1. Dhormpettent aplem dan-dennem ghaltalim tea astik mon'xank Jezun chotraien pollelim;
2. ani konn-eklê gorib dolldirê vidvek-ui don lepton ghaltanaTannem dekhli
3. ani mhollem: "Hanv tumkam khorench sangtam, hê gorib vidven soglleam poros odik ghalem;
4. tôr hãnnim somestamnim apnnank ogllem aslem tantlem kaddun Devak somorpil'lea danam modem ghalem, punn hinnem apnnak unnem aslem tantlem, aplea jevnna-khannak nibel zaiaslem tem-i ghalem."
5. Devmondirachi gozal korun, tem kaiborea fatramnim ani angovnnanchea danamnim nettoilam, oxem mhonnttoleank Jezun sanglem:
6. "Tumi jem polletat, tacho fatrar fatôr ubo urcho na tosle dis ietole, tem samkem moddun uddoitole."
7. Tãnnim Tachê lagim vicharlem: "Guruji, hem kedna ghòddtolem ani hea ghòddnniancho vêll lagim pavla mhonn vollkhunk kosli khunna zatoli?"
8. Tannem mhollem: "Tumkam konnem fottoina zaunk chotraien ravat; tôr zaite zann Mhojea nanvan ieun 'Hanvuch to' ani 'kall lagim pavlo', oxem mhonnttole; tumi tanchê pattlean vochum nakat.
9. Tumi zhuzanchi ani bonddanchi khobor aikoxat tednam, akantum nakat; hem poilem ghoddonkuch zai khorem, punn xevôtt rokddoch ieuncho na."
10. Magir Tannem tankam sanglem: "Raxttracher raxttr ani rajeacher raj uprastolem;
11. hanga-thõi vhoddleô bhuimkampi zatoleô, hanga-thõi dukôll poddtolo, ani voxeachi pidda posortoli; ontrallar bhirankull ghòddnniô ani vhoddleô khunna dixtti poddtoleô.
12. Punn hem sogllem zaunchê adim, Mhojea nanva khatir tumchea angar hat ghaltolim, tumkam devsthananchê adhin korun, bondkhonnint ghalun, razam ani razpalanchea fuddeant ôddun vhorun, tumkam dhumallo ditolim.
13. Mhojê vixim govai diunk ho tumkam soêg melltolo.
14. Mhonnttôch tumchi rakhônn koxi korchi ti adinch-fuddem tumi chintchem nhoi mhonn ghott monan dhôrat.
15. Tôr Hanv tumkam oxi jib ani zannvai ditolom, ki ti addaunk ani ticher portem ulounk tumchea sogllea dusmanam kodde ghòddchem na.
16. Tumcho avoibapui, bhavbhoinn, soirim-dhairim, ixtt-mitr tumkam dhôrun ditolim ani tumchê bhitorlea kãi zannank jivexim martolim;
17. ani Mhojea nanva pasot sogllim tumcho dvês kortolim;
18. punn tumchea matheachea eka kensacho legun nas zauncho na.
19. Thir ravat, ani oxem khorem Jivit tumi zôddunk pavtoleat.
20. Jeruzaleak foujen veddho ghal'lo tumi polletoleat tednam tachem ghorttann pavlem mhonn somzat.
21. Tednam Judeiant asat tãnnim dongrancher pollun vechem ani Xarant asat tãnnim bhair sorun vechem, ani kheddea ganvamnim asat tãnnim Xara bhitôr vechem nhoi;
22. tôr sudd ghevpache dis he ani boroil'lem asa tem sogllem atam pallon ietolem.
23. Te dis ietôch gorbhest bailanchem ani ballkank dud ditoleanchem kotta! Desacher bhõikor attevitte ietole ani hê pinddkecher krodhachi xirôntt poddtoli
24. ani, videxiancho kall bhoro-sôr, tim torvarin moron poddtolim ani tankam koidi korun sogllea raxttram modem tanchi duspôtt zatoli ani videxi Jeruzaleak pãiam tolla mostitole.-
25. Suriacher, chondrimacher ani noketrancher khunna zatoleô. Somdir gorozta to aikun ani lharam uchamboll zaleant tim polleun, sonvsarar raxttram sarkinch ghabortolim ani tollmolltolim.
26. Prithumecher ieunchem asa tachea huskean kampun mon'xancho jiv vetolo virghun, tôr ontrallacheô xokti kolkoltoleô.
27. Tednam Mon'xacho Put podven ani vhoddlê mhoimen eka kupa modem ietana tim dekhtolim.
28. Hem ghoddonk suru zata tednam ghott ravat ani tumcheô tokliô uklun dhôrat, kiteak tumchi soddvonn lagim pavlea."
29. Ani Tannem êk vopar sangli: "Anjirachea zhaddak ani heram sogllea zhaddank polleiat.
30. Tankam kombriô futt'tat tednam gim' lagim pavla mhonn tumkam kollon ieta;
31. toxench heô soglleô vostu ghòddloleô tumi polletôch, Devachem Raj lagim pavla mmhonn zanno zaiat.
32. Hanv tumkam khorench sangtam: hem sogllem ghòddlea bogor hi pinddka ontorchi na.
33. Ontrall ani prithum' sortolim, punn Mhojim utram sorchim nant.
34. Tumi tumchi chotrai dhôrat; na tôr, kamcharak lobhdon, bebdikai korun, ani hea jivitache huske kaddun, tumchim kallzam zodd zatit ani to Dis tumcher okosmat pavot.
35. Ak'khê prithumer aslolea sogllea mon'xancher fas koso to ietolo.
36. Ieuncheô asat tea ghòddnniam modlean surokxitponnim fuddem vochunk ani Mon'xachea Puta mukhar bhiranti vinnem ubim ravunk tumkam ghottai mellchê khatir, sogllea vellar magnnem korun zagrut ravat."
37. Hea disamnim Jezu disbhôr Devmondirant xikovnn diit aslo, punn rati kaddtalo Xara bhair, Zoitunanchea mhonnlolea Dongrar.
38. Tachem utor aikunchê axen fantearuch utthun sogllo lôk Tachê-xim Devmondirant ietalo.
