1. Tednam zomloli soglli sobha utthli ani Jezuk gheun Pilata-xim geli.
2. Ani te Jezucher oxim garamnim korunk lagle: "Amchea lokak bonddai korunk fuloitana, Somrazak dôndd farik korunk mona kortana, ani apunn Krist, êk rai mhonn sangtana ami taka dhôrla."
3. Pilatan Tachê lagim vicharlem: “Tum Judevancho raza, hôi?” Tannem zap dili: “Tunch toxem sangtai. "
4. Pilatan mukhel iadnikank ani lokachê zhunddik mhollem:" Hea mo'nxacho kosloch guneanv mhaka mellona."
5. Punn tãnnim tench zhoroun mhollem: "Ak'khea Judeiant, Galileia meren hangasôr porian, aplê xikovnnen lokak to unchambollaita."
6. Oxem mhonnlolem aikotôch, To Galileikar kai mhonn Pilatan vicharlem;
7. ani, Herodichea odhikara khal To poddta mhonn gomlea uprant, tannem Taka Herodi-xim dhaddlo, kiteak ho tea disamnim Jeruzaleak aslo.
8. Jezuk polleun Herod zobôr khuxi zalo, kiteak Taka polleunk zaito kall-sun to axetalo, karonn Tachi khobor tannem aikol'li, ani Tachea hatantlem koslem-i ek vismit apnnak polleunk melltolem mhonn to ravtalo.
9. Sobar bhasamnim tannem Jezuk vichar kele, punn Jezu taka kãich zap dina zalo.
10. Mukhel iadnik ani dhormxastri Tacher thambonastana guneanv ghalit ravle.
11. Tednam Herodin aplea soinikam borabôr Taka beman kelo, Taka kenddlo ani sobit dhovem anglem nesoun Taka Pilata-xim porot dhaddlo.
12. Ani Herod ani Pilat, hachê adim ekamekache dusman asle te, teach disa ixtt zale.
13. Mukhel iadnikank, vhoddilank ani lokak ektthãi korun
14. Pilatan mhollem: "Lokak bonddai korunk fuloita mhonnun tumi hea mon'xak mhojê-xim haddla; ani, polleiat, tumchê hujir hanvem tachi chovkoxi keli ani tumi tacher firiad ditat tê vixim mhaka hea mon'xacho êk-punn guneanv mell'lo na.
15. Ani Herodik-ui mell'llo na. Tannem tôr taka amchê-xim porot dhaddla. Ani, tumi zannont, moronn favo toslem kãi-ek tannem korunk na.
16. Dekhun taka khast laitam ani sôddtam."
17. [Utsova somoim Pilatan lokachê khuxê pormannem eka koidiak sôddun diunk zai aslo.]
18. Lokachea ak'khea zomean huiêl marun mhollem: "Haka kadd ani amkam Barab'basak sôddun di."
19. Xarant razbhông ani prannghat tannem kel'lo dekhun, Barab'basak bondkhonnint ghal'lo.
20. Jezuk suttka diunk sôdtalo dekhun, Pilat novean tanchê lagim uloilo,
21. punn tim odikuch arddunk laglim: "Taka khursar mar! Khursar mar taka!"
22. Tannem tisrê pavtti tankam mhollem: "Punn tannem kitem vaitt kelam? Moronn favo toslo guneanv tachê sovem mhaka melloch na. Dekhun khast lavun taka sôddun ditam."
23. Punn tim, vhoddlo boball korun, Taka khursar mar mhonn thambonastana magtalim; ani tanche talle choddot vetale.
24. Xekim tim magtat toxem korchem mhonn Pilatan tharailem.
25. Mhonnttôch bonddai ani khun kel'lê khatir bondkhonnint ghal'lea mon'xak, tim magtalim toxem, tannem suttka dili ani tankam zai toxem korunk Jezuk tanchê adhin kelo.
26. Taka gheun vetastana, konn-eklo Siren'kar Simanv gramantlo ietalo; tãnnim taka dhôrlo ani Jezu pattlean khuris gheun vochunk tachea khandar to dilo.
27. Tachê pattlean lokachi ani toxench Tachê pasot roddun unch tallean vilap kortolea bailanchi vhoddli urpônz choltali.
28. Tednam tanchê vatten vollon Jezun mhollem: "Jeruzaleachea dhuvamnô, Mhojê khatir roddum nakat, punn tumchê khatir ani tumchea bhurgeam-ballam khatir roddat.
29. Tôr, chotrai dhôrat, oxem mhonnpache dis ietole: 'Bhagi teô vanztteô bailô, bhagi te zolm diunk naslole kusve, bhagi tim dud diunk naslolim hodd'ddim!'
30. Tednam porvotank 'Amcher poddat!' ani dongrank 'Amkam dhampat!' oxem mhonnunk lagtolim.
31. Olea lankddak oxem kortat zalear, sukea lankddachem kitem zaunchem na?"
32. Anink dogam guneanv karankTachê borabôr jivexim marunk vhortale.
33. Ani Kott'tto mhonnttat tea zagear pavtôch, Taka ani tea dogam guneanvkarank-ui thõi khursar marle, ekak Tachê uzvê kuxik ani dusreak davê kuxik.
34. Jezun mhollem: "Bapa, tankam bhogôs; apunn kitem kortat tem te nokllot." Magir tãnnim sorti ghalun Tachim vostram vanttlim.
35. "Ani lôk ubo ravun polletalo, punn vhoddil Tacheô kenddnniô korun mhonnttale: "Hannem dusreank soddoilim; ho Devanuch vinchum kaddlolo Devacho Krist zalear, hannem apnnakuch soddouncho."
36. Soinik-ui Tacheô kexttaiô kortale ani lagim ieun ani Taka xirko diun
37. mhonnttale: "Tum Judevancho raza zalear, tukach suttka di!"
38. Ani Tachea mathea voir boroun marlolo lêkh oso aslo: "Ho Judevancho raza."
39. Khursar umkolltolea guneanvkarantlea eklean Tachi ninda korun mhollem: "Tum Krist nhoi? Tôr tuka ani amkam-i soddoi!"
40. Punn dusrean zap diun oxi taka bobatt keli: "Têch khastik tum sampoddlolo astana, tum Devak bhienãi?
41. Amkam tori hem nitin favo zalam: amchea kortubam pormannem ami bhôgtanv; punn hannem kãich vaitt korunk na."
42. Ani tannem mhollem:" Jezu, raiponnachi podvi gheun tum ietai tednam, mhozo ugddas kôr."
43. Jezun taka zap dili: "Hanv tuka khorench sangtam, aiz tum Mhojea sangata voinkuttant astoloi!"
44. Sumar donpar zal'lo ani tisrea para porian sogllea desacher kallôkh poddlo. Suria palovlo;
45. ani Devmondirantlea Gabhareacho podd'ddo modekot doxim fanttlo.
46. Ani vhoddlean arddun Jezun mhollem: "Bapa, Tujea hatant ghaltam Mhozo otmo." Oxem mhonnun Tannem prann sôddlo.
47. Ghòddlam tem polleun, xotpotin Devak vakhann'nni diun mhollem: "Khoreaninch ho boro monis aslo."
48. Hea dekhaveak zomlolo sogllo lôk, zal'lim ghodditam polleun, hodd'ddim boddoit porot vochunk laglo.
49. Tachê vollkhichim sogllim zannam pois ubim ravun hem polletalim, toxench Galileia thaun Tachê pattlean ail'leô teô bailô.
50. Ovchit thõi pavlo Juze nanvacho êk dadlo; to Mha-Dhormsobhecho vangddi aslo, êk boro ani dhormvont monis.
51. To Judeiachea Arimateia nograntlo aslo. Tanchê moslotik ani kortubank to kobul zaunk naslo; ani Devachea Rajeachi vatt to polleun aslo.
52. Tannem Pilata-xim vochun Jezuchi kudd magli;
53. ani ti denvoun êkê olin guttlaili ani tethunver konnakuch dovrunk naslo toslê khoddop katrun kel'lê somadhint Taka dovorlo.
54. To dis Toiarecho Dis aslo ani Son'var suru zauncho vêll pavlolo.
55. Galileia thaun Tachê borabôr ail'lea bailamnim, pattlean vochun, somadhi polleli ani koxê bhaxen Tachi kudd tantum dovorlea ti, hem-i chotraien polleun ghetlem.
56. Magir porot vochun pormollache ani makhnneche nog toiar kele. Son'vara disa kaidea pormannem tãnnim visôv ghetlo.
