1. Tiberius Somrazachê razvôttkechea pondravea vorsa Pons Pilat Judeiacho razpal, Herod Galileiacho upraza, ani Lizania Abilenecho upraza astana,
2. An'nas ani Kaifas porom'-iadnik asle tednam, Juanvak, Zakariasachea putak, oronneant Sorvesporachem utor pavlem.
3. Patkanchem bhogsonnem zôddchê khatir jivit bodlun snan gheiat mhonn to Jordanachea ak'khea vattarant porgottit bhonvtalo.
4. Izaias provadiacheam sangnnianchea pustokar boroil'lem asa tea pormannem hem zalem. Tem oxem: "To oronneant aroddtoleacho tallo: Sorvesporacho marôg toiar korat; Tacheô vattô nitt korat:
5. dôr-êk falkem bhoron ietolem dôrêk dongôr ani porvôt sokol poddtolo; vankdde-tinkdde marog nitt zatole, ani gunddea-fatranche asat te sullsullit zatole,
6. ani ak'khem mon'xakull Devachem taronn polletolem"
7. Apnna koddchem snan gheunk bhair sorun ietea lokachê urponjik to mhonnttalo: "Furxeanchi zat tumi! Ieuncho asa to krôdh vattaiat mhonn konnem tumkam xiddkaileant?
8. Punn tumchem jivit bodòl'lam zalear, tem purtea follamnim dakhoiat, ani 'amcho bapui Abraham', oxem tumchê modem mhonnum nakat. Tôr hanv tumkam sangtam: hea fatrantli Abrahamak sonsôt utpon korunk Devak tank asa.
9. Atam legun zhaddanchea mullakkuradd ghal'li asa. Mhonnttôch jem-jem zhadd borem foll dina, tem-tem Dev katortolo ani ujeant ghaltolo."
10. Ani puskôll lokan taka vicharlem:" Tôr ami kitem korchem?"
11. Ani zap diun tannem mhollem: "Don angavlim asat tannem kãich na taka ek diunchem; ani jevunk khaunk asa tannem toxench korchem."
12. Dônddvosuldarui snan gheunk aile ani tãnnim taka mhollem: "Guruji, ami kitem korchem?"
13. Tannem tankam sanglem: "Tumkam tharailam tachê-kui anink kãich ogllem gheum nakat."
14. Ani soinikamnim-i taka vicharlem: "Ami mhonn kitem korchem?" Ani tannem tankam oxi zap dili: "Konnak zobordosti korum nakat, nhoi mhonn konnacher boglantt ghalum nakat, ani tumkam kitem mozuri mellta ti gheun dhadoxi zaiat."
15. "Hoch bi Krist nhoi mum?" oso Juanva vixim lôk khub dubav kaddun ani zonn-eklo aplea monant odmas korun aslo dekhun,
16. Juanvan tankam somestank zap diun mhollem: "Hanv tumkam udkachem snan ditam khoro, punn mhojê-vôn bollvont Eklo ieta, ani tachea vhannanchi vadi sôddunk hanv upkarona. Toch Povitr Atmean ani ujean tumkam snan ditolo;
17. Aplem kholl nitoll korunk ani gonv aplea koddeant bhôrunk To Aplea hatant moddkull gheun asa, punn tonn zalear palovna toslea ujeant To lastolo."
18. Heô ani dusreô-i zaiteô bud'dhi diun to lokak Xubhvortoman porgôtt'talo.
19. Herod uprazan Herodiasik, aplea bhavachê bailek, apli bail kel'li dekhun, ani tachea sogllea noxttea kortubam pasot, Juanv Herodik bexttaitalo;
20. iedea vellar upraza soglleam poros paxtt kortub korunk pavlo: tannem Juanvak bondkhonnint ghalo.
21. Magir oxem ghòddlem: sogllea lokan snan gheun somptôch,Jezun-ui snan ghetlem; uprant To magnnem korta astana, sôrg ukto zalo
22. ani Povitr Atmo parveachem rup gheun Tacher denvlo; ani sorgar thaun oso êk tallo gazlo: "Tum Mhozo vhôdd opurbaiecho Put; Tujer Mhojem dhadosponn asa."
23. Aplo vavr suru kelo tednam Jezu sumar tis vorsancho aslo ani lôk To Juzecho put mhonn somzotalo. Juzecho bapui Heli;
24. hacho Mat'that; hacho Levi; hacho Melki; hacho Jan'nai; hacho Juze;
25. hacho Matatias; hacho Amos; hacho Nahum'; hacho Esli; hacho Nag'gai;
26. hacho Maat; hacho Matatias; hacho Semein; hacho Josek; hacho Joda;
27. hacho Joanan; hacho Resa; hacho Zerubbabel; hacho bapui Shealtiel; hacho Neri;
28. hacho Melki; hacho Ad'di; hacho Kosam'; hacho Elmadam'; hacho Er;
29. hacho Jezu; hacho Eliezer; hacho Jorim'; hacho Mat'that; hacho Levi;
30. hacho Simeion; hacho Juda; hacho Juze; hacho Jonam'; hacho Eliakim'
31. hacho Meleia; hacho Men'na; hacho Mat'tatha; hacho Nathan; hacho bapui David;
32. hacho Jes'se; hacho Obed; hacho Boaz; hacho Sala; hacho Nashon;
33. hacho Aminadab; hacho Admin; hacho Arni; hacho Hezron; hacho Perez; hacho Juda;
34. hacho Jakob; hacho Izaak; hacho bapui Abraham'; hacho Tera; hacho Nahor;
35. hacho Serug; hacho Reu; hacho Peleg; hacho Eber; hacho Shela;
36. hacho Kainan; hacho Arfaxad; hacho Shem'; hacho bapui Noah; hacho Lamek;
37. hacho Methusela; hacho Enok; hacho Jaret; hacho Mahalaleel; hacho Kainan;
38. hacho Enos; hacho Set; hacho Adanv; hacho bapui Dev.
