieiat ani borim zaun vochat, Son'vara disa naka."
15. Portipallun Somian taka mhollem: "Arê ddhongiamnô, tumchê bhitorlo zonn-eklo davnnek bandlolea paddeak vô gaddvak sôddun, taka Son'vara disa udkak vhorona?
16. Tôr otthra vorsam devcharan bandun dovorlolê hê Abrahamachê dhuvek hea Son'vara disa sôddchi nhoi asli?"
17. Oxem To mhonntta astana sogllea Tachea dusmanank loz zali, punn Tacheô ojapancheô kornniô polleun sogllea lokak motti khôs zali.
18. Ani Tannem mhollem: "Devachem Raj kitea sarkem mhonnchem? Khõichê vostuk Hanvem tachi sôr korchi?
19. Tem sansvachea bia sarkem. Eka mon'xan tem ghetlem ani aplea porsant roilem; tem vaddlem ani tachem vhodd zhadd zalem ani varea velea suknneamnim ieun tachea khandiamnim vosti keli."
20. Tannem anink ek sanglem: "Devachem Raj koslê vostuk sôr korum?
21. Tem oxem: êkê bailen khomir ghetlo ani, môll'lolea pittachim tin vhoddlim mapam dhôrun, tantum to purlo, ani sogllench pitt fuglem."
22. Dor-eka nogrant ani ganvant vochun, To xikovnn diit Jeruzaleachi vatt choltalo.
23. Tednam konn-eklean Tachê lagim vicharlem: "Saiba, soddvônn zôddunk pavtolim tim thoddinch kai?" Tannem tankam oxi zap dili:
24. "Oxir darvontteantlean bhitôr sorunk zata toxem vavrat, kiteak, Hanv tumkam sangtam, zaitim zannam bhitôr vochunk sôdtolim, punn tanchean zaunchem na.
25. Ghorachea Dhonian bhitôr vochun ekdam dar dhamplea uprant, tumi, bhair ravun, darar marun mhonnunk lagtoleat: 'Dhonia, amkam dar ugôdd.' Ani To tumkam oxem mhonnttolo: 'Tumi khõichim tim Hanv nokllom.'
26. Tednam tumi mhonnttoleat: 'Tujea murean ami jevleanv ani pieleanv ani amchea rosteancher Tunvem xikovnn dileai.'
27. Ani To tumkam sangtolo: 'Tumi khõichim tim Hanv nokllom; vaitt kortoleamnô, sogllim tumi Mhojê thaun pois sorat!'
28. Tednam Abraham', Izaak, Jakob ani somest provadi Devachea Rajeant aslole ani tumkam bhair uddoil'lim polleun, koxim mhonn tumi thõi rudon korun ani dant korkoraun astoleat!
29. Udenti, ostomtê, ut'tori ani dokhinnê thaun lôk ietolo ani Devachea Rajeant jevnnak bostolo.
30. Ani, polleiat, atam nimannim asat tim poilim zatolim ani poilim asat tim nimannim zatolim."
31. Têch ghoddier Farizevantle kãi zann Jezuk sangunk lagle: "Hangasorlo bhair sorun voch, tôr Herod tuzo jiv kaddunk sôdta."
32. Ani Tannem mhollem: "Vochat ani tea koleak oxem sangat: 'Chotrai dhôr, Hanv aiz ani faleam devchar kaddtam ani pidda-rôg boro kortam, ani tisrea disa Mhozo xevôtt zôddtolom.'
33. Toripunn aiz, faleam ani porvam Hanvem cholot ravunk zai, tôr Jeruzalea bhair morunk eka provadiak puttovna.
34. Jeruzalea, Jeruzalea, tum provadiank jivexim martai ani Devan tujê thãi dhaddloleank fatraitai! Kombi aplea pakotteam tolla aplea pilank korta toxem, kitlê pavtti mhonn tujea bhurgeam-ballank ektthãi korunk Hanv axetalom, punn tem tuka naka zalem!
35. Chotrai dhôr, tumchem ghor Dev tumkam sôddun dita. 'Sorvesporachea nanvan ieta taka zôi!' oxem tumi mhonncho vêll pavo-sôr tumi Mhaka anink polleunchim nant mhonn Hanv tumkam sangtam."
