1. Jezun Aplea xisank mhollem: "Bhavarth sôddun divpacheô tallnniô astoleôch; punn jea mon'xam udexim teô ietit, tanchem kotta!
2. Hea lhanantlea ekleak porian tãnnim bhavarth sôddunk ôddun vorchê adim, tankam golleak danteachem pedd bandun doriant uddoilim zalear, tankam odik borem zatolem.
3. Chotrai dhôrat: tuzo pelo tujer chuk korit tôr, taka xiddkai; ani to apli chuk vollkhun ghetit zalear, taka bhogôs.
4. Ani to tujer disak sat pavttim chuk korit ani sat pavttim tujê-xim porot ieun mhozo guneanv zalo, oxem mhonnott zalear, tunvem taka bhôgsuncho."
5. Dhormdutamnim Somiak mhollem: "Amcho bhavarth vaddoi."
6. Tednam Somian mhollem: "Sansvachea konnea itlo tumkam bhavarth asot zalear, 'umtton voch ani doriant rigun pallam sôdd', oxem hea amorichea zhaddak tumchean mhonnunk zatolem, ani tem tumchem aikotolem.
7. Tumchê modem konn-eka mon'xak êk chakôr asa mhonn somzat; xet kosun vô menddram choroun to chakôr porot ghora ieta tednam 'chol vegim ani jevnnak bos', oxem taka dhoni mhonnttolo kai? Hachê bodlek,
8. mhojem jevonn toiar kôr ani hanv kha-piesôr, penkttak kas marun' mezachem kam' kôr ani magir tum kha-pie', oxem to mhonncho na kai?
9. Apnnem sanglolim kamam chakran kelim dekhun dhoniak chakracho upkar astolo kai?
10. Toxench, tumkam sanglolem titlem-i kelea uprant, tumi-i mhonnatt: 'Chaltim-bexttim chakram ami; amcho kaido aslo toch ami pall'lla.' "
11. Jeruzaleak veta astana, Jezu Samariechê ani Galileiachê ximê velean cholot vetalo.
12. Eka ganvant bhitôr sortana, kodd futtlole dha zann Taka vatter mell'le; te pois ube ravle
13. ani, vhoddlean ulo marun, tãnnim mhollem: "Jezu, Guruji, amchi kaklut kôr!"
14. Tannem tankam polleun mhollem: "Vochat ani iadnikank tumchem ang dakhoiat." Ani thõi veta astananch te nitoll zale.
15. Tantlo eklo, apunn boro zalo mhonn dekhona fuddem, Devak vhoddlean vakhannit portun ailo,
16. ani Jezuchea pãiam-xim omto poddun tannem Tache abhar man'le; ani to êk Samariekar aslo.
17. Hem polleun Jezun taka oxem mhollem: "Dha-i zann nitoll zale, nhoi? Her nnov khõi pavle tôr?
18. Hea porkea mon'xa bhair porot ieun Devachi tokhnnai kortolo konnuch na zalo!"
19. Ani Tannem taka mhollem: "Utth ani voch; tujea bhavarthan tuka boro kelo."
20. Devachem Raj kedna ieunchem asa tem Farizevamnim Jezu lagim vicharlem tednam, Tannem oxi zap dili: "Nodrek poddtat toslea khunnamnim Devachem Raj ieunchem na.
21. Hem, polle, hanga asa; tem, polle, thõi asa', oxem lôk mhonncho na. Tôr zanno zaiat: Devachem Raj tumchê modem asa."
22. Ani Tannem Aplea xisank sanglem: "Mon'xachea Putacho êk dis tori polleunk tumi axetoleat toslo dis ietolo, punn tumkam to polleunk mellcho na.
23. Tednam konn tumkam sangtolo: 'Ho thõi polle!' vô 'Hangasor polle!' Bhair sorum nakat ani tanchê pattlean vochum nakat.
24. Zoxem zoglavnnem marta tednam, tacho loklôk ontrallachê êkê ximer thaun dusrê ximer porian poddta, toxench, Tacho Dis ieta tednam, Mon'xachea putachem zatolem.
25. Punn tea adim To zaitem sôstolo ani hi atanchi pinddka Taka bhairaitoli: hi Devachi khuxi.
26. Zoxem Noahchea kallar zalem, toxench Mon'xachea Putachea kallar zatolem.
27. Noah tarvant bhitôr sorlo to dis porian lôk khata-pietalo, logn zaun ani logn korun diun aslo; tea mhonnosôr Poriallo ailo ani tachê vorvim tim sogllim nattak zalim.
28. Ani zoxem Lotachea disamnim ghòddlem, toxench zatolem. Lôk khata-pietalo, viktalo ani viktem ghetalo, laita-roitalo ani ghoram bandtalo;
29. punn jea disa Lot Sodomantlo bhair sorlo, tea disa sorgar thaun ujea ani gondhokacho pavs poddun tachê vorvim soglleancho bhosm zalo.
30. Mon'xachea Putachi prokasovnniz atoli tea disa toxench zatolem.
31. To Dis ietôch konn pattsar astit ani tanchi mustaiki ghorant asot zalear, ti vhorunk tãnnim sokol ieunchem nhoi; toxench xetant astit tãnnim pattim vechem nhoi;
32. Lotachê bailek kitem ghòddlem tacho ugddas korat.
33. Aplo jiv samballunk sôdtat tim aplo jiv ibadd kortolim, ani aplo jiv ibadd kortat tim aplo jiv vanchoitolim.
34. Hanv tumkam sangtam: tê rati dogam zannam eka antrunnar nhidlolim astolim, punn tantlea ekleak vhortole ani dusreak sanddtole.
35. Dogi bailô eka dantear dollun astoleô, punn tantlê eklêk vhortole ani dusrêk sanddtole."
37. Tãnnim Jezu lagim vicharlem: "Saiba, khõi?" Ani Tannem tankam sanglem: "Moddem asot thõi gid-ui ektthovtole."
