1. "Efezantle Povitr-Sobhechea dutak oxem boroi: 'Aplea hatant sat noketram dhôrun asa ani sat bhangarachea divliam modem bhonvta Tacho sondêx ho:
2. Tunvem kitem-kitem kam kelãi tem Hanv zannom, kitlo bhar tunvem ghetlai ani kitlê thiraien tum vavurlai, tachi mhaka khobor asa; khotte monis tuka manonant mhonn Hanv zannom; ani konn dhormdut nhoi astana apunn dhormdut mhonn sangtat tanchi porikxa tunvem keleai, ani te fottkire mhonn tuka kollon ailam.
3. Tuka sõsnnikai asa, Mhojê pasot tunvem zaitem sõslãi ani kalliz sôddunk nãi.
4. Tori astana, tum poilim Mhozo môg kortaloi toso atam korinãi: hoch tujer add Mhozo xinn.
5. Tum kitlo khala poddlai tem chint! Tujem jivit bodôl ani poilim kortaloi toxem kôr. Tujem jivit bôdlina zaxi zalear, Hanv tujê-xim ietolom, tuji divli tichê svatê veli kaddtolom.
6. Tori hi êk bori vôst tuji: Nikolaitanchea pongddachim mon'xam kortat tacho Mhojêch bhaxen tum dvês dhôrtai.
7. Jem kitem Atmo Povitr-Sobhank sangta, tem kan asloleamnim aikunchem: zoit vhortoleank Devachea Voikunttant asa tea Jivitachea rukhachem foll Hanv khaunk ditolom.' "
8. "Smirnentlê Povitr-Sobhechea dutak oxem boroi: 'Zo Poilo ani Nimanno, Zo mel'lo ani punorjivont zala, Tacho sondêx ho:
9. Tuje attevitte Mhaka tthave. Tum gorib mhonn Hanv zannom, punn khorem mhollear tum girest! Judev nhoi astana apunn Judev mhonnttat ani tuji ninda kortat tanchi Mhaka khobor asa; khorem mhollear, te Soitanacho êk pongôdd!
10. Tuka sõsunk poddtolem tachi bhirant dhôrum naka. Aik! Tumchi porikxa korunk devchar tumchê modlea kãi zannank bondkhonnint uddoitolo; dha dis tumi attevitte kaddche poddtole. Morunk poddlear porian visvaxi rav, ani Hanv tuka jivitacho mukutt ditolom.
11. Jem kitem Atmo Povitr-Sobhank sangta, tem kan asloleamnim aikunchem: zoit vhortoleank dusrea mornnachi bhirantuch na!' "
12. "Pergamachê Povitr-Sobhechea dutak oxem boroi: 'Don-ui vattamnim pazloli torsad gheun asa Tacho sondêx ho:
13. tum khõi ravtai tem hanv zannom: Soitanachem xinvason asa thõi. Mhojem Nanv tum ghôtt dhorun asai, ani Soitan ravta thõi Antipasak, Mhojea visvaxi sakxidarak, jivexim marlo tednam porian Mhojer dovorlolo visvas tunvem sôddunk nãi.
14. Tori astana tujer Mhaka êk xinn korcho asa: tumchê modem Balaamachim pattlavdaram asat; kud'dea devank voplolim danam khaun ani kamchar korun Israelachea putam-dhuvank patkachea fasant ghalunk to Balakak xikoitalo.
15. Têch bhaxen Nikolaitanchê xikovnnechim kãi pattlavdaram tumchê modem asat.
16. Dekhun jivit bodôl, na tôr Hanv rokddo ietolom, Mhojea tonddantli bhair sorta ti torsad gheun tancher add zhuz manddtolom.
17. Jem kitem Atmo Povitr-Sobhank sangta, tem kan asloleamnim aikunchem: zoit vhortoleank Hanv liplolo man'na ani êk dhovo fatôr ditolom, ani tacher boroil'lem ek novem nanv. Hem nanv ghetlam tankam mat soddun, anink konnak hea nanvachi khobor na.' "
18. "Thiatirentlê Povitr-Sobhechea dutak oxem boroi: 'Ho sondêx Devachea Putacho; Tache dolle ujea porim jhigjhigtat, Tache pãi nirbhêl kel'lê pitullê sarke chokchoktat.
19. Tum kitem kortai tem hanv zannom. Tum Mhozo môg kortai, tum Mhaka visvaxi ravlai, tum hurben seva kortai, ani koxttam modem thir ravlai: hem sogllem Hanv vollkhotam. Adim poros atam tum odik borem kortai mhonn Mhaka khobor asa.
20. Tori astana hem Mhaka tujem manona: ti bail Jezebel apunn provadin mhonn sangun Mhojea chakrank pozoddponn korunk ani kud'dea devank bhettoil'lem khann khaunk xikoita ani oxem tankam fosoita, ani tum tika ogo ravtai!
21. Aplem jivit bodlunk Hanvem tika vêll dila, punn aplem pozddem jivit bodlunk tika mon na.
22. Polle, Hanv tika pidda dhaddun aplê khatticher uddoitolom, ani tichê borabôr pozoddponn kortoleank bharim vollvollaitolom; aplim khottim kortubam sanddun aplem jivit tim bôdlinant zalear, Hanv oxem kortolonch.
23. Tichea bhurgeancho-i Hanv jiv kaddtolom, ani tednam mon'xanchim monam ani kallzam Hanv topasun kaddtam ani zonn-ekleak ap-aplea kornniam pormannem Hanv farik kortam mhonn sogllea Povitr-Sobhank kollon ietolem.
24. Punn tumi heramnim Thiatirent ti khotti xikovnn gheunk na, Soitanache khol gutt mhonnttat te tumi xikunk nant, dekhun tumcher anink koslench vozon Hanv ghalcho na.
25. Punn Hanv ie-sôr, tumkam asa to khoro bhavarth mat thir samballat.
26. (a)Zoit vhortoleank ani xevôtt porian Mhoji chakri kortoleank
27. (a)Mhojea Bapa koddsun Hanvem ghetla (26b) toch odhikar taka raxttrancher ditolom ani, (27b) matiechea aidonancho churo kortat toxem, to lokhonddachê betkattien tancher raj choloitolo.
28. Ani Hanv taka fantea velem Noketr ditolom.
29. Jem kitem Atmo Povitr-Sobhank sangta, tem kan asloleamnim aikunchem.' "
