1. Ani Son'var zatôch poilea disa, bhov sokallim, apnnem toiar kel'le pormoll gheun teô bailô somadhixim aileô;
2. ani somadhi veli fatôr pelean dhukol'loli tãnnim dekhli.
3. Punn bhitôr voch zalear, Somia Jezuchi kudd tankam mell'li na.
4. Ani hê vixim mottea gondhollaks ampoddloleô astana, ovchituch loklokit vostram nheslole dog dadle tanchê kuxik ube zale.
5. Tãnnim bhieun khala man bagaili tednam, hãnnim tankam mhollem: "Jivo asa Taka tumi mel'leam modem kiteak mhonn sôdtat?
6. To hanga na; Taka Devan punorjivont kela! Galileiant astana To tumchê lagim kitem uloil'lo tacho ugddas korat;
7. Tannem oxem sanglolem: 'Mon'xachea Putak Dev patki mon'xanchê adhin kortolo, Taka khursar morunk pavoitolo, ani tisrea disa Taka punorjivont kortolo. Hem sogott Tachê vixim Devachi khu-xi.' "
8. Tednam tankam Tachea utrancho ugddas ailo.
9. Ani somadhi sorxileô porot vochun ,tãnnim tea Ikra zannank ani heram somestank hem sogllem kollit kelem.
10. Hi khobor Dhormdutank sangli teô bailô heô: Magdalachi Maria, Juana, Jakobachi avoi Maria ani tanchea sangata asleô teô her bailô.
11. Tankam him utram naka zal'li kanni koxi disli ani tãnnim tanchem sotmanlem na.
12. [Punn Pedru utthun somadhi-xim dhanvun gelo ani voddôv ghalun tannem oli mat kuxin dovorloleô dekhleô, ani kitem zalem kai mhonn apnnach bhitôr ojap zaun to porot gelo.]
13. Teach disa oxem ghòddlem: tanchê bhitorle dog zann Jeruzalea thaun sumar ikra kilometr pois aslolea Emaus nanvachea gramant vetale;
14. ani hea sogllea ghodditanchi gozal ekameka lagim te korit asle.
15. Ani oxem zalem: te ekameka lagim uloun cheorcha kortastana, khud Jezu lagim sorun tanchê borabôr cholunk laglo.
16. Punn tãnnim Taka vollkhona zaunk tanchea dolleancher sai koxi ail'li.
17. Tannem tankam mhollem: "Vatter choltana ekameka lagim tumi kortat teô gozali kosleô?" Te thamble; tanchem tondd chintest-dukhest aslem.
18. Kleopas nanvachea tantlea eklean zap diun mhollem:" Jeruzaleant hea disamnim ghòddlam tachi khobor naslolo tum ekloch hanga iatrekar kitem?"
19. Hea utrak Tannem mhollem: "Kitem ghòddlam?" Tãnnim Taka mhollem: "Nazaretkara Jezu vixim ghòddlam tem: Deva ani ak'khê porjê mukhar kornniamnim toso utramnim podven bhòrlolo provadi To aslo.
20. Amchea mukhel iadnikamnim ani vhoddilamnim Tacher mornnachem formonn marunk Taka dhôrun dilo ani khursar marlo.
21. Tôr Israelak soddoitolo to Hoch mhonn ami ravtaleanv. Titlench nhoi: heô soglleô vostu ghòddlear az tisro dis.
22. Tea bhair, amchê bhitorlea kãi bailamnim amkam ghabrailim: uzvaddchê adim Tachê somadhixim teô geleô,
23. punn Tachi kudd tankam mell'li na; thõi apnnank devdut-ui dixtti poddle ani To jivo asa, oxem te sangtat mhonn porot ieun tãnnim amkam khobor dili.
24. Dekhun amche boraborche kãi zann somadhi-xim gele ani bailamnim sanglolem toxench tankam mell'llem, To mat dixtti poddlo na."
25. Tednam Tannem tankam mhollem: "Kitle mhonn gollie tumi! Provadiamnim sanglolem titlem-i sotmanunk kitle mhonn zodd monache monis tumi!
26. Devachê khuxê pormannem, Kristan hem sogllem sõschem ani oxem Aplê mhoiment provês korcho, mhonn nokllo asleat tumi?"
27. Magir Moizesa ani sogllea provadiam meren Apnnak lagtat titlea-i xastrancho ôrth To tankam sangunk laglo.
28. Itlea mhonnosôr, apunn vetale tea grama lagim te pavle, ani Jezun Apunn fuddem vetaxem korun dakhoilem.
29. Punn tãnnim poratun mhollem: "Amchê-xim rav, tôr sanz zait aili ani dis dharir poddcho zalo." Ani To tanchê sangatim ravunk bhitôr gelo.
30. Tanchea sangata jevnnak boslolo astana, Tannem unddo ghetlo, Devak dhin'vaslo ani to môddun tankam dilo.
31. Tednam tanche dolle ugòddle ani tãnnim Taka vollkholo, punn To tanchea dolleam mukhavelo nanch zalo.
32. Tednam tãnnim ekamekak mhollem: "To vatter amchê kodde uloitalo ani Povitr Pustokancho ôrth amkam ditalo tednam, amchem kalliz bhitorlê-bhitôr hulpotalem nhoi?"
33. Ani teach vellar utthun te Jeruzaleak porot gele ani Ikra zann ani tanchea sangata ektthovlolim aslim tim tankam mell'lim.
34. Hãnnim tea dogank sanglem: "Somi khoroch punorjivont zala ani Simanvak dixtti poddla."
35. Ani tãnnim dogamnim vatter ghòddloleachi khobor dili ani koxê bhaxen unddo môddta astana apnnem Taka vollkholo, tem sanglem.
36. Oxem uloita thõich astana, khud Jezu tanchê modekot ubo zalo; Tannem tankam mhollem:" Xanti tumkam!"
37. Ghabrun ani bhieun, apunn polletat to êk bhut mhonn tim somzolim.
38. Punn Tannem tankam mhollem: "Tumi ghaborleat kiteak? ani osle dubav tumchea monant uprastat te kiteak?
39. Mhoje hat-pãi polleiat; tôr Hanvuch to. Sanspun polleiat: Mhaka mas ani haddam asat mhonn tumi dekhtat toxem bhutak asonant."
40. Oxem uloun Tannem Aple hat ani pãi tankam dakhoile.
41. Khuxalkaien bhoron, tim ozun dubavtalim ani itlim thottaklolim dekhun, Tannem vicharlem: "Tumchê kodde hanga kitem tori khaunk asa?"
42. Tãnnim Taka bhazlolê masllecho kuddko dilo;
43. to Tannem tanchê hujir khelo.
44. Ani Tannem tankam sanglem: "Tumchê sangatim Hanv ozun aslom tednam, Hanvem tumkam sanglolem tem hench: Moizesachi Somurt, Provadi ani Stotram, hantum Mhojê vixim jem boroil'lem asa tem sogllem, Devachê khuxê pormannem, sompadon ieunchem aslem."
45. Magir xastrancho ôrth somzunkTannem tanchi môt ukti keli
46. ani tankam mhollem: "Boroil'lem asa tem oxem: Krist koxtt-moronn sõstolo, tisrea disa To mel'leantlo punorjivont zatolo,
47. ani Jeruzalea thaun suru korun Tachea nanvan jivit-bodlop ani patkanchem bhogsonnem sogllea porzank porgôtt zatolem.
48. Tumi hea ghòddnnianchi sakxi diunk zai.
49. Polleiat, Mhojea Bapan bhasailam tem Hanv tumcher dhaddcho asam; mhonnttôch sorgavelê xoktin tumi bhoro-sôr Xarant ravat."
50. Magir Jezu tankam bhair Betaniê porian gheun gelo. Ani hat uklun tancher Tannem axirvad ghalo.
51. Ani oxem ghòddlem: Tancher axirvad ghalta astana Jezu tanchê sorxilo koddsorlo ani Devan Taka sorgar ubarun vhelo.
52. Ani saxttangim poddun tãnnim Jezuk nomoskar kelea uprant, vhoddê khuxalkaien tim Jeruzaleak porot gelim
53. ani thambonastana Devmondirant Devachi tust ani vhoddvik korit aslim.
