1. Tednam sorgar thaun êk devdut denvtalo to hanvem pollelo; tachea hatant asli patallachi chavi ani êk zôdd sankôll.
2. Tednam arak, adlea sorpak mhonngê Devcharak vô Soitanak dhôrlo ani taka hozar vorsank sankllin bandun dovorlo.
3. Ani tim hozar vorsam soro porian tannem anink raxttrank fosoina zaunk taka patallant xevttilo, tem patall dhamplem ani tachea daracher xik'ko marlo. Tea uprant thoddo-so vêll taka sôddunk Devachi ievzônn asa.
4. Uprant hanvem sodrô polleleô, ani je konn tancher bosle tankam Devan zhôddti korchi podvi dili. Toxench Jezuk sakxi dil'lê khatir ani Devachem utor porgôttlam mhonnun zanchem xins kaplolem, tankam hanvem dekhlim. Tãnnim savzak ani tachê murtik bhôzunk naslim ani savzacho xik'ko aplea kopalar vô aplea hatar gheunk naslo. Tim sogllim novean jivim zalim ani hozar vorsam-bhôr tãnnim Krista borabôr razvôttki choloili.
5. Hem poilem punorjivontponn. Hozar vorsam bhòrchê adim her mel'lim mon'xam punorjivont zaunk nant.
6. Poilea punorjivontponnant zankam vantto mell'llo, tim subhagi ani povitr. Ujeachea konddant dusrea mornnachê podvê khal tim aschim nant, punn Devachi ani Kristachi seva korunk tim iadnik zatolim, ani Tachea sangata êk hozar vorsam raj choloitolim.
7. Êk hozar vorsam bhòrlea uprant, Dev Soitanak bondkhonnintlo soddoitolo
8. ani to ak'khea sonvsarachea raxttrank fosounk bhair sortolo. Tea raxttranchim nanvam Gog ani Magog; Soitan tankam zhuzak ektthãi kortolo; doriachê deger renvecheô konniô asat titli vhôdd tea fouzanchi sonkia.
9. Heô fouzô ak'khea desacher choddun geleô ani bhoktanchea penneak, mhonngê Devachê opurbaiechea Xarak, tãnnim veddho ghalo. Punn sorgar thaun uzo denvlo ani ujean tancho bhosm kelo.
10. Tednam tankam fosoitalo tea devcharak Devan zolltea gondhokachea konddant xevttilo; tantum to savzachea ani khottea provadiachea vangdda dis-rat tollmolltolo sasnnachea sasnnak.
11. Uprant hanvem dekhlem ek vhoddlem dhovem xinvason ani tacher bosun aslo Taka hanvem pollelo. Tachê mukha velim prithum ani mollob pollun gelim ani tanchi savlli porian urunk na.
12. Ani mel'lea mon'xank hanvem pollelim, vhoddank toxem lhanank: tim xinvasona mukhar ubim aslolim. Pustokam ugôddlim, ani uprant anink ek pustok ugôddlem; hem mhollear Jivitachem pustok. Pustokancher tancheô kornniô boroil'leô asleô tea pormannem mel'leanchi mon'subi zali.
13. Aplea pottant aslim tim mel'lim mon'xam somdiran portun dilim. Toxench mornnan ani patallan apnnachê adhin aslolim mon'xam portun dilim. Ani ap-apleam kornniam pormannem Devan Zhôddti keli.
14. Tednam mornnak ani patallak ujeachea konddant xevttilim. (Hem ujeachem kondd mhollear dusrem moronn.)
15. Zanchim nanvam jiveanchea pustokar boroil'lim naslim, tankam soglleank ujeachea konddant xevttilim.
