1. Tednam êk vhôdd ani vichitr khunna hanvem dekhli: sat devdut sat noxttam gheun asle. Him nimannim noxttam, kiteak tanchê vorvim Devachea krodhachi xirantt sompadtoli.
2. Magir uzo laglolê konvchecho êk doria koso hanvem pollelo; ani zãnnim savzacher ani tachê murticher ani zachem nanv eka ankddean dil'lem asa tea mon'xacher zoit vhel'lem, tankam hanvem pollelim: him konvchechea doria sorxim ubim aslim. Devan dil'leô kin'noriô gheun, tim
3. Devachea chakra Moizesachem ani Menddreachem git gaitalim: "Sorvespora, Sorvpodvedar Deva, kitlim vhoddlim ani vichitr Tujim kortutvam! Raxttranchea Raia, kitleô nitivontponnacheô ani sotacheô Tujeô vattô!
4. Sorvespora, konn Tujem bhem dhôrina zait? Tuji tust korinastana konn ravot? Karonn Tum ekloch Povitr ani Tujeô formavnniô soglleank tthaveô; dekhun sogllim raxttram ietolim ani Tujê mukhar saxttangim poddtolim."
5. Tea uprant sorgar Gabharo, mhonngê, Devachê govaikecho Tombu, ukto zal'lo hanvem dekhlo.
6. Sat noxttam gheun asle te sat devdut Gabhareantle bhair sorle; te dhovem-ful sonnachem anglem nheslole, ani tanchê chhatiek bhangarache pott'tte bandlole asle.
7. Tednam char jivea rochnnantlea ekan sat devdutank sat bhangarachim aidonam dilim: him sasnnachea sasnnak jietolea Devachea krodhan bhòrlolim aslim.
8. Devachê mhoimê ani podvê thaun upzol'lea dhunvran Gabharo bhòrlo, ani sat devdutanchim sat noxttam sompado-sôr konnacheanuch Gabhareant bhitôr sorunk zainaslem.
