1. Tednam panchvea devdutan apli tuturi vazoili. Ani mollba thaun prithumecher ek noketr poddlolem tem hanvem dekhlem: tea devdutak Devan khol-khol Patallachi chavi dil'li.
2. Noketran patall ugôddlem ani tantlo dhunvôr voir choddlo, eka lamb-rund agtteachea dhunvra sarko. Patallachea dhunvran suria kallo zalo ani ak'khê prithumecher soglloch kallôkh zalo.
3. Tea dhunvrantle toll bhair sorun prithumecher ximpoddle ani sonvsarant vinchvank boll asa toslench tankam-i boll dilem.
4. Zomnichea tonnak, vonospotik ani rukhank-zhaddank kitench vaitt korina zaunk, punn aplea kopalar Devacho xik'ko naslo tea mon'xank mat vaitt korunk Devan adnia ghali.
5. Tollamnim mon'xank jive marunk odhikar dil'lo naslo, punn fokot panch mhoine tankam vollvollaunk zatalem. Vinchvan mon'xak kuns laitôch veg martat tosli foddafôdd toll mon'xank ditale.
6. Tea somoiar mon'xam morunk sôdtolim punn tankam mellchem na, mornnak axetolim punn moronn tanchê thaun pois dhanvtolem.
7. Te toll zhuzak toiar zal'lea ghoddeam sarke distale; tanchê tokler bhangarache mukutt koxe asle, ani tanchim tonddam mon'xanchea tonddam sarkim aslim.
8. Tanche kens bailanchea kensam sarke, ani tanche dant xinvanchea dantam osle.
9. Tanchê chhatiek lokhonddachem kott'ttem koxem aslem, ani zaitea ghoddeancheô ghaddiô vegan zhuzak dhanvtana avaz kortat toslo tanchea pakotteancho avaz aslo.
10. Tankam vinchvam porim xempddiô asleô ani xempddiank kunsam, ani aplea xempddiamnim mon'xank panch mhoine vollvollaunk tankam podvi asli.
11. Tankam êk patxai aslo, ani to mhollear Patallacher podvi aslolo devdut; Hebrêv bhaxen tachem nanv Ab'badon, ani Grik bhaxen Apol'lion, mhonngê nisontton korpi.
12. Poilem noxtt oxem somplem; hachê magir anink don noxttam ieunchim asat.
13. Uprant sovea devdutan apli tuturi vazoili ani Deva mukhar bhangarachi vedi asa tichea konnxeantlean êk tallo ietalo to hanvem aikolo.
14. Tuturi gheun aslo tea sovea devdutak tannem mhollem: "Vorixtt Eufrat nodi-xim char devdut sankllimnim bandlole asat tankam sôdd."
15. Tea char devdutank sôddle; hea vorsachea hea mhoineachea hea disachea heach vorak mon'xakullacho tisro vantto jivexim marun uddounk tankam Devan toiar korun dovorlole.
16. Tanchem loskor kitlem aslem tem hanvem aikolem: don'xim lak ghoddesvar.
17. Ani mhojea dorxonant ghodde ani tancher boslole ghoddesvar hanvem dekhle: tanchê chhatiek ujea vori kott'ttim aslim, rotna vori nillim ani gondhoka vori hollduvim. Ghoddeancheô tokliô xinvanchea tokliam sarkeô asleô, ani tanchea tonddantlean bhair sortalo uzo, dhunvôr ani gondhok.
18. Hea tin piddamnim tanchea tonddantlean bhair sortalo to uzo, dhunvôr ani gondhok mon'xakullacho tisro vantto marun uddoilo.
19. Karonn ghoddeanchem boll tanchea tonddant asa, ani toxench tanchea xempamnim, kiteak tancheô xempô sorpam sarkeô, ani tankam lokak mar ditat tosleô tokliô asat.
20. Hea piddamnim marinastana urlolo tea lokan apleach hatanchea kamank fatt korunk na, nhoi mhonn devcharank bhôzpachem sôddunk na. Aikunk ani cholunk xokonant toslea bhangarachea, rupeanchea, pitullchea, fatrachea ani lankddachea kud'dea devanchi bhozônn tim korit ravlim.
21. Toxench tãnnim aple khun, aple jadu, aplem pozoddponn ani apleô choriô-nagovnneô sôddun diunk nant.
