1. Tednam zokhpachi êk bet koxi Devan mhaka êk boddi dili ani mhaka sanglem: "Utth ani Devachea Gabhareachem ani vedichem zokh ghe ani thõi kitlo lôk Devak bhôzta to mezun kadd.
2. Punn Gabharea bhailem angonn sôdd; tachem zokh gheum naka kiteak tem raxttranchea lokak dil'lem asa, ani to lôk bavêchallis mhoine Povitr Xar môstitolo.
3. Punn sakotto nheslolea Mhojea dogam sakxidarank Hanv dhaddtolom ani te baraixim-satth dis Mhozo sondêx porgôtt'tole.
4. Te dog sakxidar mhollear ajetinachim don zhaddam ani sonvsarachea Dhonia hujir ubeô asloleô don divliô.
5. Konn-ui tankam vaitt korunk sôdtat zalear, tanchea tonddantlo uzo bhair sorta ani tanchea dusmanank nopoit korta; ani toxench konn-ui tankam vaitt korunk sôdtat tancher moronn ietolem.
6. Devacho sondêx te diit astole titlo-i kall paus poddona zaunk mollob dhampun dovorchi tankam podvi asa; toxich udkachem rogot korunk zhorincher tankam podvi asa; ani apnnank zai tosli pidda haddun sonvsarak sotaunk tankam podvi asa.
7. Tancho sondêx porgôttun zatôch, Patallantli voir choddun ieta ti mon'zat tancher virudh zhuz kortoli; ti tankam haroitoli ani jivexim martoli.
8. Ani tanchea Dhoniak khursar marlolo tea vhodd Xarachea chovkacher tancheô kuddi uddoil'leô astoleô. Tea xarachem khunnechem nanv Sodom ani Ejipt.
9. Tancheô thõi sôddloleô kuddi saddê-tin dis sogllea porzanchea, kullanchea, bhasanchea ani raxttranchea mon'xanchea dolleam mukhar astoleô, ani teô somadhimnim ghalunk rojia diunchim nant.
10. Sonvsarantlo lôk tanchea mornna khatir sontostolo. Tim somarombh kortolim, ani ekamekak danam ditolim, kiteak tea dogam provadiamnim ak'khea mon'xakullak khub konixttai haddloli.
11. Punn saddê-tin disam uprant Devan jivitacho svas tanchê bhitôr ghalo ani te aplea pãiancher ube zale; hem pollelem tim sogllim bharim kamplim.
12. Tednam tãnnim sorgar thaun êk tallo nettan apnnank oxem sangtalo to aikolo: "Hanga voir ieiat!" Ani tanchea dusmananchea dolleam mukhar eka kupant te sorgar choddle.
13. Têch ghoddiek êk koddok dhornnkamp zali; xaracho êk dhavo vantto padd zalo, ani sat hozar lôk melo. Urlolea lokan, ttharea kampun, sorginchea Devachi stuti keli.
14. Dusrem noxtt oxem somplem; punn rokddench tisrem noxtt ieunchem zalem.
15. Uprant satvea devdutan apli tuturi vazoili, ani sorgar vhoddlean oxem bob martole talle gazle: "Sonvsarachi razvôttki cholounchi podvi atam amchea Sorvesporachi ani Tachea Kristachi zali, ani sasnnachea sasnnak To raj choloitolo!"
16. Tednam Deva mukhar aplea sodrancher bosun asat te chovis zannte saxttangim poddle, ani Devak tãnnim bhôzlo
17. hea utramnim: "Sorvespora, sorvpodvedar Deva, Tum asai ani Tum asloi! Tuji vhôdd podvi Tujea hatant Tunvem ghetleai dekhun ani Tum raj cholounk laglai dekhun Tuka ami dhinvastanv!
18. Raxttram challovlim; Tujea ragachi xirantt ieunchi ani mel'leanchi zhôddti korchi hi ghoddi! Tujea sevokam-provadiank, Tujea bhoktank ani Tujea Nanvak man ditoleank, lhanank toxem vhoddank, inam' iuncho vêll ho! Sonvsar padd kortat tankanch padd korcho vêll ho!"
19. Sorgar Devacho Gabharo ukto zalo ani tantum Korarachi pett dixtti poddli. Tednam zhoglannim zhogzhoglim, goddgoddeancho ghonnghonn gazlo, dhornnkamp zali, korveancho paus poddlo.
