1. Magir mhojea dorxonant Menddro satantlo poilo xik'ko fôddta to hanvem dekhlo, ani char jivea rochnnantlea ekan godd-goddeacho koso avaz korun "Ie" mhonntta tem hanvem aikolem.
2. Ani polle zalear, êk dhovo ghoddo hanvem dekhlo. Ghoddear boslolo aslo tachê kodde ek dhonu aslem: taka êk mukutt dilo. To jikit jikit gelo ani zoita pattlean zoit vhorunk bhair sorlo.
3. Uprant Menddrean dusro xik'ko fôddlo, ani dusri jivi rochnna "Ie" mhonntta tem hanvem aikolem.
4. Dusro êk ghoddo bhair sorlo; to tambddo-lal aslo. Tacher boslolo aslo taka sonvsarant xanticho nas korunk ani mon'xamnim ekamekacho jiv kaddchê khatir tankam challounk podvi dili; dekhun tachea hatant êk vhoddli torsad ghali.
5. Uprant Menddrean tisro xik'ko fôddlo, ani tisri jivi rochnna "Ie" mhonntta tem hanvem aikolem. Polle zalear, êk kallo ghoddo mhaka dixtti poddlo; tacher boslolo aslo tachea hatant êk tagddi asli.
6. Char jivea rochnnam modlo ail'lê porim êk tallo hanvem aikolo. To oxem sangtalo: "Eka dinarak xêr-bhôr gonv, ani eka dinarak zovache tin xer. Zoitunanchea ani dak-velinchea molleank mat nuksann dium nakat."
7. Uprant Menddrean chovtho xik'ko fôddlo; ani chovthi jivi rochnna "Ie" mhonntta tem hanvem aikolem.
8. Polle zalear, mhaka pachvea rongacho êk ghoddo dixtti poddlo. Tacher boslolo aslo tachem nanv Moronn, ani tachê pattapatt mel'leancho patall vetalo. Torsadin, bhuken, pidden ani ran'vott zonavoram udexim sonvsarachea chovthea vantteak marun uddounk tankam podvi dili.
9. Tednam Menddrean panchvo xik'ko fôddlo. Jivexim marloleanche zaite otme hanvem vedi khala dekhle. Devachem utor tãnnim porgôttlolem dekhun ani aplea jivitantlean tãnnim thiraien sakxi dil'li dekhun, tankam jivexim marlolim.
10. Tãnnim vhoddlean oxi bob marli: "Povitr ani Satvik Dhonia, sonvsarantlea mon'xanchi zhôddti korunk ani amchea vikrail'lea rogtacho sud'd gheunk kednam porian ravtoloi?"
11. Tednam tanchê modlea zonn ekleak Devan êk dhovi nhesônn dili ani tanchea vangddiam-chakranchi ani bhavam-bhoinninchi sonkia bhoron ie-sôr anink thoddo kall ravat mhonn sanglem: kiteak zoxem tankam jivexim marlolim, toxench hancho-i jiv kaddcho asa.
12. Ani Menddrean sovo xik'ko fôddlo to hanvem dekhlo. Tednam êk motti dhornnkamp zali, ani suria eka kallea sakottea porim kallo zalo, ani chondrim rogta vori tambddo-lal zalo;
13. zoxem vhoddlem modd ietôch tornnim anjiram rukha velim dhornnir zhôddun poddtat, toxim mollba velim noketram sonvsarar konsllon poddlim.
14. Eka revoddlolea kovllea vori mollob nanch zalem, ani dôr-êk porvôt ani dôr-êk zunvo ap-aplê svatê vele halon pois gele.
15. Tednam sonvsarantle patxai, razpal ani senapoti, girest ani podvedar mon'xam, sogllim gulamam ani svotontr mon'xam, bhuiaramnim ani dongrachea khoddpamnim lipun ravlim.
16. Tãnnim dongrank ani khoddpank oso ulo marlo: "Amcher poddat ani xinvasonar boslolo asa Tachea mukha velim ani Menddreachea krodhantlim amkam lipoiat;
17. karonn Tachea Krodhacho Bhirankull Dis pavla, ani tachê mukhar ubo ravunk konn xokta?"
