1. Hanvem ek novem mollob ani êk novi prithum dekhlim. Poilem mollob ani poili prithum nanch zalim, ani somdir-ui nanch zalo.
2. Aplea nhovreak nettoun toiar kel'lê hoklê porim Povitr Xar, novem Jeruzalem, sorgar thaun Deva koddsun denvtalem tem hanvem pollelem. Xinvasona thaun vhoddlean oso uloitalo to êk tallo hanvem aikolo:
3. "Ho polleiat mon'xam modem Devacho Tombu! To tanchea sangata ravtolo, tim zatolim Tachi porza ani Hoch tanchea-sangata Dev zatolo tancho Dev.
4. Tanchea dolleantlim sogllim dukam To pusun kaddtolo; moronn anink aschem na, dukh anink korchim nant, rudon somptolem, koxtt-ui anink asche nant. Adlem sogott soron gelem."
5. Uprant xinvasonar boslolo asa Tannem mhollem: "Polleiat, soglleô vostu Hanv noveô kortam!" Tannem mhaka anink-ui sanglem: "Hem boroun dovor, kiteak him utram khatrechim ani sotachim."
6. Ani Tannem mhaka mhollem: "Zalem! Hanv Alfa ani Omega, mhonngê Orômb ani Xevôtt. Jivitachem udok vhanvta tê zhorintlem tanel'leank Hanv funkott pieunk ditolom.
7. Zoit vhortoleank Mhojê koddsun hem daiz melltolem; ani Hanv tancho Dev zatolom, ani tim zatolim Mhoje put ani Mhojeô dhuvô."
8. Punn jim konn sakxi diunk bhirantin pattim sorleant, vô bhavarthak visvaxi ravlim nant, jim konn noxtt korun bhoxttotat vô khun kortat, jim konn pozoddponnant lolltat vô ghaddiponn choloitat, jim konn kud'dea devank bhôztat vô dusreank fosounk bhonvtat hea soglleanchem daiz ujean ani gondhokan zolltem kondd. Hem tem dusrem moronn."
9. Nimannea sat noxttamnim bhòrlolim aidonam gheun aslolea sat devdutantlo eklo mhojê-xim ailo; tannem mhaka mhollem: "Hanga ie, hanv tuka hokol dakhoitam, Menddreachi potinn."
10. Tedna, otmean mhaka ubarun, tannem mhaka eka unch ani vhoddlea dongrachê tonkxer vhelo, ani mhaka Jeruzalem Povitr Xar dakhoilem; tem sorgar thaun Deva sorxilem Devachê mhoimen bhoron denvun ietalem; tem eka bhov moladik mannka porim, eka gomeda vori, aspas polleunk dista toslea suriakanta bhaxen chokchoktalem.
12. Taka ek vhoddlem ani unch kott aslem ani kottak bara darvontte asle, ani dôr-êk darvontto rakhunk êk devdut aslo. Darvontteancher Israelachea putam-dhuvanchea bara kullanchim nanvam boroil'lim aslim.
13. Udentik tin darvontte asle, ut'torik tin, dokhinnek tin, ani ostomtek tin.
14. Xarachem kott bara buniadincher bandlolem, ani tea buniadincher Menddreachea bara Dhormdutanchim nanvam boroil'lim aslim.
15. Mhojê lagim uloitalo tea devdutachea hatant, Xarachem, tachea darvontteanchem ani tachea kottachem map gheunchê khatir êk bhangarachi map gheupachi boddi asli.
16. Xar sarkem chovkott aslem, êkêch lambaiechem ani rundaiechem. Devdutan aplê boddien Xar mapun kaddlem: tem don hozar charxim kilometr lamb aslem; tachi rundai ani unchai titlich.
17. Uprant tannem kott-ui mapun kaddlem: tachem map charxim trepon metr. Devdutan tem mon'xanchea chaltea mapan mêzlolem.
18. Tem kott suriakantachem bandlolem, ani xar zalear osol bhangarachem, ani hem bhangar aspas polleunk dita toslê konvchê vori jhigjhigtalem.
19. Kottacheô buniadi sogllea jin'sanchea mannkam-motiamnim nettoil'leô. Poili buniad suriakant, dusri nillrotn, tisri xivdhatu, chovthi pach,
20. panchvi gomêd, sovi indronill, satvi chondrokant, atthvi berozô, nnovi hollduvem-mannik, dhavi bhangari mannik, ikravi zambllem-mannik, ani baravi iakutt.
21. Bara darvontte mhonngê bara motiam, dor-êk darvontto eka motiacho. Xaracho mukhêl rosto osol bhangaracho, konvchê porim aspas polleunk dita toslea bhangaracho.
22. Xarant hanvem Gabharo polleunk na, kiteak tacho Gabharo khud Sorvpodvedar Sorvespor Dev ani Menddro.
23. Xarak suriachea vô chondrachea uzvaddachi goroz na, kiteak Devachi mhoima tacher aplo porzôll ghalta ani Menddro tacho Divo.
24. Raxttram tachea uzvaddak bhonvtolim ani sonvsarantle patxai apli dhon-girestkai taka haddun ditole.
25. Xarache darvontte dis-bhôr uktech astole kiteak thõi rat aschich na.
26. Raxttranchi dovlôt ani bhanddaram thõi pavtolim.
27. Mhellem kitench Xarant bhitôr sorchem na: jim konn ollxik vô khottepon kortat, tim koxêch bhaxen bhitôr sorchim nant. Zanchim nanvam Menddreachea Jivitachea pustokar boroil'lim asat, fokot him Xarant provês kortolim.
