1. Pask mhonnttat to, Fug-naslolea Unddeancho Utsôv lagim pavtalo;
2. ani mukhel iadnik ani dhormxastri Jezuk koso dhôrun jivexim marcho tem polletale, punn tankam porjechi bhirant asli.
3. Judas, add-nanvan Iskariot, Barantlo eklo, hachea kallzant Soitan riglo.
4. Jezuk koxê bhaxen tanchea hatant dhôrun diuncho tê vixim tannem vochun mukhel iadnikam ani Devmondiranchea sordaram kodde gozal-mat keli.
5. Te khuxal zale ani taka duddu diunk te kobul zale.
6. Hannem utor dilem; ani lokak kollonastana Taka dhôrun diunk boro soêg to polleun aslo.
7. Xekim Paskacho menddro marun bhettounk zai to Fug-naslolea Unddeancho dis pavlo.
8. Pedruk ani Juanvak Jezun oxems angun dhaddle: "Ami Pask-Jevonn korchê khatir, tumi vochun tem toiar korat."
9. Tãnnim vicharlem:" Khõi toiar korchem? Tuji khuxi kitem?"
10. Tannem tankam sanglem: "Aikat: tumi Xarant bhitôr sortana udkacho kollso gheun veta to konn-êk monis tumkam melltolo; to bhitôr sortolo tea ghora porian tachê pattlean vochat,
11. ani tea ghorachea dhoniak oxem mhonnat: 'Guruji tujê lagim vicharta: Mhojea xisam borabôr Hanvem Pask-Jevonn korunk soireancho vosro khõi asa?'
12. Ani to tumkam malloier êk vhoddlo borê bhaxen jevnnak manddlolo vosro dakhoitolo; thõi toiar korat."
13. Te gele ani Tannem sanglolem toxem tankam mell'llem; ani tãnnim Pask toiar kelem.
14. Vêll zatôch Jezu jevnnak boslo ani Tachê sangatim Tache Dhormdut.
15. Tannem tankam sanglem:" Koxtt sõschê adim tumchê sangatim hem Pask-Jevonn korunk Hanv otrekun otrektalom.
16. Khorench tumkam sangtam: hea Paskachi Devachea Rajeant sompadnni zai-sôr, Hanv hem Pask-Jevonn novean korcho na."
17. Ani Tannem patr ghetlem ani Devak dhin'vasun mhollem: "Hem gheiat ani tumchê bhitôr vanttat.
18. Khorench tumkam sangtam: Devachem Raj ie-sôr dakanchea follanchem hea fuddem Hanv anink pieuncho na."
19. Ani Tannem unddo ghetlo, Devak dhin'vasun to môddlo, ani to tankam dilo ani mhollem: "Hi Mhoji Kudd: Hanvem ti tumchê paso tsomorpunchi asa. Mhozo ugddas korun oxench tumi korat."
20. Têch porim, jevonn zatôch, Tannem patr gheun mhollem: "Hem patr Mhojea Rogtan Novo Korar: hem Mhojem Rogot tumchê pasot Hanvem varounchem asa.
21. Tori astana, Mhaka dhôrun ditoleacho hat Mhojê borabôr hea mezar asa.
22. Devan tharailam tea pormannem, Mon'xacho Put veta khoro, punn zo monis Tacho ghat gheunk veta, tea mon'xachem kotta!"
23. Tanchê modlo oxem konn korit kaim honn te ekamekak vicharunk lagle.
24. Tanchê bhitôr konnak soglleam poros vhôdd mhonn lêkhcho, hê vixim tanchê modem êk vivad-ui zalo.
25. Tednam Tannem tankam sanglem: "Raxttranche raza aplea lokacher apli podvi choloitat, ani lokacher odhikar asa tankam 'bore-dekhte' mhonnttat.
26. Tumchê modem oxem zaum noiê! Portench zalear, tumchê modem konn vhoddlo asot to soglleam poros dhaktto zal'lê porim zauncho; ani konn odhikari asot to chakôr zal'lê porim zauncho.
27. Tôr konn vhoddlo, jevnnak bosta to, vô tachi chakri korta to? Jevnnak bosta to ki na? Hanv tôr chakri kortolea sarko tumchê modem asam.
28. Mhojea upodreamnim visvaxiponnim Mhojea sangata ravleat te tumich;
29. dekhun Mhojea Bapan zoxem Mhaka Raj nemun dilam, toxench Hanv tumchê sorim kortam;
30. tumi Mhojea Rajeant Mhojea mezar khaun-pieun astoleat ani Israelachea bara kullanchi mon'subi korun xinvasonancher bostoleat.
31. Simanv, Simanv, polle, gonva porim tumkam challunk Soitanan sottia magun ghetlea;
32. punn tuzo bhavarth ddonvddollna zaunk Hanvem tujê pasot magnnem kelam, ani tum Mhojê thãi porot ietôch tujea bhavank ghott kôr."
33. Tannem mhollem: "Somia, Tujê borabôr bondkhonnintuch vochunk nhoi, punn morunk-ui hanv toiar."
34. Punn Tannem mhollem: "Pedru, Hanv tuka sangtam: aiz, kombean sad ghalchê adim, Mhaka vollkhoch nãi mhonn tin pavttim tum bhastoloi."
35. Ani Tannem tankam mhollem: "Tumkam bhokxem, bhuti ani vhannô nastana Hanvem dhaddle tednam tumkam kitem-punn unnem zalem?" Tãnnim zap dili: "Kãich unnem zalem na."
36. Tannem sanglem: "Tôr atam, bhokxem asa tannem tem hatant gheunchem, bhuti asa tannem toxench korchem; torvar na tannem aplem avoronn vikun êk torvar vikti gheunchi.
37. Khotteam modem taka lêkhlo', oxem jem Povitr Pustokar boroil'lem asa, tem Mhojê sorim sompadon ieunchem mhonn Devachi khuxi. Hôi, Mhojê vixim jem kitem boroil'lem asa, tem pallon ieta."
38. Tãnnim mhollem: "Somia, heô polle don torvari asat." Ani Tannem mhollem: "Puro."
39. Ani bhair sorun, Jezu Aplê sonvoiê pormannem Zoitunanchea Dongrar vochunk laglo; Tache xis Tachê pattlean vetale.
40. Tê svater pavtôch, Tannem tankam sanglem: "Tallnnent poddona zaunk tumi magnnem korit ravat."
41. Ani fatrachê oddi itlo Apunn tanchê-sun pois gelo ani dimbier poddun oxem magnnem korunk laglo c:
42. "Bapa, Tuji khuxi zalear, Mhojê velem hem patr pois kadd. Toripunn Mhoji khuxi nhoi, Tujich khuxi zaum-di."
43. Tednam Taka dhir diunk sorgar thaun êk devdut Taka dixtti poddlo.
44. Ani soglloch kollvollon, odik utsuktaien To magnnem korit aslo. Ani dhornnir golltolea rogtachea datt thembeam vori zalo Tach ogham.
45. Ani magnnem kortôch xisam sorxem utthun ie zalear, te khontin nhidlole Taka mell'lle.
46. Ani Tannem tankam mho-llem: "Tumi nhidtat kiteak? Tallnnent poddona zaunk utthun magnnem korat."
47. Oxem uloita thõich astanam, ovchit khub lôk dixtti poddlo ani Barantlo eklo, Judas nanvacho, tanchê fuddem ietalo; to Jezucho umo gheunk lagim sorlo.
48. Tednam Jezun taka mhollem: "Judas, umo gheun Mon'xachea Putak poradhin kortai mum tum?"
49. Tachê bhonvtim asloleamnim ,kitem zata tem polleun, Taka vicharlem: "Somia, torvar ubarchi?"
50. Ani tanchê bhitorlea eklean porom'-iadnikachea chakracher apli torsad marun tacho uzvo kanuch katorlo.
51. Jezun uloun mhollem:" Itlean puro." Ani tachea kanak hat lavun taka boro kelo.
52. Apnnak dhôrunk ail'lea mukhel iadnikank, Devmondirachea sordarank ani zannteank Jezun mhollem :"Tumi torsadi ani tonnke gheun ieunk, Hanv konn pundd kitem?
53. Hanv dispotto tumchê modem Devmondirant aslom tednam, tumi Mhojer hat ghalo na! Punn ho tumcho vêll ani kallokhachi podvi."
54. Jezuk dhôrun vhelo ani porom'-iadnikager pavoilo. Pedru pois-pois ravun Tachê pattlean vetalo.
55. Razangnnant modekot dhogtto korun bhonvtim bosloleam modem Pedru vochun boslo.
56. Konn-eklê chakornin taka dhogtteak boslolo dekhlo ani borokorun taka polleun mhollem: "Ho-itachê borabôr aslo."
57. Punn tannem na mhonn bhasun portipall kelo: "Agô, hanv taka vollkhoch na!"
58. Ani matso vêll uprant, eklean taka polleun mhollem: "Tum-i tea mon'xantloch." Ani Pedrun mhollem: "Arê mon'xa, hanv nhoi!"
59. Ani sumar êk tas uprant, anink eklo bhasunk laglo: "Ho-i tachê borabôr aslo mhonn dubhav na; ho-i Galileiacho mum rê!"
60. Ani Pedrun mhollem: "Arê, tum kitem mhonnttai tem hanv nokllom." Ani rokddoch, to uloita astananch, kombean sad ghalo.
61. Ani porton, Jezun Pedrucher dixtt ghali. Tednam "kombean sad ghalchê adim tin pavttim tum Mhaka vollkhonãi mhonn sangtoloi," oxem jem Somian sanglolem, tacho Pedruk ugddas ailo,
62. ani bhair sorun Pedru dukamnim roddlo.
63. Jezuk dhôrun asle te Taka marun Tacheô chesttaiô-moskoriô korit asle.
64. Tache dolle bandun, Tachea tonddar thapttam marit asle ani Tachê lagim vichartale: "Arê provadia! konnem marlo rê tuka? sang, polleum-ia!"
65. Ani ninda korun, zaitem Tacher add uloit asle.
66. Dis uzvaddtôch, lokache vhoddil, mukhel iadnik ani xastri ektthãi zale; Taka aplê neaisobhent vhorun,
67. tãnnim mhollem: "Tum Krist zalear sang amkam." Ani Tannem tankam mhollem: "Hanv tumkam sangin zalear, tumi Mhaka sotman'cheak nant;
68. Hanv tumkam êk vichar korin zalear, tumi kãi Mhaka zap diunche nant.
69. Hea fuddem Mon'xacho Put dev-podvechea uzveak bosun astolo."
70. Tãnnim soglleamnim vicharlem: "Toxem zalear, tum Devacho Put?" Tannem zap dili: "Tumcheach tonddantlem bhair sorlem utor: Hanv Devacho Put!"
71. Punn tãnnim mhollem:" Anink govai kiteak zai amkam? Tacheach tonddantlem ami tôr aikolem."
