1. Xinvasonar boslolo asa Tachea uzvea hatant êk kovllo hanvem dekhlo; fuddlean-pattlean tacher boroil'lem aslem, ani sat xik'ke marun to bond kel'lo.
2. Ani hanvem êk khoddegant devdut pollelo; to vhoddlean oso aroddlo: "He xik'ke fôddunk ani kovllo ugddunk konnak tank asa?"
3. Punn konnuch sorgar, nhoi mhonn sonvsarant ani mel'leanchea konddant porian, kovllo ukto korunk ani vachunk tank aslolo mell'llo na.
4. Kovllo ugddunk ani to vachunk purto konnuch mell'llo na dekhun hanv dukamnim roddlom.
5. Tednam zannteam modlea eklean mhaka mhollem: "Roddum naka; polle, Judachea kullantlea Xinvan, Davidachê Kombren, zoit vhelem; te sat xik'ke fôddunk ani kovllo ugddunk Taka tank asa."
6. Tednam polle zalear, char jivea rochnnam ani zannteam modem xinvasonachea mazar êk Menddro ubo aslolo hanvem dekhlo; hea Menddreak jivexim marlolo mhonn Tache ghai dakhoitale; Taka sat xingam ani sat dolle asle; he dolle mhollear Devachê sevek aslole ani ak'khea sonvsarant patthoil'le sat atme.
7. Fuddem sorun Menddrean xinvasonar bosun Asloleachea uzvea hatantlo kovllo ghetlo.
8. Tannem to ghena fuddem, char jiveô rochnna Menddrea mukhar sorpott poddleô; toxench chovis zannte-i sorpott poddle. Hanchê modlea zonn-eklea lagim êk kin'nori asli ani dhumpan bhòrlolim bhangarachim aidonam; him aidonam mhollear bhoktanchim magnnim.
9. Te ek novem git oxe gaitale: "Kovllo gheunk ani tache xik'ke fôddunk Tum purto, karonn Tuzo jiv kaddlo; ani sogllea kullanchea, sogllea bhasanchea, sogllea porzanchea ani raxttranchea mon'xank Tujea vikrail'lea rogta udexim Tunvem sôddoun Devak dileãi.
10. Amchea Devachi seva korunk Tunvem tankam Tujê razpodvent ani iadnikent vantto diloi, ani tim prithumer raj choloitolim."
11. Mhojea dorxonant devdutanchê êkê urponjicho tallo hanvem aikolo. Te xinvasona, jivea rochnnam ani zannteam bhonvtonnim asle. Tanchi sonkia mhollear kottincheô kotti ani hozaranche hozar.
12. Ani te soglle arddun oxem gaitale: "Jivexim marlolea Menddreak favo soglli podvi, toxench doulôt, zannvai, boll, mhoima, stuti ani vakhann'nni!"
13. Ani sorga veleô ani sonvsarantleô, patallantleô ani somdirantleô soglleô rochnna mhonngê ak'khê srixttint asat teô soglleô rochnna oxem mhonnttaleô teô hanvem aikoleô: "Xinvasonar boslolo asa Taka ani Menddreak vakhann'nni, mhoima, stuti ani podvi sasnnachea sasnnak!"
14. Char jiveô rochnna oso zobab ditaleô: "Amen!" Ani zannte saxttangim poddun bhoztale.
