1. Jezu, Jerikeant bhitôr sorun, nograntlean cholot vetalo.
2. Zakêv nanvacho mukhel dônddvosuldarantlo eklo ani astik monis ovchituch thõi pavlo.
3. Jezu konn to Zakêv polleunk sôdtalo. Punn angan mottvo dekhun, lokachê khettik lagun tachean nozo zalem.
4. Tea pasot Jezuk polleunchê khatir to fuddem dhanvun vochun eka rumbddichea zhaddar choddlo, kiteak Jezu tê vatten vecho aslo.
5. Tea zagear pavtôch, Jezun voir nodor marli ani taka polleun mhollem: "Zakêv, vegim denvun ie ,tôr aiz Mhaka tumger vochun ravunk zai."
6. Ani to vegim-vegim denvlo ani khuxalkaien Taka apnnager soniman kelo.
7. Hem polleun sogllea lokan gunngunnun mhollem: "Patki mon'xager ravunk gela mum rê ho!"
8. Soglleanchê nodrek ubo ravun Zakevan Somiak mhollem:" Saiba, polle, mhaka asa titleacho-i ordo vantto hanv goribank ditam, ani hanvem konnank fosoileant zalear chovpott portun ditam."
9. Jezun taka mhollem: "Aiz hea ghorak taronn ailem, kiteak ho-i Abrahamacho put.
10. Tôr Mon'xacho Put sanddloleank sôdun kaddunk ani taronn diunk aila."
11. Lôk hem aikota astana, Tannem anink êk vopar sangli, kiteak To Jeruzaleak lagim pavlolo ani Devachea Rajeachi veginch prokasnni zatoli mhonn tim somzotalim.
12. Mhonnttôch Tannem sanglem: "Konn-êk unch kulliecho monis apnnak raza korun gheun porot ieunchê khatir eka poixilea desant gelo.
13. Aplea dha sevokank apoun haddun, tankam tannem dha minam vanttun dilim ani mhollem: 'Hanv portun iesôr, him gheun veapar-dhondo korat!'
14. Tache ganvbhav taka zolltale ani tachê pattlean tãnnim niropi dhaddun oxem sanglem: 'Ho monis amcho raza zal'lo amkam naka."
15. Toripunn to raza zaun porot ailo, ani jea sevokank tannem duddu dil'lo, tantlea zonn-eklean kitlo-so veparacho adav kaddlo tem polleunk tannem tankam apounk laile.
16. Poilean ieun mhollem: 'Dhonia, tujea eka minan dha minam zôddlim.'
17. Tannem zobab dilo: 'Xabas, borea sevoka! ilê-xê vostunt tum visvaxi zaloi dekhun hanv tuka dha nograncher odhikar ditam.'
18. Ani dusrean ieun mhollem: 'Dhonia, tujea eka minan panch minam zôddlim.'
19. Ani haka-i tannem mhollem: 'Ani tuka hanv panch nograncher odhikar ditam.'
20. Magir tisrean ieun mhollem: 'Dhonia, tujem min hem polle asa; eka rumalak bandun hanvem tem kuxin dovorlolem;
21. kiteak mhaka tuji bhirant asli, tôr tum khôr monis; tunvem dovrunk nãi tem tum uklun vhortai ani tunvem vompunk nãi tem tum lunvun ubartai.'
22. Razan taka zap dili: 'Arê noxttea chakra, tujinch utram dhôrun tujer hanv khastichem formonn martam. Hanv khôr monis, hanvem dovrunk na tem hanv uklun vhortam, ani hanvem vompunk na tem hanv lunvun ubartam mhonn tum tôr zanno asloi.
23. Toxem zalear, mhozo duddu tunvem benkent kiteak ghalo nãi? Porot ieun kolantora soit hanv to ghetolom aslom.'
24. Ani thõi asloleank tannem sanglem: 'Hachê koddchem tem min kaddun gheiat ani dha minamasat taka tem diat.'
25. Ani tãnnim taka mhollem: 'Dhonia, tachê lagim dha minam asat mum!'
26. Tôr hanv tumkam sangtam: jea konna lagim asa, taka anink-ui melltolem; punn jea konna lagim na, tachê lagchem asa tem-i kann vetolem.
27. Punn hanv tancho raza zal'lom naka aslolea tea mhojea dusmanank hangasôr haddat ani mhojea dolleam hujir tancho jiv kaddat.' "
28. Oxem uloilea uprant, Jeruzaleak choddun vochpachi vatt dhôrun, Jezu fuddem gelo.
29. Ani oxem ghòddlem: Zoitunanchea mhonnttat tea Dongra sorxem astea Betfage ani Bethaniê lagim pavtôch, Tannem dogam Aplea xisank dhaddle
30. oxem sangun: "Tumchê samkar asatea gramant vochat; thõi bhitôr sortanch ek gaddvachem xingrum, tacher konnuch ozun porian bosunk na toslem, bandlolem tumkam melltolem; taka sôddat ani hanga haddat.
31. Taka kitea pasot tumi sôddtat?', oxem konn-ui tumkam vicharit zalear, Somiak tachi goroz asa mhonn taka sangat."
32. Dhaddlole te gele ani, sanglolem toxem, ek gaddvachem xingrum tankam mell'llem.
33. Tea xingrak te sôddtastana, tachea dhoniamnim tankam mhollem: "Tea xingrak kiteak sôddtat tumi?"
34. Tãnnim oxi zap dili: "Somiak tachi goroz dekhun."
35. Ani tãnnim taka Jezu-xim haddlem; aplim avoronnam tea xingracher ghalun, Jezuk tacher bosoilo.
36. To fuddem veta astana, lôk aplim vostram vatter patllaitalo.
37. Ani Zoitunanchea Dongrachê denvtê lagim pavtôch, Tachea xisancho vhôdd zomo, apnnem dekhlolea sogllea Tachea vismitam pasot, vhoddlea tallean, khuxalkaien Devak
38. oso porkondunk laglo: "Sorvesporachea nanvan ieta tea Razak zôi! Sorgar xanti! Bhov Vortea Devak mhoima!"
39. Loka modlea kãi Farizevamnim Taka mhollem: "Guruji, Tujea xisank bexttai."
40. Ani Tannem tankam oso portipall kelo: "Hanv tumkam sangtam: him ogim ravtit zalear, fator porian arddunk lagtole."
41. Ani lagim pavtam, Xar nodrek poddtôch, tachê voir dukam golloun
42. Tannem mhollem: "Aichea disa tori, tuka xantik pavoitoleô vattô tunvem mat vollkhun ghetloleôi zalear! Punn na; tujea dolleank teô atam liploleô asat.
43. Hôi, tuje dusman tujê bhonvtim matiechim durgam ubartole, tuka veddho ghaltole, ani sogllea vattamnim tuka chinrgôtt'tole, osle tujer dis ietole;
44. te tuka ani tujea kottam bhitôr aslolea tujea bhurgeam-ballank dhornnir apttitole; ani tujê bhitôr fatrar fatôr ubo urunk te diunche nant; kiteak Dev tuka bhett diunk ailo to dis tunvem vollkholo nãi!"
45. Ani Devmondirant bhitôr sorun thõi vikri kortoleank oxem mhonnun To bhair ghalunk laglo:
46. " 'Mhojem Ghor magnneachem ghor', oxem Povitr Pustokar boroil'lem asa, punn tachi tumi choranchi dhôl kelea."
47. Ani dispotto Devmondirant xikoit aslo. Mukhel iadnik, xastri, ani porjeche vhoddil Tacho nas korunk sôdtale;
48. punn kitem ani koxem korchem tem tankam somzoch naslem ,kiteak sogllo lôk Tachea utrank bhul'lolo.
