1. Povitr Atmean bhôrlolo, Jezu Jordana thaun koddsorlo.
2. Taka oronneant vhorun, thõisor challis dis Povitr Atmo Taka hanga-thõi bhonvddaitalo ani devchar Taka naddit aslo. Tea disamnim Tannem kãich khelem na, ani te dis zatôch Taka bhuk lagli.
3. Devcharan taka mhollem: "Tum Devacho Put zalear, hea fatrak unddo zaunk adnia kôr."
4. Punn Jezun taka oso portipall kelo: "Povitr Pustokar oxem boroil'lem asa: 'Unddeanuch monis jiena' "
5. Magir devcharan Taka eka unch zagear vhelo ani êkêch ghoddiê bhitôr sonvsarantlim sogllim rajeam Taka dakhoun
6. mhollem: "Hea soglleancher podvi ani tanchi mhoima hanv tuka ditolom, kiteak mhojê svadhin hem kel'lem asa ani mhaka khuxi asa taka hanv tem ditam;
7. mhonnttôch mhojea pãiam poddun tum mhaka nomoskar korxi zalear; hem sogllem tujem zatolem."
8. Tednam Jezun portipall korun taka mhollem: "Povitr Pustokar oxem boroil'lem asa: 'Tujea Sorvespora Devak tum bhôztoloi ani Tachi ekleachich seva kortoloi' "
9. Magir devcharan Taka Jerusaleak vhelo ani Devmondirachea kollsar ubo korun Taka mhollem: "Tum Devacho Put zalear, hanga thaun sokla uddki mar;
10. kiteak Povitr Pustokar oxem boroilolem asa: 'Tuzo samball korunk To Aplea dutank Tujê vixim adnia ditolo; '
11. ani anink êkê svater: 'Tuzo pãi fatrak adollna zaunk, te tuka aplea hatamnim uklun dhôrtole.' "
12. Punn portipall korun Jezun mhollem: "Povitr Pustokar oxem boroil'lem asa: 'Sorvespora tujea Devachi tunvem porikxa korun noie.' "
13. Hea sogllea bhasamnim Tachi Porikxa kelea uprant devchar thoddea vellak Tachê sorxilo koddsorun gelo.
14. Jezu Povitr Atmeachea bollan Galileiak porot gelo ani Tachi kirti ak'khea prantant gazli.
15. To tanchea devsthanamnim xikvonn ditalo ani sogllim Tachi vhoddvik sangatalim.
16. To Nazaretak ailo; thõi To lhan-vhôdd zal'lo. Aplê sonvoiê pormannem Son'vara disa To devsthanant gelo ani vachunk ubo ravlo.
17. Izaias provadiachem pustok Taka kaddun dilem ani pustokacho kovllo usoitana oxem boroil'em asa ti svat Taka mell'li:
18. "Sorvesporacho Atmo mhojer asa, kiteak Tannem mhaka Obhixêk kela: goribank Bori Khobor diunk, koidiank suttka porgôttunk, ani kudd'ddeank portun nodor diunk, zulumak sampoddloleank soddounk,
19. ani Sorvesporacheam upkaranchem voros porgôtt korunk Tannem mhaka dhaddla. "
20. Ani pustokacho kovllo revddun ani to sevoka kodde porot diun To boslo. Devsthanant aslolea somestanche dolle Tacher lailole asle,
21. Tednam Tannem tankam sangunk suru kelem: "Hem xastrlikhit aiz tumchea kanar poddtanch pallon ailem."
22. Ani sogllim Taka xabaski ditalim ani Tachea tonddantlim bhair sortalim tim mannkulim utram aikun ojap zatalim. Punn magir tim mhonnunk laglim: "Juzecho put nhoi rê ho ?!"
23. Ani Tannem tankam zap dili: " 'Voiza, tukach tum boro kôr', hi mhonn'nni dubavavinn tumi Mhaka laitoleat, ani mhonnttoleat: 'Kapernauma tunvem zaitem kelãi mhonn ami aikolam, tem hanga-i tujea khaxa ganv-ghora kôr.' "
24. Tea fuddem Tannem mhollem: "Hanv tumkam khorench sangtam, khõicheach provadiak aplea khaxa ganvant man mello'lo-so na.
25. Anink ek sot tumkam sangtam: Elijachea kallar, tin vorsam ani sov mhoine Devan sôrg dhampun dovorlolo ani ak'khea ganvant vhôdd bhuk poddloli tednam, Israelant zaiteô vidva asleô,
26. punn Sidon mulkantlea Sarepta nograntlê vidvek kaddun, tantlê eklê-i sorxim Devan Elijak dhaddlo na.
27. Toxench Elizêv proviadiachea kallar zaitim koddkaram aslim, punn Siriechea Naamanak kaddun, tantlea ekleak-ui Devan nitôll kelo na."
28. Ani hem aikun devsthanant aslim titlim-i ekdom' ragar zalim;
29. ani utthun tãnnim Taka nogra bhair ghalo. Tanchem nogor bandlolem asa tea dongrachea mathear thaun Taka sokla xevttun uddounk, thõi porian tim Taka gheun gelim,
30. punn sarko tanchê modlean cholun To Aplê vatten gelo.
31. Ani Galileiantlea Kapernaum' nogrant To devun gelo ani Son'vara disa tankam xikvonn diunk laglo.
32. To odhikar aslolê porim uloitalo dekhun, Tachê xikvonnê vixim tim bharim ojap zatalim.
33. Mhello devchar boslolo êk monis devsthanant aslo ani tannem vhoddlean arddun mhollem:
34. "Ai Saiba! Nazaretkara Jezu, amchê kodde Tuka koslem kam' asa? Amcho bhosm korunk ailai kitem? Tum konn to hanv zannom: Devacho sonvskarlolo bhôkt Tum!"
35. Punn Jezun taka dhomkaun mhollem: "Ogo rav ani hea mon'xa velo bhai sor!" Ani soglleam modekot taka dhornnir apttun punn mat-ui dukhoinastana, devchar tachê velo bhair sorun gelo.
36. Sogllim ojap zalim ani eka-mekak mhonnunk laglim: "Koslem mhonn utor hem! Odhikaran and podven To mhella atmeank adnia korta ani te bhair sorun vetat!"
37. Ani Tachi khobor ganvam-ganvamnim ak'khea prantant gazli.
38. Devsthanantlo bhair sorun Jezu Simanvachea ghora gelo. Simanvachi sasu mottea zoran foddfoddtali ani tãnnim tichê pasot Taka vinoti keli,
39. Ticher oddôv ghalun Tannem zorak hukum' ghalo ani ticho zôr poddlo; ani rokddich utthun ti tancho poramôs korunk lagli.
40. Dis dharir poddlea uprant jin'sam-bhasanchea boll'llikarank Tachê sorxem haddlim. Ani ek-ekleacher hat dovrun Tannem tankam borim kelim;
41. zaitea zannam vele devchar-ui kaddle ani te bob marun mhonnttale: "Tum Devacho Put!" Ani Apunn Krist mhonn te zanno asle dekhun To tankam bobatt korun ulounk dinaslo.
42. Uzvaddtôch bhair soron, To eka eksurea zagear gelo. Lôk Taka sôdit-sôdit To aslo thõi pavlo ani apnnank Tannem sôddun vochona zaunk tim proitn kortalim.
43. Punn Tannem tankam mhollem: "Devachea Rajeachem Xubhvortoman heram-i ganvamnim Havem porgottunk zai, tôr heach pasot Devan Mhaka dhaddla"
44. Ani Judeiachea devsthanamnim To updês diit aslo.
