1. Jezun Aplea xisank oxem sanglem: "Konn-eklo girest monis aslo ani taka êk mukdom' aslo; ho tachê girestkaiechi vatt laita mhonn konnem tachê sorxem vochun hacher firiad dili.
2. Haka apoun haddun, dhonian vicharlem: 'Tujê vixim hanv hem aikotam tem kitem? Tujea karbharacho hixôb di; tôr hea fuddem mhozo mukdom' zaunk tuka mellchem na!'
3. Tednam mukdoman apnnach bhitôr mhollem: 'Mhozo dhoni mhojê koddchem mukdom'ponn kann gheta mhonnttôch, hanv atam kitem korum? Khonnunk mhaka sokot na; bhik magunk mhaka loz dista.
4. Xabas, koll'llem mhaka! Mhaka mukdom'ponna velo nikllailea uprant, konnem tori mhaka apnnager gheunchê khatir hanvem kitem korchem tem mhaka ievzolem!'
5. Aplea dhoniachea ek-eklea rinnkariak apoun, tannem poilea lagim vicharlem: 'Mhojea dhoniak tum kitlem devo asai?'
6. Tannem zap dili:' Xembôr mapam tel.' Mukdoman taka sanglem: 'Hem polle tujem lêkhpotr; bos hanga ani vegim tacher pon'nas boroi.'
7. Magir dusreak vicharlem: 'Ani tum kitlem devo asai?' Tannem portipall kelo: 'Xembôr khanddiô gonv.' Mukdoman taka sanglem: 'Hem polle, tujem lêkhpotr ghe ani oixim boroi.'
8. Tozviten aplem kam' kelem mhonn Dhonian tea naddbudhichea mukdomak vornnilo, kiteak sonvsari mon'xam aplea sarkeam lagim cholta-gholltana uzvaddachea mon'xam poros odik tozvitechim.
9. Tôr Hanv tumkam sangtam: girestkai burxi, punn tumkam ixtti-xttinni zôddun gheunk ticho upeôg korat; oxem, ti ontrun vetoli tednam, tim tumkam sasnnachea biraddamnim svagôt korun ghetolim.
10. Jim ekdom' unnea molachea vostumnim khatrechim, tim unch molachea-i vostumnim khatrechim; ani jim ekdom' unnea molachea vostumnim khottim, tim unch molachea-i vostumnim khottim.
11. Mhonnttôch, zôr hea sonvsarantlê mhellê girestkaiecho favo to upeôg korunk tumkam patieunk nozo zalem, tôr khori-osôl girestkai tumchea hatant ghalunk konn tumkam patietolo?
12. Devan tumkam dil'lea tumcheô nhoi tea vostumnim tumi zôr visvaxi ravunk nant, tôr tumcheôch zauncheô asat teô vostu Dev koso ditolo tumkam?"
13. Khõicheach chakran dogam dhonianchi borabôr chakri korum nozo, kiteak to ekleak zolltolo ani dusreacho môg kortolo, vô ekleak chikttun ravtolo ani dusreachi beporva kortolo. Tumchean Devachim ani borabôr Girestkaiechim gulamam zaum nozo."
14. Hem sogllem aikun, dhon-girestkaiek lobhdol'le Farizev Tacheô moskoriô korunk lagle.
15. Ani Tannem tankam sanglem: "Mon'xanchê nodrek apunn promannik mhonn dakhounk sôdtat te tumich te, punn Dev tumchim kallzam boro vollkhota; tôr mon'xam unch molachem mhonn lêkhtat tem Deva mukhar kanttallo.
16. Somurt ani Proviadianchi xikovnn Juanvachea kalla porian choltaleô; tê meren Devachem Raj porgôtt zata ani tantum bhitôr sorunk sogllim nêtt kortat.
17. Somurtintlem ek kuskutt bhair poddchê poros, sôrg ani prithum' nopoit zaunk odik sompem.
18. Zo aplê potinnik sôddun dusrê lagim logn zait, to pordvar korta; ani ghovan soddlolê bailê lagim zo logn zait, to-i pordvar korta."
19. Konn-êk girest monis aslo; to tambddim ani nazuk sonni vostram nhestalo ani disachea disa borim-borim jevnnam korun dhadoxi jietalo.
20. Ani Lazar nanvacho êk bhikari, soglloch chovnamnim bhoron, tachea darvonttea-xim poddon astalo;
21. girestachea meza velem poddta tem khaun aplem pott bhôrunk to axetalo. Sunnim legun ieun tachim chovnam lenvtalim.
22. Magir êk dis to bhikari melo ani devdutamnim taka Abrahamachea gopant vhorun dovorlo. To girest-ui melo ani taka vhorun purlo.
23. Iemkonddant attevitte bhôgta astana, tannem aple dolle ubarun Abrahamak ani tachea gopant aslolea Lazarak pois dekhle,
24. ani oxi bob marli: 'Abraham' bapa, mhoje churchure dhôr ani aplea bottachi tembi udkant buddoun mhoji jib thôndd korunk Lazarak dhadd, kiteak hea ujeant hanv bharim vollvolltam.'
25. Ani Abrahaman mhollem: 'Puta mhojea, tujea jivitant jitlem tunvem sukh bhôgleim, titlem Lazaran dukh sôslem mhonn ugddas kôr; mhonnttôch atam taka buzvônn mellta ani tum dogdogtai.
26. Titlench nhoi, konn hanga thaun tumchê-xim vochunk sôdit zalear, tachean zaina, nhoi mhonn thõi thaun hanga ieunk-ui zaina, kiteak amchê ani tumchê modem mottem vhoddlem patall thirail’lem asa.’
27. Tednam tannem mhollem: 'Toxem zalear, bapa, taka mhojea bapaichea ghora dhadd mhonn tujê lagim poratun magtam;
28. tôr mhaka panch bhav asat; te-i hê volvolleanchê svater iena zaunk tannem tankam xiddkaunche.'
29. Punn Abrahaman taka sanglem: 'Tankam Moizes ani provadi asat; tanchem tãnnim aikunchem.'
30. Punn tannem portun mhollem: 'Toxem nhoi, Abraham' bapa; mel'leantlo konn-ui tanchê-xim vochot zalear, te jivit bodôltole.'
31. Xekim Abrahaman taka sanglem: 'Moizesachem ani provadianchem te aikonant zalear, mel'leantlo konn-ui jivont zalear legun tanchea monant sot rigchem na.' "
