1. Tea uprant anink êk devdut sorgar thaun denvun ieta to hanvem pollelo. Taka vhôdd odhikar aslo ani tachea tezan sogllo sonvsar jhigjhiglo.
2. Tannem vhoddlean oxi bob marli: "Poddlem rê, poddlem! Tem vorixtt Babiloniechem xar poddlem! Tantum atam firtat devchar ani mhelle bhut; tem atam zalam sogllea jin'sacheam ollxikonnea suknneanchem biradd ani mhellea ani bhirankull zonavorancho vivôr.
3. Sogllim raxttram tachea pozoddponnacho khôr soro pielim, prithumechea sogllea razamnim tachê kodde kamchar kelo; ani tachea nirmoriadi xindollken sonvsarantle veapari girest zale.
4. Magir anink êk tallo sorgar thaun oxem sangtalo to hanvem aikolo: "Bhair sorun ie, Mhojê porjê! Thõisorli bhair sor! Tichea patkamnim tumi vantto gheum nakat; ticher poddlea tê xikxechim tumi bhagidaram zaum nakat.
5. Kiteak tichea patkanchi ras mollba itli unch pavlea, ani tichea khotteponnancho Devak ugddas aila.
6. Ti tumchê kodde vaglea toxench tumi-i tiche kodde vagat; jem sogllem tinnem kelam, tem dupett mapan tika farik korat. Tumkam tinnem aplea patrant pieunk toiar korun dilam, tôr atam don pavtti odik khôr sorean tichem patr bhôrun diat.
7. Jitlo tinnem aplo dobazo vaddoilo ani jitli ti aplea pozoddponnant dhadoxi zali, titli tika atam tollmolle ani dukh bhôgunk diat. Kiteak ti aplea monant oxem mhonnot asa: 'Sodrer bosloli ranni hanv! Vidva bail nhoi hanv, ani vidvechem dukh kodinch mhaka bhôgunk poddchem na!'
8. Haka lagun ekach disa bhitôr soglleô khasti ticher poddtoleô: pidda, dukh ani bhuk; tosoch ujean ticho bhosm zatolo, kiteak ticher khastichem formonn marta to Sorvespor Dev bollixtt!"
9. "Tichê xindollkent ani kamcharant bhag ghetale te raza, ujean tacho bhosm zatana voir sorta to dhunvôr polleun, tachê vixim roddtole ani vilaptole.
10. Tiche vollvolle apnnank-ui lagtit mhonn bhieun, pois-pois ravun te mhonntole: 'Kotta! Kotta! Babilonia-xara, kitlem tezvont asleim tum! Ani kitlem podvedar! Tori eka vora bhitôr tujem nisontton zalem!'
11. Sonvsarantle soglle veapari tichê pasot roddtat ani vilaptat, kiteak tarvamnim haddlolo tancho mhal vikto gheunk anink konnuch na:
12. konnuch ghena tanchem bhangar, tanchem rupem, tanchim mannkam ani motiam, tanchem sonnachem ani zambllem lugott, tanchem rexmichem ani tambddem lugott, tanchim chondonachim lankddam, tanche hostidantache ani moladik lakddache, pitullche, lokhonddache ani pakhonnache nog;
13. toxench konnuch ghena atam tanchi tiki, mosalo, gondhrôs ani dhump, ani pormollit molôm; konn gheupak na tancho soro ani tel, tanchem pitt and gonv, tanchim gorvam ani menddram, tanche ghodde ani gaddiô, tanchim gulamam ani koidi kel'lim mon'xam.
14. Veapari taka mhonnttat; 'Tum axetaleim teô moladik vostu nanch zaleô; sogllo tuzo dobazo ani jivitacho porzôll ubun gelo ani anink kednanch te tuka portun mellpache nant!'
15. Tea xarant veapar korun girest zal'le veapari tea xarachê khastichê bhirantin pois-pois ravun oxe pinrgunn vilaptole;
16. te mhonnttole: 'Kotta! Vorixtt xarachem kotta! Tem sonni ani zambllim vostram nhestalem, mannkam-motianchea xringaran jhigjhiktalem!
17. Tori eka vora bhitôr hea sogllea dobajeacho bhosm zalo! Tarvanche kopit ani poinnari, tarvotti ani doriantlem aplem udarposonn zôddtat te, borech pois ravun
18. ani bhosm zal'lea xara thaun choddta to dhunvôr polleun, oxem arddun mhonnttole: 'Oslea vorixtt xarak sôr zatolem dusrem khõi melltolem?!'
19. Tãnnim aplê tokler dhull uddoili, ani pirngun ani vilapun oxi bob marli: 'Kotta! Tea vorixtt xarachem kotta! Doriantlean firtolea tarvanchea sogllea dhoniank aplê dobajik jinnê vorvim tem girest kortalem! Tori eka vora bhitôr tem sarkem padd zalem!'
20. Sorga, tachea ghorttanna khatir khuxal za! Bhoktamnô, dhormdutamnô, ani provadiamnô, tumi-i khuxal zaiat! Kiteak tumkam tannem vaitt kel'lê khatir Devan taka ho nisonttonacho nirnnoi dilo!"
21. Uprant eka bollixtt devdutan danteachea vhodda pedda sarki êk fatôr ghetli ani oxem mhonnun somdirant ti uddoili: "Hê bhaxen ekach faran vorixtt Babiloniechem xar nettan xevtton vetolem ani portem tem kednanch anink dixtti poddchem na.
22. Anink kednanch tujea rosteancher, Babiloniê, aikunk ieuncho na songitancho nad: vinno vazoitoleancho ani gavpiancho nad, tosoch pirlukecho ani tuturecho avaz! Koslêch torecho kolakar tujê bhitôr anink kodinch dixtti poddcho na! Danteacho avaz anink kodinch tujea kottam bhitôr aikunk ieuncho na!
23. Anink kodinch tujea ghoramnim diveacho uzvadd loklokcho na! Anink kodinch tujê-xim aikunk ieunchim nant hoklê-novreachea lognachim khuxal gitam! Tuje veapari sonvsarache kunvor zal'le, ani tujea ghaddiponnamnim sogllim raxttram fosovlim!
24. Ani provadianchem, bhoktanchem ani sonvsarant jivexim marleant tea soglleanchem rogot Babiloniechea rosteancher vikrail'lem dixtti poddlem."
