1. Menddrean satvo xik'ko fôddlo tednam sumar vordo tas-bhôr sogllem gopchup poddlem.
2. Tednam Deva mukhar ube astat tanchea hatant sat tuturiô dileô mhonn hanvem dekhleô.
3. Anink êk devdut ek bhangarachem dhumpel gheun ailo ani vedi-xim ravlo. Xinvasona mukhar aslolê bhangarachê vedicher sogllea bhoktanchea magnneam borabôr taka zaito dhump dil'lo.
4. Devdutachea hatantlo dhump hulpon, tacho pormôll bhoktanchea prarthonam borabôr Deva mukhar voir choddlo.
5. Tednam devdutan dhumpel ghetlem, tantum vedi vele zollte inglle ghale, ani te prithumecher xevttile. Teach farak goddgoddeancho ghonnghonn aikum ailo, zhoglavnnim zhogzhoglim ani dhornnkamp zali.
6. Magir devdut ap-apleô tuturiô gheun teô vazounk toiar zale.
7. Poilea devdutan apli tuturi vazoili. Rogta borabôr korveancho ani ujeacho paus prithumecher poddunk laglo. Prithumecho êk tisro vantto lasun gelo, toxench rukham-zhaddancho êk tisro vantto hulpolo, ani soglli axi lasun geli.
8. Uprant dusrea devdutan apli tuturi vazoili. Ujean lasun veto êk vhoddlo dongôr koso somdirant xevtton poddlo. Somdirachea tisrea vantteachem rogot zalem,
9. somdirant aslolea jivea mon'zatincho êk tisro vantto melo ani tarvancho tisro vantto futtun gelo.
10. Tednam tisrea devdutan apli tuturi vazoili. Ek vhoddlem noketr, ujeachem agttem zal'lê porim, mollbar thaun konsllun poddlem.
11. Tea noketrachem nanv Kôddsann. Udkacho êk tisro vantto koddu zalo, ani koddu zal'lem udok pieun zaito lôk melo.
12. Magir chouthea devdutan apli tuturi vazoili ani suriachea eka tisrea vantteak mar laglo, toxench chondrimachea eka tisrea vantteak, ani noketranchea eka tisrea vantteak. Oso tea-tea tisrea vantteacho porzôll palovlo, mhonnttôch disachea porzollacho tinantlo êk vantto komi zalo, toxench ratichea porzollacho.
13. Uprant polle zalear, unch varear êk gorudd uddtalo to hanvem dekhlo. To oso aroddtalo to hanvem aikolo: "Teg nimanne devdut apleô tuturiô vazoitole tednam prithumer jietoleanchem kotta, kotta, kotta!"
