1. Tednam sorgar aslolê vhôdd urponjicho avaz hanvem aikolo; "Sorvesporak zôi! Devan amchem taronn kelem, Takach favo mhoima, Tachich soglli podvi!
2. Nitin To zhôddti korta ani neaia pormannem To khast laita! Aplea pozoddponnan sonvsar kusoitali tea nanv vostê xindôll-bailek Tannem khast laili; Aplea chakranchem tinnem rogot vikrailem dekhun Tannem tika khast laili."
3. Anink êk pavtt tãnnim oxi bob marli: "Sorvesporak zôi! zôi! Babiloniecho dhunvôr thambonastana voir choddot-choddot veta!"
4. Tednam chovis zannteamnim ani char jivea rochnnamnim xinvasonar bosun aslolea Deva mukhar saxttangim poddun oxem mhollem: "Amen! Sorvesporak zôi!"
5. Uprant xinvasona thaun oso êk tallo ailo: "Sogllim tumi, Devachea chakramnô, Tachi bhokti kortolea dhaktteam-vhoddleamnô, amchea Devachi tust korat!"
6. Magir eka ghosghoxeachea avaza sarko ani zonnzonnit goddgoddeachea boballa vori êkê vhôdd urponjicho koso êk tallo hanvem aikolo; to oso mhonnttalo: "Sorvesporak zôi! Sorvesporan, amchea Sorvpodvedar Devan, Apli razvôttki hatant ghetli!
7. Khuxal zaum-ia, anondbhorit zaun Devak vakhannum-ia! Kiteak Menddreachea lognacho vogôt pavlo ani Tachi potinn lognak toiar zali.
8. Jhigjhigit sonnachi dhovi-ful nhesônn Devan tika ghalunk dilea." Sonnachi nhesônn mhonngê bhoktancheô boreô kornniô.
9. Tednam devdutan mhaka sanglem: "Oxem boroi: Menddreachea lognachea jevnnak amontronn ghetlam tim subhagi!" Tea bhair tannem mhollem: "Ho khoreponnim Devacho sondêx."
10. Tea uprant taka nomoskar korunk hanv tachea pãiam poddlom, punn tannem mhaka sanglem: "Toxem korum naka. Tujê bhaxen ani Jezuchi sakxi manun ghetlea tea tujea bhavam-bhoinnim bhaxen, hanv chakôr. Devakuch tunvem oso bhôzcho." Jezuk sakxi ditat tim Atmeachea preronnan aplo sondêx ditat.
11. Tednam mhaka sôrg ukto zal'lo dixtti poddlo, ani thõi êk dhovo ghoddo aslo. Tacher boslolo aslo Tachem nanv Visvaxi ani Satvik; To nitivontponnan mon'subi korta ani nitivontponna pasot zhuzta.
12. Tache dolle ujeachem agttem koxem, ani Tachê tokler zaite mukutt asle. Tacher ek nanv boroil'lem aslem, punn Tachê bhair tacho ôrth konnuch nokllo aslo.
13. Tannem ghal'lem tem vostr rogtan xitoddail'lem. Devacho Sôbd Tachem nanv.
14. Tachê pattlean vetalim dhovea ghoddeancher bosun ani dhovem-ful sonnachem nhesun sorginchim loskoram.
15. Raxttrank harounk Tachea tonddantli êk pazloli torsad bhair sortali. Êkê lokhonddachê betkattien To tancher raj choloitolo, ani Sorvpodvedar Devachea krodhacho ghanneant dakô mollun soro bhair kaddtolo to Toch.
16. Tachea vostracher ani Tachea zangllacher boroil'lem asa hem nanv: "patxaiancho Patxai ani dhoniancho Dhoni!"
17. Uprant suriacher ubo aslolo êk devdut hanvem pollelo. Tannem varear uddtolea sogllea suknneank vhoddlean bob marli: "Ieiat, ani Devachea vhoddlea jevnnak ektthãi zaiat!
18. Razanchem mas, senapotinchem mas, podvedar viranchem mas, ghoddeanchem ani tanchea ghoddesvaranchem mas, sogllê torechea lokachem, mhonngê svadhin mon'xanchem ani gulamanchem mas, lhananchem ani vhoddanchem mas, khaunk ieiat."
19. Uprant savzak ani sonvsarantlea patxaiank ani tanchea loskorank hanvem pollelim; Ghoddesvaracher ani Tachê foujecher zhuz manddunk tim zomlolim.
20. Savzak dhôrlem, ani tachê borabôr fottkirea provadiak; savzachea nanvan tannem vismitam kel'lim tanchê vorvim tea savzacho xik'ko ghetloleank ani tachê murtik bhôzloleank tannem fosoil'lim. Ani savzak ani khottea provadiak zolltea gondhokachea ujeachea konddant jivinch xevttun uddoilim.
21. Urlolea soglleancho Ghoddesvarachea tonddantli bhair sortali tê torsadin jiv kaddlo, ani sogllim suknnim tanchem mas khaun dhadoxi zalim.
