1. Magir polle zalear, ovchit Sion Dongracher ubo aslolea Menddreak hanvem dekhlo; Tachê borabôr ekxem-chovêchallis hozar(144,000) lôk aslo: tanchea kopalar Tachem Nanv ani Tachea Bapaichem Nanv boroil'lem aslem.
2. Ani ghosghoxeachea avaza bhaxen ani khoddegant goddgoddeachea ghonnghonna sarko sorgar thaun ietalo to êk tallo hanvem aikolo; ani toxench hanvem aikolo to avaz kin'noriô vazoitoleanchea nada porim aslo.
3. Xinvasona mukhar ani char jivea rochnnam ani zannteam fuddem ho lôk ek novem git gaitalo; sonvsarantlim soddoun ghetleant tea ekxem-chovêchallis hozar mon'xam bhair konnacheanuch tem git xikunk zai-naslem.
4. Him mon'xam sarkinch nirmoll, kodinch boxttonk naslolim; tim sodanch Devachi purnn bhokti korun aileant ani kud'dea devank tãnnim kodinch bhozunk nant. Zõi Menddro veta, thõi Tachê pattleantim-i vetat. Devak ani Menddreak bhettoil'lem prothom' foll koxem mon'xam modlim tankam soddoun ghetleant.
5. Tãnnim kednanch fôtt marunk na ani tanchea jivitant koslench kollonk-khot na.
6. Tea uprant anink êk devdut unch varear uddtalo to hanvem dekhlo; prithumer jietoleank, mhonngê dôr-eka desak, dor-eka kullak, dôr-êkê bhaxechea lokak, ani dôr-êkê porjek porgôttchê khatir, tachea hatant sasnnachem xubhvortoman aslem.
7. Tannem vhoddlean mhollem: "Devachi bhokti korat ani Taka mhoima diat! Kiteak Tannem mon'subi korcho vêll pavlo. Zannem rochleat sôrg ani sonvsar, somdir ani udkacheô zhori, Taka saxttangim poddun nomoskar korat."
8. Dusrea eka devdutan uprant mhollem: "Poddlem rê poddlem! Tem vorixtt Babiloniechem xar poddlem! Tannem aplo soro aplea kamcharacho khôr soro sogllea porzank dilo."
9. Tednam tisrea eka devdutan tanchê pattlean vhoddlean mhollem: "Jim konn savzak ani tachê murtik saxttangim poddun nomoskar kortat ani aplea kopalar vô aplea hatar tacho xik'ko ghetat,
10. tankam-i Devachea krodhacho soro pieuncho poddtolo; to nirbhêl soro Tannem Aplea krodhachea patrant otun dovorla! To soro pietit titlim-i povitr devdutam hujir ani Menddrea hujir ujeant ani gondhokant tollmolltolim,
11. tankam tollmollaita tea ujeacho dhunvôr sodam-sodam choddot astolo. Savzak ani tachê murtik pãiam poddtat tankam ani tachea nanvacho xik'ko ghetla titleankui dis-rat visôv na.
12. Hea pasot Devacheô adnia samballtat ani Jezucher bhavarth tthevtat tea bhoktank thirai asunk zai."
13. Tea uprant sorgar thaun oxem mhonnttalo to êk tallo hanvem aikolo: "Hem boroi: 'Somiachea ekvottant mortat tim subhagi! Khorench khorem, tanche koxtt ani vavr somple, atam thaun tankam somadhan melltolem, kiteak tim apleô boreô kornniô gheun vetat. Hôi, khorench tim bhagi, mhonnta Atmo!' "
14. Anink-ui polle zalear, ovchit ek dhovem kup mhaka dixtti poddlem ani tacher boslolo konn-eklo mon'xachea puta sarko; tachê tokler êk bhangaracho mukutt ani hatant dharicho êk villo aslo.
15. Tednam anink êk Devdut Gabhareantlo bhair sorlo ani kupacher bosun aslo taka tannem vhoddlean mhollem: "Tuzo villo lai ani lunv, karonn lunvnnecho vêll pavlo ani prithumechem xet pikun suklam."
16. Uprant kupacher boslolo aslo tannem prithumek aplo villo lailo ani prithumechi lunvnni keli.
17. Tednam sorginchea Gabhareantlo anink êk devdut tosloch dharicho villo gheun bhair sorlo.
18. Magir ujeacher odhikar aslolo anink êk devdut vedi thaun bhair sorlo. Tannem dharicho villo aslolea dutak vhoddlean sanglem: "Tuzo dharicho villo lai ani prithumechê dak-velicheô dakô katrun kadd, karonn dakanche gons pikle."
19. Tednam devdutan aplo villo prithumek lailo ani prithumechê dak-velicheô soglleô dakô katrun kaddleô ani Devachea krodhachea vhoddlea sorea-ghanneant ghaleô.
20. Dakô pãiamnim pillun kaddpacho ghanno xara bhair aslo; thõi teô dakô pillun kaddleô ani tancho rogta-sarko tambddo ros bhair sorlo; rosacho vhall tis kilometranchê lambaiek pavlo ani sumar dêdd metr unch aslo.
