1. Eka Son'vara disa Jezu xetantlean veta astana Tache xis konnsam tôddun ani tim talltar murddun khatale.
2. Kãi Farizevamnim tankam mhollem: "Son'varachem korum' nozo tem kam tumi kiteak kortat?"
3. Ani Jezun zap diun tankam sanglem: "Davidak ani tachea sangata asloleank bhuk lagli tednam tannem kitem kelem tem tumi vachunk na kitem? To Devachea ghorant bhitôr sorlo ani iadnikam bhair konnacheanuch khaum nozo asle te Deva mukhar dovorlole undde tannem kaddun khele ani aplea sangatiank-ui dile - hem tumi vachunk na?"
5. Ani Tannem tankam mhollem: "Tôr Mon'xachea Putak Son'varacher-ui odhikar asa."
6. Dusrea eka Son'vara disa To devsthanant vochun xikovnn ditalo. Ani uzvea hatak ar zal'lo êk monis thõi aslo.
7. Jezucho guneanv korchê khatir Son'vara disa tea mon'xak boro korit kai mhonn dhormxastri ani Farizev Jezuk tellun polletale.
8. Tancheô chintna vollkhun, hatak ar zal'leak Tannem mhollem: "Utth ani modekot ieun ubo rav." To utthlo ani ubo ravlo.
9. Ani Jezun tankam mhollem: "Sonv'ara disa kitem korum-ieta: borem kai vaitt? Jiv vanchoum-iet vô kaddum-iet? hem Hanv tumchê lagim vichartam".
10. Tednam tancher soglleancher nodor bhonvddaun Tannem tea mon'xak mhollem: "Tuzo hat sôdd." Tannem toxem kelem ani adlê bhaxen tacho hat sarko zalo.
11. Punn tancho rag ekdom’ choddlo ani Jezuk kitem korchem tem te ekameka lagim vicharunk lagle.
12. Magir oxem zalem: magnnem korunk Jezu eka dongrar gelo ani Devak magnnem korun Tannem ak'khi rat sarli.
13. Uzvaddtôch Tannem Aplea xisank apoile, tantlea bara zannank vinchun kaddle ani tankam Dhormdut oxem nanv-ui dilem.
14. Te he: Simanv - taka Pedru mhonn Tannem nanv dilem - ani tacho bhav Andre, Jakob, Juanv, Filip, Bartolomêv,
15. Matêv, Tomas, Alfevacho put Jakob, ani Krantikar mhonnlolo Simanv,
16. Jakobacho put Judas ani ghatki utorlo to Judas Iskariot.
17. Tanchê borabôr sokla ieun Jezu eka mollar ravlo; thõi Tachea xisancho vhôdd zomo ektthãi zalo, ani Judeia thaun, Jeruzalea thaun, ani doria-degechea Tir ani Sidon nogram thaun
18. Tachem utor aikunk vô aplea piddê-rogantlo boro zaunk ail'lo puskôll lôk zomlo; ani mhelle atme tras ditale toslim mon'xam borim zatalim.
19. Tachê koddsun êk gunn bhair sorun tankam borim kortalo dekhun, sogllo lôk Taka hat lavunk sôdtalo.
20. Dolle ubarun ani Aplea xisank polleun Jezun sanglem: "Gorib tim tumi subhagi, kiteak Devachem Raj tumchem.
21. Atam bhukeleant tim tumi subhagi, kiteak tumkam Dev dhadoxi kortolo. Atam rudon kortat tim tumi subhagi, kiteak tumi hansunk pavtoleat.
22. Mon'xachea Putak lagun tumcho dvês kortit ani tumkam sobhentlim bhairaitit tednam, tumkam opman'tit ani vaitt mhonnun tumchea nanvacher xirap ghaltit tednam, tumi subhagi.
23. Tea disa tumi khuxal zaun uddiô marat, kiteak motti vhoddli mozuri tumkam sorgar melltoli. Tôr tanchea purvozamnim provadiank toxench kelem.
24. Punn tumi girest mon'xamnô, tumchem kotta, kiteak tumchem sukh tumkam atanch mell'lem!
25. Atam dhadoxi asat tim tumi, tumchem kotta, kiteak tumi upaxi astoleat! Atam hanstat tim tumi, tumchem kotta, kiteak tumi roddtoleat ani rudon kortoleat!
26. Sogllo lôk tumchem borem uloita tednam kotta-kotta tumchem, kiteak tanche purvoz kuddea provadiank toxench kortale!
27. Punn tumkam, Mhaka kan ditoleank, sangtam: tumchea dusmanancho môg korat, tumkam zolltat tankam borem korat,
28. tumcher xirap ghaltat tankam axirvad diat, tumkam vaitt kortat tanchê pasot magat.
29. Konn tujea eka polear marit zalear, dusro-i polo taka dakhoi; tujem angavlem kaddun gheit taka tuzo jubo-i vhorunk addainaka.
30. Tujê lagim magit taka di, ani tuji vôst kaddun vhelea tachê koddchi ti portun magum naka.
31. Heramnim tumchê sorim kel'lem tumkam zai, toxench tumi-i tanchê sorim korat.
32. Tumcho môg kortoleancho tumi môg korxat zalear, tantum tumchem punnem koslem? Tôr patki porian apnnancho môg kortoleancho môg kortat.
33. Ani tumkam borem kortoleank tumi borem korxat zalear, tantum tumchem punnem koslem? Patki porian toxench kortat.
34. Zanchê lagchem porot ghetoleat mhonn tumi ravtat, tankam tumi kitem-i uxnnem dixat zalear, tantum tumchem punnem koslem? Dilam titlem-i porot gheunchea monan patki-i patkiank uxnnem ditat.
35. Punn tumi tumchea dusmanancho môg korat, tankam borem korat, ani porot gheunchi axa dhôrinastana herank uxnnem diat. Tednam tumkam vhoddli mozuri melltoli ani Bhov Vortea Devachim bhurgim tumi zatoleat; tôr onupkari ani khottea mon'xam sorim To konnvallo.
36. Zoso tumcho Bap doiall, toxinch tumi-i doiall zaiat.
37. Konnachich nit korum nakat ani tumchi-i Dev nit korcho na. Konnakuch guneanvkar korinakat ani tumkam-i Dev guneanvkar korcho na. Dusreank bhôgsat ani tumkam-i Dev bhôgxitolo.
38. Diat ani tumkam-i Dev ditolo; borem chikar map, damun-chepun, haloun ani oto-sôr suien bhôrlolem, Dev tumchê unttient ghaltolo; kiteak jea mapan tumi dusreank ditat, teach mapan Dev tumkam-i ditolo."
39. Jezun hi-i vopar tankam sangli: "Eka kudd'ddeachean dusrea kudd'ddeak vatt dakhounk zata? Dog-ui fonddant poddche nant?
40. Xis aplea guru poros vorto nhoi; xikun purnn zal'lo xis, to ki aplea guru sarko utortolo.
41. Tujea peleachea dolleant asa temkisor tum kiteak polletai, ani tujeach dolleant asa ti patti tuka dixtti poddona?
42. Tujea dolleantli patti tuka disona, tori tujea peleak mhonnttai: 'Ixtta mhojea, rav; tujea dolleantlem kisor mhaka kaddum di'. - oxem tujea peleak mhonnunk koxem tankot tuka? Arê ddhongia, tujea dolleantli patti poili kadd ani magir tujea peleachea dolleantlem kisor kaddunk tuka nivoll dixtti poddtolem.
43. Borem zhadd vaitt foll diit-xem na; nhoi mhonn vaitt zhadd borem foll diit-xem na.
44. Tachea folla pormannem dôr-ek zhadd vollkhunk mellta. Kanttianchim konnem anjiram kaddleant mhonn na, nhoi mhonn sorantteacheô konnench dakô kaddloleô na.
45. Boro monis aplea kallzachea borea bhanddarantlem borem kaddun dakhoita; vaitt monis aplea vaitt bhanddarantlem vaitt kaddun dakhoita. Tôr kallzantlem bhoron òt'ta tench tonddantlea utramnim vhanvta.
46. Mhaka tumi 'Saiba! Saiba!' kiteak mhonnttat ani Hanv sangtam tem korinant?
47. Jim konn Mhojê-xim ietat, Mhojem utor aikotat ani tea pormannem choltat, tim sogllim konna sarkim tem sangtam:
48. Ghor bandtolea eka mon'xa sarkim tim; tannem khôl khonnun khoddpacher buniad marli. Anvr ailem tednam, tea ghoracher udkacho lôtt boslo, punn tem halounk zalem na; kiteak tem ghott bandlolem.
49. Ani jim konn aikotat, punn kãich korinant, tim buniad marinastana aplem ghor dhortorê borabôr bandtolea mon'xa sarkim; anvr ieun tacher udkacho lôtt bosona fuddem tem rokddench mòddlem ani tachem sarkem ghorttann zalem!"
