1. Tea mhonnosôr Jezu bhonvtim khub gordi zali ani hozaramnim lôk ekamekak chirdditalo; tednam poilo Aplea xisam lagim uloun Tannem mhollem: "Farizevanchea khomira vixim mhonngê tanchea ddhongeponna vixim chotrai dhôrat.
2. Atam dhamplolem asa titlem-i uktem zalea xivai ravchem na.
3. Tôr kallokhant tumi sanglam tem disa-uzvadda aikunk ietolem ani khasgi kuddant futfutun tumi uloileant tem pattsancher porgôtt zatolem.
4. Tumkam, Mhojea ixttank, Hanv sangtam: kuddicho jiv kaddtat ani tachê magir anink kãi-ek tanchean korunk zaina, tosleank tumi bhieum nakat.
5. Punn tumi konnak bhieunchem tem tumkam sangtam: jiv kaddlea uprant iemkonddant uddounk tank asa Taka bhieiat. Hôi, Hanv tumkam sangtam, Taka mat bhieiat.
6. Don as'sarionank panch xerkam viktat nhoi? Tori astana, tantlea ekleachi-i Devak visôr poddona.
7. Tumchê tokleche kens porian soglle mêzlole asat. Mhonnttôch bhieum nakat. Xerkanchea bhirea poros tumi odik unch molachim.
8. Tumkam sangtam: mon'xam hujir konn-ui Mhaka manun ghetit zalear, tankam Mon'xacho Put-ui Devachea dutam hujir manun ghetolo.
9. Punn konn-ui mon'xam hujir Mhaka manun ghena zatit, tankam Devachea dutam hujir Hanv-ui manun gheuncho na.
10. Ani konn Mon'xachea Putacher add kitem-i uloitit, Dev tem tankam bhôgxitolo; punn konn Povitr Atmeachi ninda kortit zalear, Dev tit ankam bhôgxicho na.
11. Tumkam devsthanamnim ani nitidaram vô odhikariam mukhar vhortit tednam, koso ani kitem zobab diuncho, vô kitem ulounchem tem, husko dhôrum nakat.
12. Tôr tumi kitem mhonnunk zai tem Povitr Atmo, to vêll ietôch, tumkam xikoitolo."
13. Lokachea zomeantlea konn-eklean Jezuk mhollem: "Guruji, amkam poddlam tea daizacho mhozo vantto kuxin kaddun mhaka di mhonn mhojea bhavak sang."
14. Punn Tannem taka oxi zap dili: "Mon'xa, tumchê bhitôr neainit vô vanttop korunk Mhaka konnem nemla?"
15. Magir Tannem tankam sanglem: "Chotrai dhôrat ani dhongirestkaiechi axa sarkich sôddun diat, kiteak konnank puskôll girestkai asli-i zalear, tanchem jivit ticher dhòrlolem na."
16. Magir Tannem tankam êk vopar sangli: "Êk girest monis aslo ani tachea xetam-bhattank khub pik zalem;
17. tednam to apnnach bhitôr chintunk poddlo: 'Mhozo pik-paddo bhôrun dovrunk mhojê lagim zago na. Hanvem kitem korchem?'
18. Ani tannem mhollem: 'Oxem kortolom: mhoje kodde môddun, tanchê-kui vhoddle bandtolom ani mhojea xetam-bhattanchem sogllem utpon ani mhozo astêmal tantum bhôrun dovortolom.
19. Magir mhakach oxem mhonnttolom: jiva mhojea, sobar vorsank puro-so khub mhal tujê adhin asa; visôv ghe, kha-pie ani mouz mar.’
20. Punn Devan taka mhollem: 'Arê pixea, aiz rati tujê koddlo tuzo jiv porot magcho asa. Mhonnttôch tunvem toiar korun dovorlãi tem konnank?'
21. Apnnak ttheve ektthãi kortat punn Deva mukhar girest zaunk nant, tanchi gôt hi!"
22. Uprant Tannem Aplea xisank mhollem: "Dekhunuch Hanv tumkam sangtam: jiva khatir kitem jevchem-khaunchem, vô kuddi khatir kitem nheschem-pangurchem, tê vixim huskeum nakat.
23. Kiteak mhollear jiv jevnna poros odik molacho ani kudd nhesnna poros odik molachi.
24. Kavlleancher barkaien nodor marat; te vompinant vô lunvinant, ani tanchê lagim kodde ani orôv dovorche zage nant; tori Dev tankam pôsta. Suknneam poros kitlim odik molachim nhoi tôr tumi?!
25. Ani huske kaddun tumchem auk êk hat-bhôr vaddounk tumchê bhitorlea konnak tank asa?
26. Itli lhan vôst tumchê kodde ghoddona tôr, kiteak mhonn heram vostum vixim tumi huske kaddtat?
27. Konelam koxim vaddtat tem chintun polleiat. Tim koxtt korinant, sut-ui kaddinant; tôr Hanv tumkam sangtam: Solomon porian sogllea aplea dobajeant tantlea eka sarko nheslo na.
28. Tôr aiz xetant asa ani faleam kaddun ujeant uddoitat tem tonn hea jin'san Dev nhesoita zalear, tea-vôn kitlo odik tumkam To nettouncho na, holkea bhavarthachea mon'xamnô?
29. Mhonnttôch kitem khaunchem, vô kitem pieunchem, hacho vichar korunk bosum nakat, ani monant husko dhôrun jieum nakat.
30. Oslea soglleacher iklo dovorta sonvsarantlo onbhavarthi lôk. Tumkam hea soglleam vostunchi goroz mhonn tumcho Bap tôr zannoch.
31. Tumi zalear, Devachea Rajeachea nemam pormannem manddlolea jivitacher tumcho iklo dovrat ani sogllem her-ui To tumkam ditolo.
32. Supurlea hindda, kosloch husko dhôrum nakat, kiteak tumkam Raj diunchem mhonn tumchea Bapak khuxi zalea.
33. Tumchê kodde asa tem vikun dhormdan korat. Pornneô zaun pinzonant tosleô potiô, soron-sorona toslo tthevo, sorgar tumkam ballgun dovrat: thõi chôr pavona ani sannôs-ui khaun ibadd korina.
34. Tuzo tthevo asa thõi tujem kalliz-ui astolem.
35. Tumchea penkttak bandat ani tumchea hatamnim pettloleô ponnttiô gheun ravat.
36. Aplo dhoni logna-utsova thaun porot ieun darar marina fuddem, taka dar ugôddchê khatir tachi vatt polleun ravtat toslea mon'xam porim tumi zaiat.
37. Dhoni ieta tednam taka zagrut melltit te chakor bhagi! Khorench tumkam sangtam, to aplea penkttak bandtolo, tankam jevnnak bosoitolo, ani apunn tanchê modem bhonvun tanchi seva kortolo.
38. Ani modianir vô fantea pahra adim porian to pavot zalear ani te taka toxench melltit tôr, te chakor bhagi!
39. Hem mat zanno zaiat: khõichea vogtar chôr ietolo to ghoracho dhoni zanno aslo zalear, dubavavinn to zagrut ravtolo aslo ani aplem ghor fôddun nagounk diuncho naslo.
40. Tumi-i toxinch toiar ravat, kiteak chintinaslolea vellar Mon'xacho Put ietolo."
41. Tednam Pedrun mhollem: "Somia, amkanch vô heram somestank-ui Tum hi vopar sangtai?"
42. Somian oxi zap dili: "Ghorant asloleank vogtar jevonn vaddun diunk, dhonian aplea ghorabeacher odhikar dil'lo konn visvaxi ani xanno karbhari zait-so tumkam dista?
43. Aplo dhoni ieta tea vellar, aplem kam' korit astam taka mellot to chakôr subhagi.
44. Hanv tumkam khorench sangtam, apnna kodde asa titleacher-ui to taka odhikar ditolo.
45. Punn 'porot ieunk mhozo dhoni lambai korta', oxem to chakôr apnnach bhitôr mhonnun, heram chakrank ani chakornink marunk ani apunn khaunk-pieunk ani bebdikai korunk lagot zalear,
46. to ravonaslolea disa ani to nokllo aslolê ghoddier tea chakracho dhoni pavtolo ani taka mornnachi xikxa laitolo ani bhavarth-naslolea mon’xanchea vangdda taka bhair uddoitolo.
47. Aplea dhoniachi khuxi kitem ti zanno zaun-ui, ti pallunk toiari porian korunk na toslea chakrak khub sotteancho mar poddtolo.
48. Ti kitem ti nokllo asloleak, tachea kortubank khast favo zalear taka thoddech sotte poddtole. Jea konnank Devan chodd dilam, tanchê koddchem To chodd magtolo; ani jea konnank Devan chodd patielam, tanchê koddlem To chodd gheunk ravtolo.
49. Prithumer uzo pettounk Hanv ailam, tori to petton bhogbhogtalo zalear, kitlo mhonn Hanv khuxi zauncho naslom!
50. Hanvem ek snan gheunchem asa, ani tem ghei porian Mhaka koxê bhaxen jivan jiv na zala!
51. Hanv prithumecher xanti haddunk ailam, oxem tumkam dista? Hanv tumkam sangtam: na, bogor bhêd ghalunk Hanv ailam.
52. Hea fuddem ekach kuttumbant panch zannam modem oxi futt poddtoli: tegam dogancher add ani dogam tegancher add;
53. bapui putacher add ani put bapaicher add; avoi dhuvecher add ani dhuv avoicher add; sasu sunecher add ani sun sasucher add."
54. Tannem lokak anink-ui mhollem: "Ostomtê thaun ek kup choddon manddta tem polleun, tumi rokddinch paus ieta mhonnttat, ani toxench ghòddta;
55. ani dokhinnê thaun varem martôch tumi mhonnttat: 'Borich gormi zatoli', ani toxench ghòddta.
56. Arê ddhongiamnô, prithumechem ani mollbachem tondd koxem parkunchem tem tumi zannont; ho kall parkunk tumchê lagim koxem zaina tôr?
57. Nitt-sarkem kitem tem tumchinch tumi kiteak tharainant?
58. Dekhik: tujea vadia borabôr odhikaria-xim vetastana, tumcho tontto sompounk vatteruch zata titlem-i kôr; na zalear, tim tuka nitidara-xim ôddun vhortit, ani nitidar tuka kosabachea hatant diit, ani kosab tuka bondkhonnint ghalit.
59. Hanv tuka sangtam, tuzo nimanno lepton tunvem farik kori-sôr thõisorli tuka suttka mellchich na."
