1. Jezu êkê kodden magnnem korun aslo, ani Tannem tem sompoilea uprant, Tachea xisantlea konn-eklean Taka mhollem: "Saiba, Juanvan aplea xisank magnnem korunk xikoilam toxem, Tum-i amkam xikoi."
2. Tannem tankam sanglem: "Tumi magnnem kortat tednam oxem mhonnat: 'Bapa, Tujem nanv Povitr zaum; Tujem Raj ieum;
3. amcho dispotto giras disachea disa amkam di;
4. ani amchim patkam bhogôs, kiteak amchea rinnant aslolea soglleank ami-i bhôgxitanv; ani amkam tallnnent poddunk dium naka."
5. Ani Tannem tankam sanglem: "Tumchê modem konn-ekleak êk ixtt asa mhonn somzat; ani ho modianir tachê-xim vochun taka oxem mhonntta: 'Ixtta, mhaka tin undde uxnne di;
6. mhozo êk ixtt vattecho pavun sorla ani taka vaddunk mhojê lagim kãich na."
7. Ani tea mon'xan bhitôr thaun oxi zap dili: 'Mhaka tras dium naka; atam darak khill ghali ani mhojim bhurgim ani hanv nhidunk geleanv; mhojean utthun tuka diunk zaina.'
8. Ani to darar marituch ravot zalear, Hanv tumkam sangtam, to monis ixttagotik lagun utthun dina zalear-ui, tachê korandaiek lagun taka goroz tem kaddun ditolo.
9. Toxench Hanv tumkam sangtam: magat ani Dev tumkam ditolo, sôdat ani tumkam melltolem, darar marat ani tem tumkam ugòddtolem;
10. kiteak magtat tim ghetat, sôdtat tankam mellta, ani darar martat tankam tem ugòddtolem.
11. Maslli magtolea aplea putak masllechê svater êk sorôp diit toslo tumchê modem konn bapui asa zait?
12. Vô tantim magit zalear, bapui taka vinchu kaddun diit?
13. Tumi vaittovim zaun-ui, tumchea bhurgeank boreô vostu diunk tumi zannont zalear, tea-vôn kitlo odik tumcho sorgincho Bap Apnna lagim magtoleank Povitr Atmo diuncho na?"
14. Jezu êk devchar kaddtalo ani devcharan tea mon'xak mono kel'lo. Punn devchar kaddina fuddem to mono ulounk laglo, ani sogllo lôk ojap zalo.
15. Tori astana tea lokantlea kãi zannamnim mhollem: "Beelzebul, devcharanchea pordhana udexim ho monis devchar kaddta."
16. Her konn-konn Tachi porikxa korunk sorga veli êk khunna Tachê kodde magtalim.
17. Tanchim chintnam vollkhun Jezun oxem tankam mhollem: "Khõichea-i eka rajea bhitôr nagrikanche pongodd ekamekacher uprasun zhuz korunk lagle zalear, tem raj padd zatolem ani ghorar ghor moddon poddtolem.
18. Mhonntôch Soitanachea rajeant-ui ekamekacher zhuztole pongodd asat tôr, tachem raj koxem mhonn ubem dhòrtolem? Kiteak Beelzebulachê podven Hanv devchar kaddtam mhonn tumi mhonnttat!
19. Hanv Beelzebulachê podven devchar kaddtam zalear, tumchim bhurgim konnachê podven kaddtat tôr? Mhonnttôch tinch tumchi nit kortolim.
20. Punn Hanv Devachê podven devchar kaddtam zalear, Devachem Raj tumchê thãi khorench pavlem, oxem zalem.
21. Konn-êk bollixtt monis aplim sogllim hatiaram gheun aplem ghor rakhit zalear, tachê kodde asa titleak-ui kãich bhirant na.
22. Punn tachê-kui bollixtt dusro eklo ieun taka haroit tednam, jea hatiarancher to patietalo tim sogllim ho odik bollixtt monis kann ghetolo ani tacho mhal vantt'tolo.
23. Mhojea bhaga nant tim Mhojer add asat; ani Mhojê borabor punzainant tim ximpddaitat.
24. Mhello atmo mon'xa velo bhair sortôch, sukea soddear visôv sôdit bhonvta, ani taka visôv mellona zaun mhonntta: 'Hanv bhair sorlolom tea mhojea ghora bhitôr hanv porot rigtolom.'
25. Ani thõi ie zalear, tem zhaddlolem ani nettoil'lem taka mellta.
26. Tednam to vochun apnna-vôn odik noxtte anink sat atme apnna borabôr gheun ieta; ani bhitôr rigun, thõi te aplem tthikann kortat; ani tea mon'xachi magirli doxa tachê adlê goti poros paxtt zata."
27. To oxem uloita thõich astana zomlolea lokantlê konn-êklê bailen vhoddlea tallean Taka mhollem: 'Tuka samball'lo to kusvo ani Tuka dud dilem tem hodd'ddem bhagi.'
28. Punn Tannem mhollem: "Hem khorem; toripunn Devachem utor aikotat ani samballtat tim odik bhagi!"
29. Lokachi urpônz Jezu bhonvtonnim vaddot vetali; tednam To oxem mhonnunk laglo: " Hi atanchi pinddka noxtti pinddka; ti êk khunna magta, punn Jonasachi khunna kaddun Dev tika dusri khunna diuncho na;
30. kiteak zoso Ninevehchea lokak Jonas khunna zal'lo, toso Mon'xacho Put hê pinddkek zatolo.
31. Zhôddtechea Disa Dokhinnechi Ranni hê pinddkechea mon'xam borabôr ubi zatoli ani ticho guneanv dakhoun ditoli, kiteak ti pritumechea ximam thaun Solomonachem xanneponn aikunk ail'li; ani, polleiat, Solomona poros vorto hanga asa Eklo!
32. Ninevehcho lôk Zhôddtechea Disa hê pinddkê borabôr ubo zatolo ani ticho guneanv dakhoun ditolo, kiteak Jonasachem provochon aikun tannem aplem jivit bodôl'lem; ani, polleiat, Jonasa poros vorto hanga asa Eklo!
33. Ponntti lavun konnuch ti êkê lhan kuddint lipoun dovrinant, nhoi mhonn pailê tolla dovrinant, punn bhitôr sortat tãnnim uzvadd polleunchê khatir ti eka peddar dovortat.
34. Tujea jivitachi ponntti tuzo dollo; tuzo dollo nivôll aslear, sogllem tujem jivit diptibhorit zata; punn tuzo dollo nivôll naslear, tujem jivit-ui kallokhant buddon urta.
35. Mhonnttôch tujê bhitôr asa to uzvadd kallôkh zaina zaunk chotrai dhôr.
36. Dekhun tujem ak'khem jivit, kosloch kallôkh nastana, diptivont zait zalear, tujer aplim kirnnam ghaltolê ponnttê bhaxen, tujem jivit uzvadduch fankoitolem."
37. Jezu uloun thamblo tednam, konn-eklea Farizevan Taka apnnager jevnnak apoilo. Ani To tanger vochun jevnnak boslo.
38. Jevnna adim Tannem kiteak hat dhule nant, oxem to Farizêv aplea monantuch gholloun vichartalo.
39. Ani Somian taka sanglem: "Arê, tumi Farizev patr ani tatt bhailean nitoll kortat, punn tumi bhitorlean nagovnnen ani khotteponnan bhòrleat.
40. Kitle mhonn khulle tumi! Bhailem toxench bhitorlem teach Devan kelam nhoi?
41. Dekhunuch, tumchê kodde asa tantlem kaddun dhormdan diat, ani, polleiat, tumchem sogllem nitoll zatolem.
42. Farizevamnô, kotta-kotta tumchem! Hortelanv, koddipat, ani sogllê torecho bhaji-palo hancho dhavo vantto tumi Devak mhonn farik kortat, punn neainit ani Devacho môg tumi sôddtat. He kaide ki tumi pallunk zai asle, ani te-i chukounche nhoi asle.
43. Farizevamnô, kotta-kotta tumchem! Devsthanamnim poilevoile zage ani tinttear solam' tumkam zoboruch ruchtat.
44. Tumchem kotta! Dixtti poddonant ani lôk nokllo zaun tancher cholta tosle fondd tumi."
45. Dhormxastriantlea eklean Taka portipallun mhollem: Guruji, oxem uloun tum amkam-i opman kortai."
46. Ani Tannem oxi zap dili: "Dhormxastriamnô, tumchem-i kotta-kotta! Sõsunk zainant toslim ojim tumi mon'xank vhorunk laitat, punn tea ojeank ek bott porian tumi laixat-xe nant.
47. Kotta-kotta tumchem! Kitea kprovadiank iadgiri bandtat tumi, punn tumcheanch purvozamnim tankam jivexim marle.
48. Tãnnim tancho jiv kaddlo ani tumi tankam iadgiri bandtat, ani oxem tumchea purvozanchim kortubam tumi monzur kortat mhonn tumi sarkich govai ditat.
49. Tea pasot Devachê Zannvaien legun oxem mhollam: 'Hanv tanchê thãi provadi ani dhormdut dhaddtolom ani tantlea kãi zannank te jivexim martole ani dhumallo ditole."
50. Hea pasot, sonvsar rochla tethun thaun sogllea provadianchea vikrail'lea rogtacho hê pinddken Devak hixôb diuncho poddtolo.
51. Abelachea rogta thaun tem vedi ani Devmondira modem jivexim marlolea Zakariasachea rogta porian. Hôi, Hanv tumkam sangtam, hê pinddken Devak hea soglleacho hixôb diunchoch poddtolo!
52. Dhormxastriamnô, kotta-kotta tumchem! Kiteak Zannvaiechi chavi tumi gheun geleat; tumi bhitôr sorle nant te sorle nant, ani bhitôr sorunk sôdtalim tankam-i tumi bhitôr sorunk dilem na."
53. Hem sangun Jezu thõisorlo bhair sorlea uprant, Farizev an idhormxastri ekdomuch Tachea pallank lagle ani tonddak tondd zaunchea monan Taka sobar prosn ghalit ravle.
54. Te Taka fas manddun Tachea tonddantlea koslea-i utracher Taka dhôrunk ravtale.
