1. Tednam sorgar êk vichitr khunna dixtti poddli; suriachea porzollan nhesloli êk bail; tichea pãiam tolla aslo chondrim ani tichea mathear bara noketrancho mukutt.
2. Ti ballônt zaunchi asli ani aplea porsutt-vennink lagun ti bobô-huieli martali.
3. Anink êk khunna sorgar dixtti poddli: ovchituch êk vorixtt tambddo-lal sat tokliancho ani dha xingancho ar; tachê dôr-êkê tokler êk mukutt aslo.
4. Tannem aplê xempdden mollbavelea noketrancho êk tisro vantto konsllaun prithumer uddoilo; ani porsutt zaunchi asli tê bailek bhurgo zaina fuddem taka girasunk, tichê mukhar ar ubo ravlo.
5. Bailek êk bhurgo zolmolo: to lokhonddachê betkattien sogllea porzancher raj choloitolo. Punn hea bhurgeak Deva sorxim ani Tachea xinvasona sorxim nitt ubarun vhelo.
6. Ti bail apunn oronneant pollun geli; thõi tika baraixim-satth dis udarposonn mellchem mhonn Devan tika êk asro toiar kel'lo.
7. Uprant sorgar ek zhuz suru zalem. Mikael aplea dutank gheun aracher zhuzlo. Ar aplea dutank gheun tanchê virudh zhuzlo,
8. punn he harovle ani tankam sorgar anink zago urlo na.
9. Vorixtt arak bhair uddoilo. Toch to adlo sorôp, ak'khea sonvsarak fosoilo to; tachem nanv Devchar ani Soitan; taka ani tachê borabôr tachea dutank khala prithumer xevttile.
10. Tednam sorgar oxem vhoddlean mhonnttalo to êk tallo hanvem aikolo: "Atam ki amchea Devan Aplê porjechem taronn kelem! Atam Aplea hatant podvi gheun Apunn raza mhonn To dakhoitolo! Atam Tacho Krist sonvsaracher Aplo odhikar cholounk lagtolo! Karonn amchea bhavam-bhoinnincher add garannem korun tancher amchea Devachea mureant dis-rat arôp ghaltalo taka xevttun uddoilo!
11. Tãnnim Menddreachea rogta pasot ani aplê govaikê khatir tacher zoit vhelem, ani morunk porian kobul asun tãnnim aplea jivachi beporva keli na.
12. Dekhun, sorga ani thõi asloleamnô, sontosbhorit zaiat! Punn prithumechem ani somdirachem kotta! Kiteak devchar bhov ragixtt zaun tumchê modem denvun aila, ani apnnak thoddoch kall asa mhonn to zanno."
13. Apnnak prithumer xevttilo mhonn arak koll'lem tednam, bhurgeak zolm dil'lo tê bailechea pallank to laglo;
14. punn oronneant aplea asrear uddun vochunk bailek eka vorixtt goruddache don pakotte dile; thõi arachê pidda-piddentli meklli zaun saddê-tin vorsam tichi bori poramôs zatoli.
15. Tednam ti bail lotton vechê khatir aran ticher êk udkachi nôd koxi aplea tonddantli nettan xevttili.
16. Punn dhortori bailechea adarak aili, kiteak aran aplea tonddantli xevttil'li ti nôd dhortoren tondd ugddun gill'li.
17. Uprant ar bailecher ekdom tiddlo ani tichê urlolê sonsticher, mhonngê Devacheô adnia palltat ani Jezun dil'lê govaikek visvaxi ravtat tancher, zhuzunk bhair sorlo.
