1. Tednam Gabharea thaun sat devdutank oxem vhoddlean sangtolo êk tallo hanvem aikolo: "Cholat ani Devachea krodhachim sat aidonam prithumer ôtat!"
2. Poilea devdutan vochun aplem aidon prithumer ôtlem. Zankam savzacho xik'ko aslo ani jim konn tachê murti mukhar sorpottlolim, tankam kanttalleachim ani vikallim chovnam zalim.
3. Dusrea devdutan aplem aidon somdiracher ôtlem. Udok mel'lea mon'xachea kinn'nnevlolea rogta sarkem zalem ani somdirantli soglli rochnna meli.
4. Tisrea devdutan aplem aidon nodincher ani udkachea zhorincher ôtlem ani tanchem rogot zalem.
5. Udkancher odhikar aslolea devdutan oxem mhonnlolem hanvem aikolem: "Sorvespora, sogllea Tujea nirnnoiamnim Tum nitivont! Zo asa ani Zo aslo To Tunch! Povitr To Tunch! He Tuje nirnnoi nitiche.
6. Bhoktanchem ani provadianchem rogot tãnnim vikrailem dekhun, Tunvem-i tankam rogot pieunk dileim. Hôi, hem tankam favo!"
7. Ani khud vedi oxi uloitali ti hanvem aikoli: "Sorvespora, Sorvpodvedar Deva, Tuje nirnnoi sotache ani nitiche!"
8. Chouthea devdutan aplem aidon suriacher ôtlem, ani mon'xank ujea vorvim lasun uddounk suriak podvi dili.
9. Zolltê gormen mon'xam hulponk laglim, ani, jivit bodlun Devak mhoima diunchê svater, tim hea noxttancho odhikar aslolea Devachi ninda korunk laglim.
10. Panchvea devdutan aplem aidon savzachê sodrer ôtlem. Savzachea ak'khea rajeacher kallôkh poddlo ani aplê dukhik lagun mon'xam apleôch jibô chabunk laglim.
11. Ani aplem jivit bodôlchê svater, aplea dukhink ani chovnank lagun tãnnim sorginchea Devak jastiô marleô.
12. Sovea devdutan aplem aidon vorixtt Eufrat nodicher ôtlem. Nôd sukli ani tantuntlean udentichea patxaiank vatt toiar zali.
13. Tednam tin mhelle atme hanvem dekhle: te bebe koxe distale.Tantlo êk atmo arachea tonddantlo, dusro savzachea tonddantlo ani tisro khottea provadiachea tonddantlo bhair sorlo.
14. Vismitam kortat tosle devcharanche atme te. Te tin atme Sorpodvedar Devachea Vhoddlea Disachea zhuzak sonvsarantlea razank ektthãi kortat.
15. "Polleiat! Hanv eka chora porim ietam! Zagrut ravtat ani aplim vostram rakhtat tim subhagi: hê bhaxen tim vingllim bhonvchim nant ani loka mukhar tankam loz bhògchi na."
16. Tednam tea atmeamnim Hebrêv bhaxen Armageddon mhonnttat tea zagear razank ektthãi kele.
17. Tednam satvea devdutan aplem aidon varear ôtlem. Gabhareantlea xinvasona thaun êk motto tallo gazlo: "Somplem!"
18. Zhoglannim, goddgoddeanche ghonnghonn ani khoddegant dhornnkamp zalim. Mon'xakull rochlam tê meren iedi motti dhornnkamp kednanch zaunk na; soglleam poros paxtt hi dhornnkamp!
19. Vorixtt Xar futtun tiche tin vantte zale, ani raxttram-raxttramnim xaram padd zalim. Devan xrêxtt Babiloniecho ugddas kelo ani soreachea patrantlem tika pieunk dilem: Tachea krodhacho soro to!
20. Dip-zunve soglle pollun gele ani dongor-porvot nanch zale.
21. Korveanche vhoddle fator, dôr-êk sumar pon'nas kilogramanchea vozonacho, mollbar thaun mon'xancher poddle. Ani korveanchea pausachea noxttak lagun, tem marekar vign zal'lean, mon'xamnim Devacher jastiô marleô.
