1. Uprant ghòddlem tem hem: Devachem utor aikunk lôk Jezu bhonvtim chenchon aslo ani To Genezaret Tolleachê dodder ubo aslo.
2. Tednam thõi tolleachê deger Tannem don hoddim pollelim; kharvi denvun rampnnim dhutale.
3. Tantlem ek hoddem Simanvachem aslem; tacher To choddlo ani tem toddik thaun matxem pois vhorunk Tannem maglem; ani hoddear bosun, thõi thaun To lokak xikovnn ditalo.
4. Uloun zatôch, Tannem Simanvak sanglem: "Khol udkant hoddem bhair vhor ani maslli dhôrunk tumcheô rampnnim ghalat."
5. Taka zap diun Simanvan mhollem: "Guruji, rat-bhôr ami koxtt kele, punn amkam kãich sampoddlem na; toripunn Tujea utrak hanv rampônn ghaltam."
6. Oxem kelea uprant tankam itli khub maslli poddli ki tancheô rampnnim pinzunk pavloleô;
7. ani ieun apnnank adar diunk dusrea hoddeant aslolea bhagidarank tãnnim khunna korun apoile. Te aile ani buddunk pavo-sôr don-ui hoddim bhòrlim.
8. Tem pollena fuddem Simanv Pedrun Jezuchea pãiam poddon mhollem: "Mhojê sorxilo pelean sor, Saiba: hanv êk patki monis!"
9. To ani tachê borabôr aslole title-i, poddloli maslli polleun, sarkech thotthakle;
10. têch porim Simanvache bhagidar aslole te, Zebedevache put, Jakob ani Juanv. Ani Jezun Simanvak mhollem: "Bhieum naka, hea fuddem tum mon'xank dhôrtoloi."
11. Ani hoddim toddik kaddun, sogllem sanddun, te Tachê pattlean gele.
12. Jezu nogrant astana, ovchituch koddan bhòrlolo êk monis ailo ani Taka pollena fuddem dhornnir omto poddlo ani Tachê kodde oxem magunk laglo: "Saiba, Tuka zai zalear, Tujean mhaka nitôll korunk zata."
13. Ani Jezun Aplo hat sôddun taka lailo ani mhollem: "Hôi, Mhaka zai, tum nitôll za!" Têch ghoddier tachem kodd nanch zalem.
14. Ani Jezun taka adnia keli: "Konnakuch sanginaka, punn voch ani tujem ang iadnikak dakhoi; ani porjek tuji pekovnni ruzu korchê khatir, tum nitôll zalai mhonn Moizesan formail'lem dan bhettoi."
15. Punn Tachi khobor odikuch gazot vetali ani Tachem utor aikunk ani aplea piddê-rogantlo boro zaunk urponjimnim lôk ietalo.
16. Punn To khõi-khõi eksurê svater vochun magnnem kortalo.
17. Ani êk dis oxem zalem: To xikovnn ditalo ani Galileiachea ani Judeiachea ganv-ganvantle ani Jeruzaleantle Farizev ani dhormxastri ieun thõi boslole. Ani lokak boro korunk Sorvesporachi xokti Tachê sovem asli.
18. Ovchituch kãi dadle ar zal'lea eka mon'xak antrunnar ghalun gheun aile; ani taka bhitôr haddun Tachea fuddeant dovrunk sôdtale.
19. Punn lokak lagun khõichêch vatten taka bhitôr haddunk mellonaslem dekhun, te pattosacher choddle ani, nolle kaddun, antrunna soit taka modekot Jezu mukhar tãnnim denvoilo.
20. Tancho bhavarth polleun Tannem mhollem: "Ixtta, tujim patkam tuka bhògsolim."
21. Ani dhormxastri ani Farizev aplea monant mhonnunk lagle. "Ho anink konn rê?! To sangta tem sarkich devninda! Devak ekleakuch sôddun, konnachean patkam bhogsunk zata?"
22. Tanchem chintop zanno zaun Jezun portipall kelo:" Oslim chintnam tumchea monant kiteak gholloitat tumi?"
23. Hea donantlem khõichem mhonnunk odik sompem: 'tujim patkam tuka bhògsolim!', oxem mhonnunk, vô 'utth ani chol!', oxem mhonnunk?
24. Punn Mon'xachea Putak sonvsarant patkam bhogsunk podvi asa mhonn tumi zanno zaunchê khatir," Tannem arkarak mhollem: "Hanv tuka hukum' ghaltam, utth, ani tujem antrunn uklun tujea ghora voch!".
25. Ani rokddoch soglleam hujir utthun, apunn aslolo tem antrunn uklun, Devachi tust korit to aplea ghora gelo.
26. Ani sogllim ekdom' thottaklim ani Devak vakhanntalim ani bhirantin bhoron mhonnttalim: "Vichitr vostu ami aiz dekhleô."
27. Hachê uprant Jezu bhair sorun gelo ani Levi nanvachea eka dônddvosuldarak manddvir boslolo Tannem dekhlo ani taka mhollem: "Mhojê pattlean ie."
28. Ani sogllem sanddun to utthlo ani Tachê pattlean gelo.
29. Ani Levin aplea ghorant Taka ek vhoddlem jevonn kelem ani dônddvosuldaranchi ani tanchê sangatim jevnnak boslolea heranchi vhôdd khêtt asli.
30. Tednam Farizevamnim ani tanchea dhormxastriamnim gunngunnun Tachea xisank mhollem: "Dônddvosuldaram ani patkiam borabôr tumi kiteak khata-pietat?"
31. Portipall korun Jezun tankam mhollem: "Borim asloleank nhoi, punn vaittakarank ki voizach igoroz.
32. Tumi promannik mhonn dhôrtat tankam apounk Hanv ailom na, punn tumi patki mhonn lêkhtat tãnnim aplem jivit bodôlchê khatir, osleank Hanv apounk ailam."
33. Tednam tãnnim Jezuk mhollem: "Juanvache xis, ani toxech Farizevanche, bhoun-bhoun upas ani magnnim kortat, punn tuje xis khaun-pieun khuxal asat tem koxem?"
34. Ani Jezun tankam mhollem: "Novro pavnneam borabôr astana tumchean tankam upas korunk lavum-iet?
35. Novreak tanchê modlo kaddun vhorche dis ietole; magir, te dis ietôch, te upas kortole."
36. Oxi êk vopar ghalun Tannem tankam sanglem: "Konnuch pornnea vostrak kopo marunk novea vostracho kuddko pinzun kaddina; toxem kelear, novem vostr pinzlem tem pinzlem, tea bhair tacho kaddlolo kuddko pornnea vostrak sori zauncho na.
37. Ani konnuch novo soro pornnea dabeamnim bhôrina; bhôrlo zalear, novo soro dabe fôddun uddoitolo ani soro oton vetolo, ani dabeancho ibadd zatolo.
38. Punn novo soro novea dabeamnim bhôrunk zai
39. Ani pornno soro pieun ail'lea konnankuch novo soro rokddoch boro lagona. 'Pornno soro odik boro', oxem tim mhonnttat."
