1. Sodanch magnnem korchi goroz ani jiv sôddcho nhoi mhonn Jezun xisank hi vopar sangli:
2. "Eka nogrant konn-êk nitidar aslo; taka Devachi bhirant, nhoi mhonn mon'xachi bhidda-i nasli;
3. ani tea nogrant konn-ekli vidva-i asli. Tachê-xim ieun-ieun ti oxi magtali: 'Neai korun mhojea dusmanachea hatantli mhaka nivar.'
4. Punn zaito kall tannem tichemaikolem na. Tori magir tannem apnnach bhitôr mhollem:' Hanv Devak bhiena ani mon'xachi-i bhidda hanv dhorina khoro;
5. toripunn hi vidva mhaka tras dita dekhun, hanv tika neai korun ditolom; na zalear ieun-ieun xekim ti mhozo jiv khatoli.' "
6. Somian fuddem mhollem: "To khotto nitidar kitem sangta taka chit diat.
7. Tôr Dev Apnnak dis-rat ulo martolea Aplea vinchloleank sonsnnikaien kan diuncho na ani tancho neai korun tankam nivarcho na?
8. Hôi, Hanv tumkam sangtam, To tankam veginch nivartolo. Toripunn Mon'xacho Put ietolo tednam, Taka sonvsarant bhavarth melltolo kai?"
9. Apunn promannik mhonn somzun, apnnancheruch patietalim ani herank lekhinaslim toslea kãi mon'xank Tannem oxi êk vopar sangli:
10. "Dog monis, eklo Farizêv ani dusro dônddvosuldar, magnnem korunk Devmondirant choddun gele.
11. To Farizêv nitt ubo ravun oso aplea monant magnnem kortalo: 'Deva, hanv Tuka dhin'vastam, kiteak hanv heram mon'xam sarko nhoi; te chor-nagovnne, oneaii, pordvari; he-tea dônddvosuldara-i sarko nhoi hanv.
12. Satolleak don pavttim hanv upas kortam, mhojê kodde asa titleacho-i dhavo vantto farik kortam'.
13. To dônddvosuldar aplo pois ubo ravlo; dolle porian sorgar lavunk taka kalliz zaina zalem; punn horddem boddoun-boddoun to mhonnttalo: 'Deva, hanv êk patki! mhoji kaklut kôr!'
14. Hanv tumkam sangtam, ho monis Devak manovlolo zaun aplea ghora portolo, punn to dusro Devak manovlolo zaunk na. Kiteak apnnankuch unch kaddtat tankam Dev khala uddoitolo, apunnuch khaltim zatat tankam Dev unch kaddtolo."
15. Bhurgeam-ballank Jezun hat lavchê khatir lôk tankam-i Tachê-xim haddtalo; tem polleun xis tankam addaunk sôdtale.
16. Tednam Jezun tea bhurgeank Apnna-xim apoun mhollem: "Bhurgeank Mhojê-xim ieunk diat ani tankam addai nakat; kiteak Devachem Raj osleanchench.
17. Bhurgea bhaxen zaun Devachem Raj manun ghenant tim tantum bhitôr sorchinch na."
18. Odhikariantlea eklean Jezu lagim oxem vicharlem: "Borea Guruji, Sasnnik Jivit zôddun gheunk hanvem kitem korunk zai?"
19. Jezun taka mhollem: "Mhaka boro kiteak mhonnttai? Ekleach Devak kaddun, dusro konnuch boro nhoi.
20. Tum adnia tôr zannoi: 'Jivexim marum noiê; pordvar korum noiê; chorum noiê; lottik govai dium noiê; tujea bapaik ani avoik man di.' "
21. Tea mon'xan Taka zobab dilo: "Bhurgeponnim thaun hem sogllem hanv pallun ailam."
22. Hem aikun Jezun taka sanglem: "Anink ekuch tuka unnem: tujê kodde asa titlem-i vik ani duddu goribank di, ani tuka sorgar tthevo melltolo; magir ie ani Mhozo pattlav kôr."
23. Him utram aikun, to bhov khontovlo kiteak to khub girest aslo.
24. Oso taka polleun Jezun mhollem: "Girestkai asloleank Devachea Rajeant bhitôr sorunk kitlem mhonn kotthin!
25. Devachea Rajeant êk girest monis bhitôr sorchê poros, eka unttak suiechea bidd'ddeantlean vochunk odik sompem."
26. Aikotoleamnim mhollem: "Toxem zalear, konnak taronn melltolem?"
27. Tannem zap dili: "Jem mon'xam kodde ghoddona, tem Deva lagim ghòddta."
28. Tednam Pedrun mhollem: "Polle, ami sogllem sanddun Tuzo pattlav kela."
29. Jezun taka portipall kelo: "Konn-ui Devachea Rajea pasot ghor-dar vô bail, vô bhav-bhoinni, vô avoi-bapui vô bhurgim-ballam sanddtit zalear, Hanv tumkam khorench sangtam,
30. tim hea iugant hachê-kui zaitem ogllem, ani ieta tea iugant Sasnnik Jivit zôddtolim."
31. Bara Zannank kuxin gheun Jezun mhollem: "Ami atam Jeruzaleak choddun vetanv, ani Mon'xachea Puta sombondim provadiam udexim boroil'lem asa titlem-i sompadon ietolem.
32. Taka videxianchê adhin kortole, he Tacheô moskoriô kortole, Taka jerbond ditole, Tacher thimpi uddoitole,
33. ani jerbond dilea uprant Taka jivexim martole, ani tisrea disa To punorjivont zatolo."
34. Punn hantlem kãich te somzole nant ani hea utrancho ôrth tankam lipon urlo ani kitea vixim Jezu oxem uloitalo tem te somzukuch nant.
35. Jezu Jerikea lagim pavta astana, konn-eklo kudd'ddo rosteachê deger bhikek bosun aslo.
36. Khub lôk tevxilean veta tacho avaz aikun, tem kitem gai mhonn tannem vicharlem.
37. Nazaretkar Jezu tennem veta mhonn taka sangtôch,
38. to arddun mhonnunk laglo: "Jezu, Davidachea Puta, mhoji kaklut kôr!"
39. Ani fuddem vetalim tãnnim ogo rav mhonn taka bobatt keli. Punn odikuch arddun to mhonnott ravlo: "Davidachea Puta, mhoji kaklut kôr!"
40. Jezu thamblo ani taka Apnna-xim haddunk laun, to lagim sortôch, Tannem Tachê kodde vicharlem:
41. "Hanvem tuka kitem kel'lem zai? Tannem mhollem: "Saiba, mhaka novean nodor ie-xi kôr."
42. Jezun taka sanglem: "Novean nodor ghe. Tujea bhavarthan tuka boro kelo."
43. Ani rokddich taka nodor aili ani Devachi tust korit to Tachê pattlean gelo. Ani hem polleun, sogllea lokan Devak vakhannlo.
