1. Êk dis To Devmondirant lokak xikovnn dita ani Xubhvortoman porgôtt'ta astana, mukhel iadnik ani dhormxastri zannteam borabôr ektthãi zaun aile
2. ani Tachê lagim oxe uloile: "Amkam ek sang: khõichê sot'tien hem tum kortai? Vô konnem dilea tuka hi sot'tia?"
3. Jezun portipallun tankam mhollem: "Hanv-ui tumchê kodde ekuch vichartam, tem tumi Mhaka sangat:
4. Juanvachem snan sorgar thaun vô mo'nxam thaun ailem?"
5. Punn te apnnanchêch bhitôr oxem torkunk lagle: "Ami 'sorgar thaun' mhollem zalear, to amkam mhonnttolo: 'Toxem zalear, kiteakt umi Juanvak manun gheunk na?'
6. Punn ami 'mon'xam thaun' mhollem zalear, soglli porza amkam fatraitoli; tôr Juanv êk provadi mhonn tankam dubavuch na."
7. Tea pasot tãnnim oxi zap dili: "Tem khõichem tem ami nokllonv."
8. Tednam Jezun tankam sanglem: "Tôr khõichê sot'tien Hanv heô vostu kortam, tem Hanv-ui tumkam sangina."
9. Tednam Tannem lokak hi vopar sangunk suru kelem: "Konn-eka mon'xan êk dakancho mollo lailo ani, kullvaddiank to kumlleak diun, zaito kall apunn poixilea ganvant vochun ravlo.
10. Vêll pavtôch, molleachea pikacho aplo vantto kullvaddiam koddcho gheunchê khatir tannem eka chakrak tanchê-xim dhaddlo. Tãnnim taka dhôrun mar dilo ani rikamo portun dhaddlo.
11. Novean tannem dusrea eka chakrak dhaddlo; punn tãnnim haka-i mar dilo, beman kelo ani ritea hatamnim portilo.
12. Tea uprant tisrea eka chakrak dhaddlo; tãnnim taka ghai poddo-sôr marun bhair ghalo.
13. Mollachea dhonian mhollem: 'Atam kitem korum? Mhojea opurbaiechea putak dhaddtolom; taka polleun te ghoddiek taka man-bhovman ditole.'
14. Punn kullvaddiamnim, putak pollena fuddem, apnnanchê bhitôr chintun mhollem: 'Ho tacho daiji; taka jivexim marum-ia ani daiz amchem zatolem.'
15. Ani tãnnim taka dhôrun mollea bhair ôddun haddlo ani jivexim marlo. Atam molleacho dhoni tankam kitem kortolo?
16. Ieun tea kullvaddiancho bhosm kortolo ani aplo mollo dusreanchea hatant ditolo." Hem aikun, tãnnim mhollem: "Dev hem nirmum noiê."
17. Punn Tannem tancher nodor marun mhollem: "Mhonnttôch oxem boroil'lem asa tem kitem? 'Zo fatôr bandpiamnim sôddun dil'lo toch zalo konnxea-sondhicho fatôr.'
18. Jim konn hea fatracher adllun poddtat, tanche moddon kuddkean'-kuddke zatole, ani jea konnancher to fatôr poddot, tanchi pudd zatoli."
19. Tea vellar mukhel iadnik ani dhormxastri Tacher hat ghalunk sôdtale, punn porjek bhiele; Tannem hi vopar apnnank lavun sanglea mhonn te bore somzole.
20. Ani razpalanuch Tacher aplo odhikar ani podvi cholounchê khatir, Jezuk utrak sampddaunk ani razpalachê adhin korunk tãnnim ievjilem; dekhun te Taka tellun asle. Oxem astam, satvik mon'xanchem ddhong gheiat mhonn xikoun, tãnnim Tachê-xim bhedi dhaddle.
21. Hãnnim ieun Tachê lagim oxem vicharlem: "Guruji, tum sarkem tench uloitai ani xikoitai, mon'xanchem tondd pollenãi, ani Devachi vatt khoreponnan xikoitai mhonn ami zannonv.
22. Amchean Somrazak dôndd farik korum-ieta ki na?"
23. Punn Tannem tanchi naddvidhia vollkhun oso portipall kelo:
24. "Êk dinar Mhaka haddun diat, polleum-ia. Hacher asa tem rup konnachem? ani nanv konnachem?" Tãnnim zap dili: "Somrazachem."
25. Tednam Tannem tankam sanglem: "Borem tôr, Somrazachem Somrazak diat, ani Devachem tem Devak diat."
26. Ani Tachea ulovpant Taka loka hujir sampddaunk tanchê lagim ghòddlem na; ani Tachea zobaba vixim te ojap zale ani ogech ravle.
27. Ekdam kãi Saduki Jezu-xim aile: te punorjivontponn na mhonnttat tosle monis. Tãnnim Taka ho prosn ghalo:
28. "Guruji, Moizesan oxem amkam boroun dovorlam: 'Konn-ekleacho logn zal'lo bhav bhurgem-ball nastana morot zalear, tachea bhavan tachê bailê lagim logn zaunchem ani aplea bhavak sonsôt utpon korchi.'
29. Tôr sat bhav asle. Poilo logn zalo ani burgem-ball nastana melo.
30. Magir dusro,
31. ani tachê uprant tisro tichê lagim logn zale; têch porim sat-ui zann sonsôt dovrinastana mele.
32. Soglleam-vôn nimanni, bail-ui meli.
33. Tôr sat-ui zannanchi potinn ti zal'li mhonttôch, mel'lim mon'xam punorjivont zatolim tednam, tanchê bhitorlea konnachi potinn zatoli ti?"
34. Jezun tankam sanglem: "Hea iugantlim mon'xam, dadle logn zatat ani bailank logn korun ditat;
35. punn tea dusrea iugak ani mel'leantlea punorjivontponnak jim konn purtim zal'lim melltit, tanchê modem logn zavop ani logn korun divop aschench na;
36. tanchean anink morunk zaina, tim devdutam sarkim, ani punorjivontponnachim bhurgim dekhun, tim Devachim bhurgim.
37. Mel'lim mon'xam portim jivont zatat mhonn Moizesan-ui jhilkuttachi khobor sangta thõi dakhoilam; tôr thõi Sorvesporak to Abrahamacho Dev, Izaakacho Dev, Jakobacho Dev mhonntta;
38. dekhun, meloleancho nhoi, bogor jiveancho Dev To; Tachê mukhar sogllim jivim."
39. Xastriantlea kãi zannamnim mhollem: "Guruji, tunvem borem sangleim."
40. Ani tea uprant konnakuch Tachê kodde kosle-i vichar korunk kalliz zalem na.
41. Tannem tankam mhollem: "Krist Davidacho Put mhonn lôk koxem mhonntta?
42. Tôr Stotranchea Pustokar Daviduch oxem mhonntta: 'Mhojea Somiak Sorvesporachem utor hem: Mhojea uzvea hata bos!
43. Tujea dusmanank tujea pãiam tolla ghaltam.'
44. Mhonnttôch David taka aplo Somi mhonntta; toxem zalear, tacho putto koso zata?"
45. Sogllea lokak aikota toxem Tannem Aplea xisank sanglem:
46. "Dhormxastriam vixim chotur ravat; lamb-lamb angavlim ghalun bhonvunk, tinttear lokan apnnank manan kel'le solam' gheunk, devsthanamnim voilea-poilea zageancher bosunk ani ratchea jevnnank unch-unch svatô vinchunk tankam zoboruch borem lagta;
47. lamb magnneanchem song gheun, vidvanchim ghoram-daram te khaun uddoitat. Tankam soglleam vôn odik khôr zhôddti astoli."
