1. Sat aidonam gheun asle tea sat devdutantlo eklo mhojê-xim ailo; tannem mhaka oxem sanglem: "Zaitea udkam sorxim ti nanv vosti xindôll-bail aplea asonar bosloli asa tika kosli xikxa poddunk veta ti hanv tuka dakhoitolom.
2. Tichê kodde prithumechea sogllea razamnim kamchar kela ani sonvsarantlo lôk tichê xindollkecho soro pieun bebdo zalo.
3. Tednam Atmean mhaka dhôrlolo astana devdutan mhaka oronneant vhelo. Thõi êk bail hanvem polleli; devnindechim utram sogllea angar boroun aslolea eka tambddea savzacher ti bosloli; tea savzak sat tokliô ani dha xingam aslim.
4. Ti bail zambllea ani tambddea rongachim vostram nhesun asli, tinnem bhangar-xringar ani mannkam-motiam ghal'lim. Tichea hatant ek bhangarachem patr aslem, ani hem tichea kamchari jinnechê ollxiken ani kanttallean bhòrlolem.
5. Tichea kopalar ek gupit orthachem nanv boroil'lem aslem; tem hem: "Hanv podvedar Babilonia! Sogllê xindollkechi avoi hanv, sonvsarant upzotat titlea-i ollxikank hanvuch zolm ditam."
6. Ani bhoktanchem rogot ani Jezuchea sakxidaranchem rogot pieun ti bail bebdi zal'li hanvem polleli. Hanvem tika oxi dekhli tednam, hanv sarkoch thottaklom.
7. Devdutan mhaka vicharlem: "Tum kiteak itlo thottak zalai? Hê bailecho gupit ôrth ani ti boslea sat toklianchea ani dha xinganchea savzacho gupit ôrth hanv tuka sangtam.
8. Tunvem dekhlãi tem savoz ekdam jivem aslem, punn atam jivem na; tem patallantlem voir sorchem asa ani tachem nisontton zatolem. Sonvsarachea orombak thaun jea mon'xanchim nanvam jiveanchea pustokar boroil'lim nant, tim sogllim savzak polleun thottaktolim, karonn tem ekdam jivem aslem, uprant jivem na zalem, punn novean portun dixtti poddtolem.
9. Hanga zannvaiechi ani somjikaiechi goroz: sat tokliô mhonngê bail bosloli asat te sat dongor. Têch bhaxen sat patxai;
10. tantle panch sorun gele, eklo atam raj choloita, ani nimanno eklo ozun ieunk na. To ietolo tednam ilo-so vêll sodrer urtolo.
11. Ekdam jivem aslem punn atam jivem na tem savoz, tem-i atthvo patxai, punn tea satantlo eklo, ani tachem nisontton ieunchem asa.
12. Tunvem polleleãi tim dha xingam dha patxai: te ozun razkarbhar cholounk lagunk nant, punn te savza borabôr ek vor-bhôr razodhikar ghetole.
13. Apli podvi ani odhikar savzachea hatant ghalunk te soglle ekmotache.
14. Te Menddrea virudh zhuztole, punn Menddro Tannem apoil'lea, vinchlolea, visvaxi pattlavdaram borabôr tankam haroitolo, kiteak To dhoniancho Dhoni ani patxaiancho Patxai.
15. Devdutan mhaka anink-ui sanglem: "Jea udkam sorxim aplea asonar xindôll-bail bosloli asa mhonn tunvem pollelãi, tim udkam mhollear soglleô porza, urponji, raxttram ani bhasô.
16. Punn tunvem polleleãi tim dha xingam ani savoz xindôll-bailecho dvês kortolim; tichê lagim asa titlem-i luttun kaddtolim, ani tika nagddi korun sôddtolim; tichem mas khatolim ani ujean ticho bhosm kortolim.
17. Kiteak Devachem utor pallon ie porian, Devan Aplo hetu tanchea monant ghala ani oso tãnnim aplo razodhikar savzachê adhin korcho mhonn Tannem tankam ekmotache keleat.
18. Ani tunvem polleleai ti bail sonvsarachea patxaiancher razvôttki choloita tem vorixtt xar."
