1. Hachê uprant Somian anink beastôr zannank nemle ani Apunn vecho aslo tea-tea nogrant ani tê-tê svater tankam dogam-dogank Apnna fuddem dhaddle.
2. Ani Tannem tankam mhollem: "Pik khorench khub, punn vavraddi thodde; hea pasot pikachea dhonia lagim aplê lunvnnê-môllnnek vavraddi dhadd mhonn magat.
3. Vochat, punn landdgeam modem menddre koxe Hanv tumkam dhaddtam mhonn chotrai dhôrat.
4. Bhokxem vô bhuti vô vhannô vhorum nakat, ani vatter konnakuch hoddki nakat.
5. Khõichea-i ghorant bhitôr sorxat zalear,' hea ghorak xanti!' oxem poilench mhonnat.
6. Xanti favo-aslolim mon'xam thõi astit zalear, tumchi xanti tancher denvtoli; na tôr, ti tumchê thãi porot ietoli.
7. Ekach ghorant ravun, tanger asa tem khaiat ani pieiat, tôr vavraddiak aplo muxaro favo. Ghora-ghorim bhonvum nakat;
8. ani khõichea-i nogrant bhitôr sorxat ani tim tumkam ievkar ditit zalear, tumkam vaddtat tem jevat.
9. Thõi astit tea vaittakarank borim korat ani 'Devachem Raj tumchê thãi ieunche zalem', oxem sangat.
10. Punn khõichea-i nogrant bhitôr sorxat ani tim tumkam ievkar dina zatit zalear, rosteancher vochun mhonnat:
11. Amchea pãiank lagloli tumchea nograchi dhul'l porian ami tumchi tumkam zhaddun uddoitanv. Toripunn Devachem Raj ieunchem zalem mhonn zanno zaiat.'
12. Hanv tumkam sangtam: tea Disa Sodomachi zhôddti toslea nogra itli khôr zaunchi na.
13. Korazin, kotta-kotta tujem! Bethsaidê, kotta-kotta tujem! Tôr tumchê modem keleant tim vismitam Tir ani Sidon nogramnim kel'lim zalear, kamblleachem saka-fottem ghalun ani gobracher bosun tednanchê tednanch tim prachit kortolim aslim.
14. Zhôddtechea Disa Tirachi ani Sidon'chi zhôddti tumchê itli khôr zaunchi na.
15. Ani tum, Kapernauma, voir mollba porian ubaron pavtoleim mhonn ravtai kitem? Na! patalla porian tum sokla xevttotoleim.
16. Tumchem aikotat tim Mhojem aikotat; tumchi beporva kortat tim Mhoji beporva kortat; ani Mhoji beporva kortat tim Mhaka dhaddla Tachi beporva kortat."
17. Te beastôr xis khuxalbhorit zaun porot aile. Tãnnim mhollem: "Saiba,Tujea nanvan devchar porian amkam khalte zale."
18. Ani Tannem tankam sanglem: "Viz koso sorgar thaun poddlolo Hanvem Soitanak dekhlo.
19. Polleiat, sorop ani vinchu ani dusmanachi soglli podvi pãiam tolla mostunk Hanvem tumkam odhikar dila; kãi-ek tumkam vaitt zait-xem na.
20. Toripunn devchar tumkam khalte zatat mhonn khuxi zaunchê bhaxek, tumchim nanvam sorgar boroil'lim asat mhonn khuxal zaiat."
21. Teach vellar Povitr Atmeachea dennean khuxalkaien bhoron, Tannem mhollem: "Bapa, sorga ani pritumechea Dhonia, heô vostu zannarank ani xanneank lipoun dovorleôi ani supurlea bhurgeank teô ukteô keleôi mhonn Hanv Tuka vakhanntam. Hôi, Bapa, tôr hench Tuka borem dislem.
22. Sogllem Mhojea Bapan Mhojea hatant ghal'lem asa; ani Put konn to konnuch nokllo bogor Bap; ani Bap konn to konnuch nokllo bogor Put ani zankam Bap dakhoun diunchi Putak khuxi asot tim mon'xam."
23. Ani Aplea xisam vatten vollon ani tankam kuxin gheun Tannem mhollem: "Tumi polletat tem polletole dolle bhagi;
24. tôr Hanv tumkam sangtam: tumi polletat tem polleunk zaite provadi ani patxai axele, punn tankam mell'llem na; ani tumi aikotat tem aikunk-ui te axele, punn tankam aikunk mell'llem na."
25. Tednam Jezuk kosak lavunk eka dhormxastrian utthun oxem vicharlem: "Guruji, Sasnnik Jivit zôddtolom zalear, hanvem kitem korunk zai?"
26. Tannem taka oxi zap dili: "Somurtint kitem boroil'lem asa? Tem koxem vachtai, sangxi?"
27. Tannem portipallun mhollem: "Sogllea tujea kallzan, sogllea tujea jivachea bollan, sogllê tujê xoktin, ani sogllea tujea monan Sorvespora tujea Devacho tum môg kortoloi, ani tuzo môg kortai tosoch tujea peleacho kortoloi."
28. Ani Jezun taka sanglem: "Tuzo zobab sarko asa; toxench kôr ani tum Jivit zôddtoloi."
29. Punn aplea vicharak karonn asa mhonn dakhounk tannem Jezuk mhollem: "Tôr mhozo pelo konn?"
30. Jezun oso portipall kelo: "Konn-êk monis Jerikeak vochunk Jeruzalea thaun denvun ietalo; vatter to choranchea hatant sampoddlo; tãnnim tachê kodde aslem titlem-i kann gheun, taka ghai poddo-sôr mar ghalo, taka ordo-mel'lo korun sôddlo ani apunn pollun gele.
31. Tednam oxem ghòddlem: konn-eklo iadnik têch vatten denvun ietalo; tannem taka dekhlo ani dusrê kuxin soron to cholot ravlo.
32. Tosoch êk levit tevxilean pavun sorlo ani taka polleun, to-i dusrê kuxin soron cholot fuddem gelo.
33. Punn êk vattsur Samariekar tevxilean vetana tachê sorxem pavlo ani, taka polleun, tea babddeache taka churchure disle.
34. To lagim ailo, tel ani soro lavun tannem tache ghai bandle, taka aplea gaddvacher ghalo ani êkê khannavollint taka vhorun tacho poramôs kelo.
35. Dusrea disa tannem don dinar kaddun khannavollkarak dile ani mhollem: 'Tacho samball kôr ani kitem-i ogllo khôrch tuka zait zalear, hanv porot ietam tednam tuka farik kortolom.'
36. Hea tegam bhitôr konnem apunn choranchea hatant sampoddloleacho pelo zaun dakhoilem-xem tuka dista?"
37. Tannem zap dili; "Tachi doia korun dakhoili tannem." Tednam Jezun taka sanglem: "Voch ani tum-vui toxench kôr."
38. Magir ghòddlem tem hem: Apli bhonvddi korta astana Jezu eka ganvant bhitôr sorlo ani Marta nanvachê êkê bailen aplea ghorant Taka soniman kelo.
39. Tika Maria mhonnloli êk bhoinn asli; ti Somiachem utor aikunk Tachea pãiam kodde bosun ravli.
40. Punn Marta ghorachea rattimnim bharim harpit zatali; Tachea fuddeant ieun tinnem mhollem: "Jevnnacho sogllo bhar mhojê bhoinnin mhojeruch sôddlo mhonn Tuka kãich poddona? Ie ani mhaka adar di mhonn sang mum tika!"
41. Ani portipallun Somian mhollem: "Marta, Marta, kitlea vostunchi mhonn dhasti tuka?
42. Thoddeôch vostu puro, khorem mhollear êkuch gorjechi. Marien boro to vantto vinchun kaddla ani konnuch tichê lagcho to kann gheuncho na."
